55
55-ci Ǐvel mə̌ğ
Fark'alxoy dəst'in kalat'aynak'. Simlə ət't'əcxoy faren mə̌ğěğala Davidi ögüd-nəsyət tadala Ǐvel mə̌ğ.
1 Ay Buxačux, bez afırına ibaka,
Bez xoyinša nu ibaksuna ma laxa,
2 Bezi Va k'alpsuna coğab tada!
Fikiren haq'ene za, q'ic'eśi manest'a zu
3 Bez düşmənxoy səsə ibakat'an,
Zalımxon za koruğ tadat'an!
Bələt'un baki şorox zaynak',
Əcuğləyinşəki bez loxolt'un ěqesa!
4 Bez ük' c'ap'ebaksa,
Bisuni q'ı̌yene haq'e za.
5 Bula biq'i t'it'ala vəlvəlinaz baft'e,
T'ut'ultinene haq'e za.
6 Həysə t'etərzu ki, nexzu göyərçin baki purpi tağaz,
Sa şip' ga bə̌ğə̌bi irəət nəfəs haq'az!
7 Çara bakayin bez bula haq'i ə̌xil sa ams'i oç̌alaz tağon,
T'iyaz yəşəyinşon!
8 Nexzu amdari sa c'ap'bakala ga bakane,
Muşe q'a tufani ı̌šalayinşaksuna ak'ala k'inək' t'it'eri c'ap'bakes bakane!
9 Gərgürçiluğ saka me pist'oğoy arane, ay Q'ončux,
Barta suna maq'at'un q'amişaki!
T'iyə̌mint'ay loxol kul alabsunaxun q'a davabsunaxun başq'a sa şey tez aksa me şəhəre zu!
10 Üşe-ğena amdari pulat'un c'eye şot'oğon,
Şəhərə q'orişala barine bake pisluğ q'a şər.
11 K'as'esuni, əfçin q'a fırıldağin mese bake me şəhəri küçəmux!
12 Düşməni pis əyitə porttezbsa,
Za nu çureğalt'ay bez loxol alaxun oq'a běğsunal q'uc'ezne zu,
13 Ama hari va p'ap'at'an tez baksa!
Axıri hun bezi ı̌šonu,
Bezi dost'nu, zaynak' viçi k'inək' bakalonu!
14 Beş ük'əyan ams'ipsay yan sunay t'ǒğǒl,
Sagala xramayan taysay camaati boş!
15 Barta bez düşmənxoynak' bisunq'an hari,
Barta şorox dirist'-dirist' gərəmzəluğq'at'un baki!
İçoğoy ük' şəren,
K'ojurxo pisluğen buy bakaloroxe şorox!
16 Zu isə Buxačuğo k'alk'oz,
Q'ončuğonal za çark'est'ale.
17 Savaxt'an, berezəre, biyəsin -
Üşe-ğena çökt'i, ǒnek'a xoyinšezbsa zu,
İbakale za Şot'in!
18 Bez loxol ěqeśi sa sürü düşmənəxun davina c'eğat'an
Bez belxun sa pop bist'al tene bark'al Şot'in!
19 İz padçağluğ həmişəluğ bakala Buxačuğon,
T'e padçağluği nə burqesun, nə çarksun nu bakala Buxačuğon za ibakale!
İbakiyal şot'oğoy səsə bot'ale,
Şot'o görə ki, şorox badalbakalorox tene,
Buxačuğoxun q'ı̌bsun tene bu şot'oğost'a!
20 İçeynak' viçi k'inək' bakalt'ay loxole alabi bez dost'en iz kula,
Beşi "sunay bač'ane çurk'alyan" pi tadi əyiti loxol tene çurpi şo.
21 Ç̌oye axšumene, ama iz ük' şəren buye.
Muč'a-muč'ane əyite, ama izi hər əyit amdarane lafst'a.
22 Vi ə̌mnəbel bakala yükə Q'ončuğo tapşurba hun,
Şoval İç vi q'ayğina mandi vaynak' bač'an bakale.
Şot'in tene bark'on ki, düzgün bakalt'ay tur lamandane!
23 Pist'oğoy axır butene, ay Buxačux,
Gərəmzəluğ balnu Hun şot'oğo!
P'i śik'alxon q'a əfçiduğalxon içoğoy ömüri qǐt'u tet'un yəşəyinşal sal!
Ama bez umudi ga Hunnu!