59
59-ci Ǐvel mə̌ğ
Fark'alxoy dəst'in kalat'aynak'. Davidi "za efa" uk'ala faren mə̌ğěğala mikt'am.
Şaulen Davida bespsun çureśi şot'ay k'oja busmişbseynak' amdar yaq'abat'an śameśi mə̌ğ.
1 Ay bez Buxačux, bez düşmənxoy kiyexun çark'est'a za,
Bez loxol ěqeśit'oğoxun q'orişa!
2 Şər əş biq'alt'oğoxun ə̌xilba za,
P'i śik'alxoy kiyexun ext'a.
3 Mone, bez elmoğo haq'seynak' zat'un busmişbsa,
Za pisluğbseynak' gireśi əyitət'un sabsa me zalımxon.
Ama bezi sal sa taxsır nəəl günax tezax bu, ay Q'ončux.
4 Sal sa pis əş tez biq'e zu,
Ama şorox bez loxol eyseynak't'un kape,
Eki p'ap'a, ay Buxačux! Bez dərdə nu aksuna ma laxa.
5 Ay Q'oşuniQ'ončux bakala Buxačux!
Ay İsraili Buxačux,
Hayza Vi şu baksuna ak'est'a!
Va nu çalxala bito me azuk'xoy cazina tada!
İçoğoy boş şəren buy bakalorox,
Tadi əyiti loxol nu çurpiyoroxe şorox!
6 Me pisorox hər biyəs et'unsa,
Hari şəhəri hərrəminət'un biq'est'a,
Xə̌ k'inək' amdari loxolt'un eysa şorox!
7 Sa běğa içoğoy ǰomoxun c'eğalt'oğon
Het'əre ğayin me k'inək' bost'a!
Axıri t'etərt'un fikirbsa ki, içoğo ibakal butene.
8 Ama Hun axšumi ga balnu şot'oğo, ay Q'ončux,
Axšumpest'alnu Va nu çalxala bito azuk'xoy loxol!
9 Za zor tadalo,
Umudi ganu Hun bezi, ay Buxačux!
Bezi bač'an,
10 Vi nu badalbakala çuresuna zaxun nu kambala Buxačuxnu Hun bezi!
Qayk'ale bez yaq'a Buxačuğon,
Bez düşmənxoy taşevk'i bezi turin oq'a bist'una ak'est'ale za!
11 Ama ma besp'a şot'oğo!
Barta biti xoreśeq'at'un,
Barta Vi kiin zore k'ə baksuna ak'eq'at'un, ay beş bač'an bakala Buxačux!
Tene bito usum eyexun c'eri tağale bez azuk'i.
12 İçoğoy muzen içoğo günaxa bast'uni cazina zapeq'at'un barta!
İçoğo bitot'uxun üst'ün hesabsun,
Şuk'k'alaxun nu q'ı̌bi ǰomoxun c'eğalt'oğo nu fikir tast'un
K'ə baksuna ak'eq'at'un barta!
İçoğoy ǰomoxun c'eri bito əfçiğoy q'a q'arğişxoy
13 Əcuğo c'evk'a şot'oğoxun!
Tumexun əfçiba şot'oğo!
Barta dünyəni t'e belxun me bel bitot'in avabakeq'an ki,
Buxačuğoy kule bu İak'ovi nəsili loxol!
14 Me pisorox hər biyəs et'unsa,
Hari şəhəri hərrəminət'un biq'est'a,
Xə̌ k'inək' amdari loxolt'un eysa şorox!
15 Ama barta hari fırıpi taysunaxun başq'a hik'k'al bes maq'at'un baki,
Barta busa mandi ulayinşeq'at'un şot'oğon!
16 Zu isə Vi zoraxun əyitk'ala mə̌ğur mə̌ğk'oz,
Savaxt'inaxun hayzeri Vi nu badalbakala çuresuna bez muzel eçoz!
Axıri Hun bez bač'an,
Bez umudi gan bake t'ar ğine zaynak'!
17 Hun za zor tadalonu,
Va tərifləyinşala mə̌ğur mə̌ğk'oz zu!
Bez bač'annu Hun, ay Buxačux,
Vi nu badalbakala çuresuna zaxun nu kambala Buxačuxnu Hun!