48
48-ci Ǐvel mə̌ğ
Goraxi ğarmoğoy Ǐvel mə̌ğ.
1 Q'ončux kalane.
Şot'ay s'iya duği mə̌ğurt'un mə̌ğě Buxačuğoy şəhəre,
Şot'ay s'iyat'un alabsa İz ı̌vel buruğo.
2 İz alloyluğen içu gözəlluğ tadala Sion buruğo,
Dirist' dünyəneynak' mǔqluğ eçala,
Śafon burux k'inək' gözəl, kala Padçaği məsk'ən bakala t'e şəhəre!
3 Q'alane Buxačux t'e şəhəreynak',
Sa q'orişal k'inək't'un aksa Şot'o t'e ganu ı̌ša bitalt'oğon.
4 Mone, padçağxon içoğoy q'oşunxot'un girbi,
Şot'ay loxol tayseynak't'un c'eri şorox.
5 Ama hari ak'at'an vəlvəlinət'un baft'i,
İçoğo q'ı̌yen haq'i qoşt'un qaybaki.
6 Əyel eçala çuğon zap'k'ala koruğat'un zapi,
Pulan haq'i Hun şot'oğoy.
7 Běğ c'eğala tərəfəxun eğala muşen iz běš c'eğala kala gəminə śarpi śik'ala k'inək',
Hunal şot'oğon oç̌alen sa bi.
8 Beşi ibakit'oğoy düz baksuna beş piinyan ak'i:
Beşi Buxačuğoy şəhəri,
Bitova Başarbala Q'ončuğoy şəhəri binorina Buxačuğon həmişəluğe laxe.
9 Vi nu badalbakala çuresunayan aksa
Vi xrama bağat'an, ay Buxačux!
10 Dünyəni t'e bele t'ap'esa Vi s'i,
J̌omo muz bakalt'in Vi kalaluğaxune əyite,
Düzgün divanbsunast'ane Vi zor, ay Buxačux!
11 Sion buruxe mǔqbaksa,
İudeyina bakalt'oğoy ük'e qayesa Vi düzgünluğa ak'i!
12 Sioni hərrəmine fırıpi şot'o běğanan,
Şot'ay q'aloğo bǒq'ə̌lpanan,
13 İz bariğoy ost'aarluğa,
Düşməni ı̌ša nu bites bakala me ganu fikir tadi ef eyex efanan.
Eyex efanan ki, və̌xun oşa eğala nəsileynak' exlətp'es bakanan.
14 Axıri me Buxačux yaynak' həmişəluğ bakala Buxačuxe.
Axıral śirik' yaxun baki
Yax yaq' ak'est'alone!