50
50-ci Ǐvel mə̌ğ
Asafi Ǐvel mə̌ğ.
1 Mone, Bitova Başarbala Buxačuğon, Q'ončuğon İz əyitə upseynak' azuk'xone k'ale,
Dünyəni sa belxun t'e soğo bel śirik' k'ə azuk' bunesa k'alpi girebsa.
2 Sionaxune Şot'in yaynak' İz işiğ sakala kalaluğa ak'est'a,
İzi gözəlluğaxun ene şuk'k'alast'a nu bakala Sionaxun!
3 Enesa beş Buxačux, ama şip' çurpseynak' tene eysa!
Bok'osp'i śik'ala arux k'inək',
Ěqeśi tufan k'inək'e eysa!
4 Göyurxo q'a oç̌ala k'alpi
Şot'oğoy běš İz azuk'ane divanbsa Şot'in.
5 "Girbanan Bez yaq'en tağalt'oğo bitova,
Q'urban šampi Zaxun irəziluğ ğaç̌eśit'oğo Bez t'ǒğǒl eçanan" nexe.
6 Mone, göyurxonal at'unksa Buxačuğoy divanbsuni k'ə baksuna,
Şot'ay düzgünluğat'un car saksa şot'oğon!
7 "İbaka, ay Bez azuk', Zuz əyite!
Mone, vi taxsırkər baksuna ç̌oyel c'evk'alo bakoz, ay israilluyox,
Şot'o görə ki, Buxačuxzu, vi Buxačux Zuzu.
8 Ef taxsırxo q'urban eşt'unxost'a tez ak'al,
Bok'ospsuni q'urbanxon Za irəzibsaxun tez əyite həysə Zu.
9 Ef ağılxo bakala öküzxoxun,
Sürünə bakala keçiğoxun tez əyite.
10 Axıri c'ələye bakala bito heyvanxo,
Hazarxon buruxmoğo bakala sürüyox İzi Bakalt'aynak' mo hik'k'ale!
11 Buruxmoğo bakala bito q'uşurxoz soğo-soğo çalxsa,
Çöle bakala heyvanxoy bitone Bez kiin oq'a.
12 Zu busa bakayiz va pi k'ə booz?
Dünyəl, dünyəne bakaloroxal Bezi baksunen va het'u görə uk'az?
13 Zu nə öküzi yeq' ukalo tezu,
Nəəl keçin p'i ǔğə̌lo."
14 Buxačuğo şükürbsun bakale vi Şot'aynak' eçala q'urban,
Vi niyətp'i tadi əyiti loxol çurpsuna ak'est'a Ala Arśit'u!
15 "Vi t'ar ğine Za k'alpa, Zuval va çark'est'oz,
Metər, Bez s'iya alabalo bakalnu hun."
16 Buxačuğon pist'oğo metər uk'ale:
"Hun mani ç̌oyenen Bez k'anunxoxun əyitp'es baksa?
Bezi azuk'axun ğaç̌eśi irəziluğa hetəren vi muzel eçes baksa?
17 Bezi tadi nəsyətxo nifrətenbsa hun,
Bezi piyorox vi sa ǔmǔğoxun baśi t'e soğo ǔmǔğoxun c'enesa.
18 Sa oğri ak'ala bakayin gərenbaksa şot'o,
Yaq'nuxun c'erit'oğoxun dost'luğenbsa.
19 Vi ǰomoxun şəre barst'a,
Muzexun əfçi əyitmuxe c'eysa.
20 Vi viçey ç̌oyelen çure əfçidən hun,
Sa nanay tapanexun c'eri doğma viçey loxol şəren bost'a!
21 Hun me əşurxo biq'at'an
Bezi şip' çurpsunaxun t'etəren q'amişaki ki, Zuval vallarik'zu.
Ama təə! Mone, vi hetər baksuna ç̌oyel c'evk'oz,
Vi taxsırxo bitova c'epi śik'oz!
22 Mone, bito me pit'oğo ef eyex efanan, ay Buxačuğo eyexun c'evk'iyorox!
Tene, və̌x k'ot'or-k'ot'or booz,
Şuk'k'alen və̌x bez kiyexun haq'esal tene bakal.
23 Buxačuğo şükürbsune efi Za çalxsuna ak'est'ala q'urban,
Düz yaq'en tağalt'in Zaxun eğala çark'esuna ak'ale!"