47
47-ci Ǐvel mə̌ğ
Fark'alxoy dəst'in kalat'aynak'. Goraxi ğarmoğoy Ǐvel mə̌ğ.
Ay bütüm azuk'xo, çəpibanan,
Mǔq səsen Buxačuğo alxışp'anan!
Şot'aynak' ki, şuk'k'alen Şot'ay sa əyitə p'ə̌ bes nu bakalone Q'ončux,Ala Arśiyone,
Dirist' dünyəni kala Padçağe Şo.
Azuk'xone beş běš eçeri bač'an k'os'best'i Şot'in,
Millətxone beş turin oq'a saki.
İz çureğala İak'ovi piin işiğ bakala oç̌ala İçine c'ək'p'i,
Şot'o yax tadi həmişəluğ beşine bi.
 
Mone, mǔq səsure c'eysa Buxačux ěqeğat'an,
Şeyp'urt'un fare Q'ončux İz ganuxun galk'at'an.
Mə̌ğpanan! Buxačuğo tərifləyinşala mə̌ğur mə̌ğpanan!
Mə̌ğpanan! Beşi Padçağa tərifləyinşala mə̌ğur mə̌ğpanan!
Şot'aynak' ki, dirist' dünyəni padçağe Buxačux,
Mə̌ğurxoy ən şaat't'u mə̌ğpanan Şot'aynak'!
Bito azuk'xoy padçağ bakalone Buxačux,
İz ı̌vel taxt'a arśiyone Şo!
 
Bito azuk'xoy kaloroxe giresa Avrahami Buxačuğoy bel,
Şot'ay kiyelt'un me dünyəni kalaluğbalxo,
Bitot'uxun üst'üne Buxačux!