49
49-ci Ǐvel mə̌ğ
Fark'alxoy dəst'in kalat'aynak'. Goraxi ğarmoğoy Ǐvel mə̌ğ.
1 Ǔmǔxlaxanan bez uk'alt'oğo, ay bito azuk'xo,
İbakanan, ay me dünyəne yəşəyinşalorox!
2 S'ila bakalt'inal, nu bakalt'inal,
Kəsibenal, varlunenal iz ǔmǔxxo qaypeq'an!
3 Müdrik əyitmux uk'oz və̌x,
Bez ük'exun mani fikirxoy c'ovaksuna və̌x p'ap'esp'oz.
4 Məsəloğo ǔmǔxlaxi şot'oğoy k'ə upsuna q'amişakoz,
Oşal me müdrikluğa eçeri faren ef mə̌xinə laxoz.
5 T'ar ğinaxun,
Bez hərrəmine bakala pisluğen buy əfçiduğalxoxun het'aynak' q'ı̌boz?
6 İçoğoy var-dövlətə güvəyinşakalt'oğoy,
Girbit'oğo bitot'ay piye badi fərəxləyinşakalt'oğoy het'uxun zap'eğoz?
7 Elmoğo toyen haq'ala şey tene,
Buxačuğoxun təngə tadi ext'es bakala şey tene elmux.
8 Şot'o görə ki, tene bu şot'ay toy,
İnsani kiyexun ayeğala şey tene mo.
9 Şuva həmişəluğ me dünyəne yəşəyinşalo?
Bito p'uri oç̌ali oq'ane taysa!
10 Bitot'in aneksa: nə müdrik bakalt'ine me dünyəni t'ǒğə biq'i çurpes bake,
Nəəl axmağen q'a q'ammazen.
Bito p'uri tanesa, içoğoy girbiyoroxal q'ert'une manst'a.
11 İçoğoy pul boteneşt'a,
Oç̌alxot'un exst'a ki, içoğoxun oşa eğala nəsileynak' efalt'un.
Ama mone, gərəmzoğo bakala sa p'at'ar oç̌ale içoğo mandalo!
12 Hetər s'iye q'ončux bakalnu baka,
T'e çöle tarak'ala heyvanaxun sa fərg tene bu insani!
Bitot'ay axır bisune!
13 Mone içu güvəyinşakalt'oğoy q'a şot'oğollarik' bakalt'oğoy me dünyəne tağala yaq'e axır!
Ama maya? Pula q'ic'p'i tağamin mot'o tet'un q'amişaksa!
14 Sürünen iz bula k'os'bi tağala k'inək' tağalt'un şorox t'e dünyəne,
Bisun iç şot'oğoynak' yaq' ak'est'ala çoban bakale!
P'uri oç̌alin oq'a tağalt'un, bašaybaki əfçibakalt'un t'iya!
Pula qayk'at'an isə düzgünt'oğoy döör eğale.
15 Zaal p'uri oç̌alin oq'a taysa tene bark'al Buxačuğon.
İz t'ǒğǒl ext'ale za Şot'in!
16 Dövlətlut'ay hik'k'ala tamaxmaba,
S'iye q'ončux bakalt'oğoy hörməti avuzbaksuna ak'i paxılluğmaba.
17 Şot'o görə ki, hələ şuk'k'alen içuxun hik'k'al taşeri tene me dünyənexun,
Nəəl s'iya biq'i çurk'ala şey tene.
18 İz pul qay vədine bəxt'əvəre hesabbsa içu,
Axıri amdari əşurxo şaat' tağat'an bitot'aynak' piin işiğe!
19 Ama tene ava ki, bito p'uri tağamine,
Pula q'ic'p'i t'e dünyəne, iz bavoğoy t'ǒğǒl tağamin!
20 Hetər s'iye q'ončux bakalnu baka,
Müdrikluğ nu bakala insani çöle tarak'ala heyvanaxun sa fərg tene bu!
Bitot'ay axır bisune!