44
44-ci Ǐvel mə̌ğ
Fark'alxoy dəst'in kalat'aynak'. Goraxi ğarmoğon śampi ögüd-nəsyət tadala Ǐvel mə̌ğ.
1 Ay Buxačux, beş bavoğon exlətp'at'an
Beş ǔmǔğonyan ibake Vi bit'oğoy barada,
Vi içoğoy kalboğoxunal běš,
Hələ lap damna döörəst'ə bit'oğoy barada.
2 Hetəren Hun q'erəz millətxo şəp'eśi
Beş bavoğo eçeri me oç̌ala arśest'i.
Hetəren t'e azuk'xoy ğina mə̌yinbi,
Beş bavoğo isə işiğa c'evk'i.
3 Davabi tet'un haq'i şot'oğon me oç̌ala,
Zor əşp'est'i tet'un içoğoy kiyel badi.
Vi kiin, Vi zorent'un haq'i!
Vi ük'e basksuna görə,
Şot'oğoxun Vi çuresuna nu kambsuna görət'un baśi arśes baki.
4 Ay Buxačux, Hunnu bez Padçağ,
Hunnu İak'ovi nəsiləxun davabalt'oğo taşevk'est'alo!
5 Yan Vi köməyenyan beşi düşmənxo şəp'esa,
Vi yax tadala zorenyan beşi loxol ěqeśit'oğo ç̌axç̌uxp'es baksa.
6 Bezi dǒpt'i sakes baksuna tez güvəyinşaksa zu,
Bez q'ılınc tene bezi loxol eğalt'u sakalo.
7 Hunnu yax beş düşmənxoy kiyexun çark'est'alo,
Yax nifrətp'alt'oğo biyaburbi ot'p'est'alo.
8 Beşi ği Buxačuğo alxışpsunene c'ovaksa,
Vi s'iya alabalyan yan həmişə!
9 Ama, mone, yaxun ç̌on taradi Hun,
Yanal biyaburbaki ç̌omə̌yinyan mandi,
Düşməni loxol tağat'anal beş q'oşunaxun ten baksa ene Hun.
10 Yax şot'oğoy běš badi şəp'eśesendi,
Yax nifrətp'alt'oğon hari yax fǔq't'unpi.
11 Eğela canavari ǰomo tadala k'inək' yax şot'oğoy ǰomon tadi Hun,
Millətxoy arane gərgürbaki tayanśi.
12 Xene toyenen toydi Vi azuk'a,
Vi piyes sa köpiluğal teyan baki!
13 Q'onşiğoynak' axšumi gayan bake,
Ot'exun beş bula alabes teyan baksa yan.
14 T'iyə̌mi azuk'xoy ǰomo k'əc'yansa,
K'əşinen ak'est'it'un axšume beş loxol.
15 Bask'i-hayzeri me biyaburçiluğ zaxune,
Oç̌al qı̌bakayin bazğon zu.
16 Za nifrətbala düşməni axšume bez ak'alo,
Bez loxol bosala əyitmuxe bez ibakalo.
17 Manu ki, Vi laxi k'anunxoxun teyan c'eysay yan,
Vaxun ğaç̌eśi irəziluğa əməlyanbsay,
Ama p'urumal me əşure hari beş bel.
18 Vaxun beş ük' tene irapey,
Vi laxi yaq'axun teyan c'eysay yan,
19 Ama Hun p'urumal oç̌alen sanbi yax.
Beş k'ojurxo xarabinan c'urevk'i,
Zülmət bayinq'luğenen bəc'ürpi Hun yax.
20 Yəni yan beş Buxačuğoxun ç̌o taradi bakiyaniy,
Kula alabi q'erəz buxačuğo k'alpi bakiyaniy,
21 Bitot'oğoy ük'e boş bakalt'oğo ak'ala Buxačuğoxun c'ap' manedoy ki mo?
22 Yan Vi laxi yaq'en taysuna görə beşi elmoğot'un haq'sun çuresa hər ği,
Šameseynak' bakala sa eğeli loxol běğala k'inək't'un běğsa beş loxol!
23 Ay Q'ončux, het'aynak'en şip' çurpe?
Hayza, Vi şu baksuna ak'est'a!
Vi kula yaxun ma zapa həmişəluğ.
24 Het'aynak'en yaxun Vi ç̌oya taradi?
Het'aynak'en beş dərdə q'a əzyətxo nu aksuna laxi?
25 Oç̌alen sayanbaki yan,
Bula alabi hayzes teyan bakon ene.
26 Hayza, kul biq'a yax!
Vi nu badalbakala çuresuna ak'est'i yax çark'est'a!