45
45-ci Ǐvel mə̌ğ
Fark'alxoy dəst'in kalat'aynak'. Goraxi ğarmoğoy "Gěše vard k'inək' gözəl bakala irəziluğ" uk'ala faren mə̌ğěğala Ǐvel mə̌ğ.
Lašk'oyi mə̌ğ
1 Bez ük' şaat' əyitmoğon buye,
Padçağeynak'ez mə̌ğě!
Bez ǰomoxun c'eğala mə̌ğ
Başarağlu şairi q'ələməxun c'eğala şeir k'inək'e!
2 Vi loxol běğat'an amdari ük'e qayesa, ay padçağ,
Vi ǰomoxun uč'e barst'a,
Buxačuğoy xeyir-bərəkət həmişəluğ içuxun bakalonu hun!
3 Ext'a vi q'ılınca, vi bı̌yex ğaç̌p'a, ay q'oççağ!
Vi zora, vi kalaluğa ak'est'a!
4 Vi ěken taśi davoğo taşa, barta vi kala s'i t'ap'eśeq'an!
Fağırxoy tərəf baki düzgünluği q'a düzgün divanbsuni k'ə baksuna ak'est'a,
Şot'o görə ki, Vi kiyexun nu ayeğala əş tene bu!
5 Barta vi şiş oxurxo taśi düşməni ük'eq'an t'ə̌q'eśi,
Barta azuk'xo vi turin oq'aq'at'un biti.
6 Buxačuğon va tadi taxt' İz taxt'allarik' həmişəluğe,
Düzgünluğen efale vi padçağluğa.
7 Hun düzgünluğan c'ək'p'i, pisluğa isə nifrətenbi.
Kot'aynak'al, Buxačuğon, vi bakala Buxačuğon,
Va kala mǔqluğen c'ək'p'i
T'iyə̌mint'oğoxun bitot'oğoxun üst'üne bi.
8 Vi paltaraxun mirrinen, aloyen saal k'assinen tadala şaat' adurxone adesa,
File ǔq'enen bəzəyinşəki sarayxoy boşe mǔqst'a va
Arfinaxun c'eğala səsen.
9 Padçağxoy xuyərmuxe bu vi çuux baksuni hörmətə layiğ bakalt'oğoy arane,
Vi yön tərəf çuux-padçağ bakseynak' c'ək'eśiyone arśe,
Ən şaat' q'ızılxo laxine arśe vi t'ǒğǒl.
10 İbaka, ay xuyər, uk'alt'oğo yönbəri ǔmǔxlaxa!
Vi azuk'a, vi bavay k'oja ene eyexun c'evk'a,
11 Padçaği əyiten taki, şone vi q'ončux!
Barta vi gözəlluğa ak'i va samalal geleq'an çureśi.
12 Sur oç̌alaxun bakalt'oğon vaynak' payurxo eçalt'un,
Azuk'xoy ən dövlətluyorox vi piyes şaat' ak'esun çureğalt'un.
13 Mone, padçaği xuyər tamtarağen,
İz loxol q'ızılen bəzəyinşəki paltaren sarayane baysa!
14 Gözəl naxışxo laxeśi paltarin boşe eysa şo padçaği t'ǒğǒl,
İçu köməybala xuyərmuxal iz bač'anexunt'un baysa!
15 Axšumen, qay ük'ent'un tur ç̌axe
Padçaği saraya şot'oğon!
16 Vi bavoğoxun mandi taxt'a vi ğarmux arśale, ay padçağ!
Me oç̌ala kalaluğbal laxalnu hun şot'oğo.
17 Vi s'i vaxun oşa eğala nəsilxoy ǰomoxunal tene bital,
Millətxon me mə̌ğə̌ mə̌ğpi vi s'iya alabalt'un həmişə!