60
60-ci Ǐvel mə̌ğ
Fark'alxoy dəst'in kalat'aynak'. Davidi zombseynak' bakala mikt'am.
"Geše vard k'inək' gözəl bakala irəziluğ" uk'ala faren mə̌ğěğala Ǐvel mə̌ğ.
Daviden Naharayima q'a Sovina bakala aramluğoxun davabit'uxun saal Yoaven hari "elaxoy dərə" uk'ala ganu p'as's'e hazar edomluna k'as'p'it'uxun oşa śameśi mə̌ğ.
1 Vi ç̌oya tarandi Hun yaxun, ay Buxačux,
Yax oç̌alen san bi,
Əcuxlunu Hun beş loxol!
Ama yax gorox eki, beş loxol běğa p'urum!
2 Oç̌ala iz ganuxunen galdi, şot'o bı̌yexun t'ǒpěvk'ala k'inək'en bi Hun!
Q'olayba şot'ay t'ǒpi ganxo, mone, hələ ǰı̌k'esa şo!
3 T'etəren mə̌yinbi ki Vi azuk'i ğina Hun
İçoğoy kəyit'oğo bǒxmǒğǒxun k'at'-k'at'en eçeri!
4 Ama Vi bač'anexun tağalt'oğo Vi bayraği oq'an girbi Hun,
İçoğoynak' q'ı̌ nu bakala, boseğala oxurxo içoğo nu laft'es bakala gala!
5 Vi çureğalt'oğoy Va k'alpsuna ibaka Hun, çark'est'a şot'oğo!
Barta Vi yön kul beş loxolq'an baki, efa yax!
6 Axıri Buxačuğon İz bakala ı̌vel gala metəre pey:
"Bez kiyel badi Şekem şəhəri oç̌alxo və̌x payboz,
Suk'k'ot' uk'ala ganu Bez azuk'i arane cöyboz.
7 Gileadi q'a Menaşşeni oç̌alxoval Bezine!
Efraima arśiz kalaluğbsa,
İudeyinaz laxe Bez taxt'a Zu!
8 Moava Bez tur os'k'ala ləənez be,
Edomi loxol torok'al bosala ext'iyərzax bu Bezi.
Mone, filist'luğoy oç̌alaxune c'eysa Bez səs!"
9 P'oy isə şiin taşala yax t'e q'alala şəhəri loxol?
Şu güvəyinşaki tağalyan Edoma exst'a?
10 Buxačuğon yaxun İz ç̌oya taradit'uxun oşa,
Beş q'oşun davina c'eğat'an Şo yaxun nu bakit'uxun oşa mümkün tene mo!
11 Düşmənxo beş turin oq'a laxsuna köməyba yax, ay Buxačux!
Axıri Hun nu bakala gala insanen hik'k'al bes tene bakon!
12 Buxačuxe yax bitot'uxun zorba balo,
Şone düşmənxo beş turin oq'a saki ç̌axç̌uxp'est'alo!