56
56-ci Ǐvel mə̌ğ
Fark'alxoy dəst'in kalat'aynak'. "Ə̌xil mə̌xluğa bakala göyərçin" uk'ala faren mə̌ğěğala Davidi mikt'am.
Filist'luğon Davida Gat' şəhəre biq'at'ane śameśe.
1 Ay Buxačux, za gorox eki!
Bez bač'anexun baft'iyorox hari za p'ap'saxt'un,
Üşe-ğena bez loxolt'un eysa, za saki ç̌axç̌uxpsunt'un çuresa.
2 Bezi hər ğina mə̌yint'unbsa şot'oğon,
Za nu çureğalorox t'eq'ədəre ki,
Bǒq'ə̌lpi çark'ala şey tene, ay ala arśi Buxačux.
3 Za q'ı̌yen haq'ala vədine
Saycə Vaz umudbaksa zu.
4 Za tadi əyitə görə Va alxışp'i
Vaz bač'an tarast'a zu.
Umudi ganu Vast'a ak'i hik'k'alaxun tez q'ı̌bsa!
Axıri Hun bakala gala insanen za k'ə bese bakon?
5 Üşe-ğena bez turin oq'axunt'un kaše bez düşmənxon,
Bezi əyitmoğo fırıdi za pisluğbsune içoğoy niyət.
6 C'əp'k'in gireśi əyitə sat'unbsa,
Za busmişi bespsunt'un çuresa!
7 Şot'oğoy me günaxa cazasuz ma efa,
Vi əcuğoy bəc'ük'esuni k'ə baksuna ak'est'a, ay Buxačux.
Me azuk'xo Vi turin oq'a laxi ç̌axç̌uxp'a!
8 Bez dərdurxoy bitovan soğo-soğo ava Hun,
Bez piyexun bari hər k'at' neğan bǒq'ə̌lpi.
Vi girke boşen śampi Hun şot'oğoy bitova!
9 Mone, Vaz köməyə k'ale zu,
Bez düşmənxonal q'ı̌bi qoşt'un qaybaksa.
Buxačuğoy zaxun baksuna metərez avabaksa zu!
10 İz tadi əyiti loxol çurk'ala Q'ončuğoz tərifləyinşbsa zu,
İz tadi əyiti loxol çurk'ala Buxačuğoz tərifləyinşbsa zu,
11 Umudi ganu Buxačuğost'a ak'i hik'k'alaxun tez q'ı̌bsa!
Axıri insanen za k'ə bese bakon?
12 Ay Buxačux, Va tadi əyiti loxol çurk'oz zu,
Q'urbanxo eçeri Va şükürbsuna ak'est'oz.
13 Axıri Hun bez elmoğon çark'est'i,
Bez tur ǰěna lafst'a ten barti.
Za Buxačuğon işiğ sakala me dünyəne yəşəyinşbsunen q'ısmatbi.