57
57-ci Ǐvel mə̌ğ
Fark'alxoy dəst'in kalat'aynak'. "Za efa" uk'ala faren mə̌ğěğala mikt'am.
Daviden Şauli kiyexun t'it'eri mağarina c'ap'bakat'an śampi mə̌ğ.
1 Gorox eki za, ay bez Buxačux, za gorox eki,
Vaz bač'an tarast'a, Vane bez umud!
Me bələ bez belxun tağamin
Vi q'ənədi oq'az zaynak' gabsa.
2 Ala Arśit'uz k'ale zu,
Bez taxsırsuz baksuna ç̌oyel c'evk'ala Buxačuğoz k'ale!
3 Şot'inal za kul biq'ale göynuxun, za çark'est'ale,
Bez bač'anexun baft'it'oğo biyaburbale.
İz nu badalbakala çuresuna kamtenebal zaxun Buxačuğon,
Za qı̌ yaq'a tene efal Şot'in!
4 Şirurxoy arane,
Busabaki canavarxoy boş baft'i k'inək'zu həysə zu!
Şiş xişt'ik'xo, t'ə̌q'ěğala oxur k'inək'e uluxxo şot'oğoy,
Ğayin me k'inək'e bost'a muzen şot'oğoy.
5 Barta Vi kalaluğ ala bakala göynuxunal c'ovaki ak'eśeq'an,
Barta dirist' oç̌ali ç̌oyel Vi s'iq'an t'ap'eśi, ay Buxačux!
6 Tələt'un laxi za biq'seynak' şot'oğon,
Dərdə baft'iyal çarasuzez mandi zu.
Bezi yaq'e loxol kurt'un kašp'i,
Ama içant'un t'iya baft'i.
7 Vaxun arxayinzu, ay Buxačux, t'ema arxayinzu ki!
Ǐvel mə̌ğur mə̌ğpi Vi s'iya alaboz zu!
8 Mone, həzirzu, bez boş bakalt'oğo upseynak' mə̌ğk'oz!
Běğ çərtk'amin hayzoz,
Arfa q'a tər farpi mə̌ğk'oz zu!
9 Ay Q'ončux, bito azuk'xo Va çalxest'i Vi s'iya alaboz,
Bito millətxoy boş Va tərifləyinşoz!
10 Şot'o görə ki, Vi nu badalbakala çuresun q'a bez bač'ane çurpsun t'emane ki,
Göynul p'ap'i asoyxoxunal c'ovanek'sa!
11 Barta Vi kalaluğ ala bakala göynuxunal c'ovaki ak'eśeq'an,
Barta dirist' oç̌ali ç̌oyel Vi s'iq'an t'ap'eśi, ay Buxačux!