36
36-ci Ǐvel mə̌ğ
Fark'alxoy dəst'in kalat'aynak'. Q'ončuğoyk'ul bakala Davidi Ǐvel mə̌ğ.
Günaxbsun pis amdari ük'exune eysa,
Buxačuğoxun q'ı̌tenebsa şot'in.
İçuxun t'ema irəzine ki,
Nə iz taxsırane q'amişakes baksa, nə t'e taxsıra nifrətbes.
İz ǰomoxun pisluğ q'a əfçine c'eğon,
Müdrikluği q'a şaat'luği k'ə baksuna tene ava şot'in.
Bask'i galal pisluğbsunaxune fikirbsa,
Pis yaq'en taysunane c'ək'p'e,
Şər əş biq'sunaxun kultenehaq'sa şot'in.
 
Ay Q'ončux, Vi nu badalbakala çuresun me dünyəne p'aq'ala şey tene,
Vi beş bač'ane çurpsun göyurxone p'ap'sa.
Vi düzgünluğ buruxmux k'inək' kalane,
Vi düzgün divanbsun oqurxoy tum k'inək' bə̌ğə̌loye.
Ay Q'ončux, insanal, heyvanal q'orişenbsa Hun!
Ay Buxačux, Vi nu badalbakala çuresuni toy butene,
Vi xojinane tarane insani baloox.
Vi k'oje şot'oğo boşevk'ala bolluğ,
Vi oq k'inək' tağala şaat'luğe şot'oğoy xenezaluğa bot'alo.
Şot'aynak' ki, Vast'ane yəşəyinşi orayin,
Vaxun eğala işiğe yax yəşəyinşest'alo.
10 Va çalxalt'oğo Vi nu badalbakala çuresuni k'ə baksuna ak'est'a ki,
Ük' təmizt'oğon Vi düzgünluği k'ə baksuna ak'eq'at'un.
 
11 Ma barta içuxun irəzit'ay turin oq'a ç̌axç̌uxeśi tağaz,
Ma barta pist'ay kul za p'ap'ane.
12 Mone, bitet'un pisorox, turin oq'a ç̌axç̌uxeśi tat'unsa,
İçoğoy bula alabes tet'un bakal ene şot'oğon.