52
52-ci Ǐvel mə̌ğ
Fark'alxoy kalat'aynak'. Davidi ögüd-nəsyət tadala Ǐvel mə̌ğ.
Edomlu Doegen taśi Şaula "David Aximelek'i k'oyane" pi xavar tadit'uxun oşa śameśi Ǐvel mə̌ğ.
1 Va zorba hesabbi pisluğbsunaxunen fərəxləyinşaksa, ay q'oççağ?
Buxačuğoy nu badalbakala çuresun həmişə zaxune!
2 Əfçibaksune eşt'a amdarxoynak' vi muzen,
Bic'luğ əşp'est'i ğayin me k'inək' k'as'p'i śinne.
3 Şaat'a barti pisən c'ək'e,
Düz əyiti təə, əfçin q'ončuxnu.
4 Bisun eçala əyitmuxe c'eysa vi ǰomoxun,
Əfçiduğalnu hun!
5 Ama Buxačuğon va t'etər sakale ki, vi bula alabes ten bakal hun.
Va vi k'ojaxun bale,
Vi tuma əfçibale me dünyənexun Şot'in.
6 Düzgünt'oğonal mot'o ak'i Buxačuğoy kalaluği běš bul k'os'balt'un,
Vi loxol isə axšumpi metər uk'alt'un:
7 «Buxačuğo bač'an tarast'uni gala iz var-dövlətə umudbakalt'ay,
T'iyə̌mint'oğo əfçibi q'azayinşit'oğoy axır metəre baksa!»
8 Zu isə Buxačuğo ı̌šazu,
Veçələyinşala sa zeytuni xod k'inək'zu Şot'ay bakala gala.
Şot'ay nu badalbakala çuresunaz umudbaksa zu həmişə.
9 Va věbakalt'oğoy běš Vi bit'oğo bez muzel eçeri Va həmişə şükürboz,
Va umud bakoz, şot'o görə ki, Hun şaat' bakalonu!