58
58-ci Ǐvel mə̌ğ
Fark'alxoy dəst'in kalat'aynak'. Davidi "za efa" uk'ala faren mə̌ğěğala mikt'am.
1 Ay kalaluğbalxo, efi c'evk'ala q'ərarxo düzgüne ki?
Bitot'ay loxol sa piin běğinan divanbsa ki və̌n?
2 Təə, insaf uk'ala şey tene bu ef ük'e,
Zor əşp'est'un ən çureğala əşe efi!
3 Hələ nanaxun bakat'an içoğoy yaq'a aç̌esp'iyoroxe me pisorox,
Mis'ik' hamaq'un əfçiduğsune şot'oğoy əş, yaq'nuxun c'eret'un şorox.
4 Şot'oğoy ǰomoxun c'eğala pisluğxo
Dizik'i ǰomoxun c'eğala zəhər k'inək'e.
İz ǔmǔğo laft'ala səsə için nu çureğayin nu ibakala,
5 Dizik'əçidal heq'ədər başarağlu baalkayin,
Şot'o farpi nu əçides bakala sa gürzə dizik'i zəhər k'inək'.
6 Şot'oğoy uluxxo duğa śipa içoğoy ǰomoxun, ay Buxačux!
Çəninə duğa saka şot'oğoy!
7 Barta şorox bari tağala xe k'inək' əfçibakeq'at'un,
Barta içoğoy bosala ox hələ kamanaxun c'eğamin xoxbakeq'an!
8 Barta əlbiz yavaş-yavaş xebaki tağala k'inək' xebaki taśeq'at'un,
Barta nanay tapane p'uri əylen me dünyəni işiğa ene nu ak'es bakala k'inək'
Şoroxal me dünyəni işiğa həsrətq'at'un baki!
9 Şot'oğon içoğoy bel harit'oğo hələ tam q'amişakinut əfçibaki tağalt'un.
Muşen iz běš badi fupi taşala sa göyün o k'inək',
Q'ari sa kološ k'inək'!
10 Me pist'oğon içoğoy cazina zapsunen düzgün bakalt'oğo mǔqt'ale,
Şot'oğoy axıra ak'i içoğoy ük' çaxeśi bakale!
11 Amdarxonal t'e vədə metər uk'alt'un:
«Düzgün bakalt'uxun Buxačuğon İz şaat'luğa kamtenebon,
Həgigiyal Buxačux bune,
Me dünyənə düzgün divanbala Buxačuxe Şo!»