53
53-ci Ǐvel mə̌ğ
(Ǐvel mə̌ğ. 14)
Fark'alxoy dəst'in kalat'aynak'. "Maxalat'" uk'ala faren mə̌ğěğala Davidi ögüd-nəsyət tadala Ǐvel mə̌ğ.
1 Axmağxon içoğoy ük'e boş "Buxačux butene" next'un.
Düz yaq'axun c'eret'un, pis əşurxoy qoşt'ant'un taysa şorox;
Şaat' əş biq'al butene.
2 Buxačuğonal göynuxun amdarxoy loxole běğsa,
Běneğsa běyn şot'oğoy boş müdrik baki İçu qə̌věğalo bune?
3 Bitot'in Buxačuğoxun ç̌oya taradene,
Sa tanal bakayin şaat' əş biq'al tene mande.
4 Hevaxt' haq'ullayinşakalt'un me pis əş biq'alxo?
Bezi azuk'a saki ukalxo,
İçoğoy t'arnu p'ap'alo Buxačux baksuna nu q'amişakalxo?
5 Ama mone, q'ı̌yen haq'ene şot'oğo,
İçoğoy pula haq'ala sa q'ı̌yen!
Buxačuğon izt'oğoy loxol ěqeśit'oğoy ǔq'enxone xoxp'i,
Biyaburebi şot'oğo,
Şot'o görə ki, taradene şot'oğoxun İz ç̌oya!
6 Ay İsraileynak' Sionaxun eğala çark'esun, mayanu?!
Eki qayda Buxačuğoy azuk'eynak' t'e bəxt'əvər ğimxo!
Barta İak'ovi nəsilen mǔqluğq'an c'ovakest'i,
Barta israilluğoy ç̌oyen axšumpeq'an!