51
51-ci Ǐvel mə̌ğ
Mə̌ğk'alxoy kalat'aynak'. Davidi Ǐvel mə̌ğ.
Davidi günax əşp'est'i Bat'-Şevaxun ı̌šaluğbit'uxun oşa xavareçal Nat'ani iz t'ǒğǒl eğat'an śampi mə̌ğ.
1 Vi nu badalbakala çuresuna ak'est'i za bağışlayinşa, ay Buxačux!
Vi ük' bok'ospsuna zaxun kammaba, bez günaxxo silba!
2 Bito bez taxsırxo os'k'a taşa,
Za bezi günaxaxun təmizba.
3 Vi əyitəxun c'eysuna avazu,
Əşp'est'i günaxi bı̌hiluğal q'amişzu.
4 Vi běšzu günaxkər, Vi k'anunxoxun c'eriz günax əşp'est'i,
Vi piyes pis ak'eğala əşez biq'i zu.
Şot'o görəl haq' galan divanbsa,
Düzgün q'ərar c'evk'alonu Hun!
5 Axıri zu nanaxun bakat'an ene günaxkərzuy,
Hələ nanay tapane bakat'an bez günax zaxuney.
6 Ama Hun düzgünluğen qə̌věsa amdarast'a,
Me müdrikluğaxun bez ük'eyal laxa Hun.
7 Za issop'en təmizba, barta bez günaxxoxun təmiz bakaz,
Za os'k'a, lap ǐǰaxunal mas'i bakaz.
8 Za mǔqt'a, bez ç̌oya axšumda,
Barta Vi xə̌xə̌pi ük' qayeśeq'an.
9 Bez günaxxo bağışlayinşa,
Bito bez taxsırxo os'k'a taşa.
10 Ay Buxačux, za təmiz ük' tada,
Za təzələyinşa, barta Vi yaq'en tağaz.
11 Za Vaxun ə̌xilmaba,
Vi tadi Ǐvel Urufa zaxun ma ext'a.
12 Vaxun eğala çark'esuni mǔqluğa za qayda,
Za Vi əyiten tağala ba.
13 T'e vədə Vi əyitəxun c'eğalt'oğo Vi yaq'en taysuna zomboz,
Günaxkərxoval Vaç qaybakalt'un.
14 Ay Buxačux, ay za çark'est'es bakala Buxačux,
Bez kiyel bakala p'iya os'k'a,
Barta bez muzen Vi düzgünluğaxunq'an əyitp'i.
15 Bez muza qaypa, ay Q'ončux,
Barta bez ǰomoxun Vaynak' tərifq'an bari.
16 Vi zaxun çureğalo q'urban eşt'un bakiyniy, ezçoy,
Ama bok'ospsuni q'urbanen irəzibala şey tene Va!
17 Va çalxsun, Vi çureğalt'oğo bsun - mone əsil q'urban!
Mot'o q'amişaki q'abulbalt'u Hun Vaxun ə̌xiltenbon, ay Buxačux.
18 Vi ük' bok'ospsuna ak'est'i Sioneynak' şaat'luğ ba,
Yerusalimi hərrəmine bakala q'alina təzədən biq'a.
19 T'e vədə bütüm me eçala q'urbanxon Va irəzibale,
Dirist' bok'ospseynak' šameğala q'urbanxo Vi piyes şaat' ak'eğale,
T'e vədə Vi q'urban eçala gala arak'xoval eçalt'un.