37
37-ci Ǐvel mə̌ğ
Davidi Ǐvel mə̌ğ.
1 Pisluğbalt'oğoy fikirə ma zapa,
Haq'suzluğbalt'oğo paxılluğ ma ba,
2 Şot'aynak' ki, şorox usumluğen o k'inək' q'aribakalt'un,
Göyün bitk'i k'inək' nešum bakalt'un.
3 Q'ončuğo umudbaka, şaat'luğ ba,
Şotay laxi yaq'axun ma c'eki, me ölkinə şip'luği boş yəşəyinşa.
4 Q'ončuğoxun mǔqbaka,
Şot'inal vi ük'en çureğalt'oğo p'ap'esp'ale.
5 Vi bütüm yəşəyinşə Q'ončuğo tapşurba,
Şot'o ext'ibərba,
Şot'inal vaynak' mot'oğo bale:
6 Düzgünluğa savaxt'in işiğ k'inək' ç̌oyel c'evk'ale,
Vi haq'q'a ğene işiğ k'inək' qay ak'est'ale.
7 Q'ončuğoy běš naşükürluğ ma ba,
Səbirlu baki yaq'běğa,
Pist'oğoy běš baysuna,
İçoğoy pis niyətxoy bex p'ap'suna fikir ma tada.
8 Vi hirsə t'ǒǒx bosa, əcuğaxun zap'eki,
Fikir ma tada, mot'oğon amdareynak' saycə zərəle eçon.
9 Axıri haq'suzluğbalxo əfçibakalt'un,
Q'ončuğo umudbakalt'oğon isə Şot'in əyit tadi ölkinə mülk k'inək' haq'alt'un.
10 Samal yaq'běğa, haq'suzluğbalo əfçibakale,
Lap iz baki galal qə̌věğayin, ten bə̌ğə̌bal.
11 Fağırxon isə me oç̌ala mülk k'inək' haq'alt'un,
Q'azayinşi bol xeyir-bərəkətəxun mǔqbakalt'un.
12 Şər amdaren düzgün amdara pisluğ bsune çuresa,
İz əcuğoxun uluxxone ğırıc'est'a.
13 Ama Q'ončuğon haq'suzluğbalt'ay loxol axšumene,
Axıri avane ki, şot'ay coğab tadala ği ı̌šane.
14 Kəsibə, fağıra oq'a sakseynak',
Düz yaq'en tağalt'u əfçibseynak'
Haq'suzluğbalt'in q'ılınce c'evk'on, silaxe əşp'est'on.
15 Ama şot'oğoy q'ılıncxo içoğoy ük'e t'ə̌q'ěğale,
Silaxxo xə̌xə̌yeğale.
16 Düzgün amdari kəsədluğ
Pis amdari var-dövlətəxun şaat'e.
17 Şot'aynak' ki, haq'suzluğbalt'oğoy zor irameğale,
Düzgünt'oğo isə Q'ončuğon kul biq'ale.
18 Düzgünt'oğoy yəşəyinş Q'ončuğoy piin běše,
Şot'oğon me ölkinə həmişəluğ miras k'inək' haq'alt'un.
19 Şot'oğon t'ar ğine tet'un ot'p'al,
Q'idluğ bakala ğimxost'a boş tapanen tarak'alt'un.
20 Ama haq'suzluğbalxo əfçibakalt'un,
Q'ončuğoy düşmənxo q'oruği vardurxo k'inək' şerebakalt'un,
K'üün k'inək' usumluğen əfçibakalt'un.
21 Haq'suzluğbalen iz borcal tene qayst'a,
Düzgün amdar isə bitot'aynak' kulqaye.
22 Q'ončuğoxunxeyir-bərəkət haq'it'oğon ölkinə mülk k'inək' haq'alt'un,
Şot'oxun ləənət haq'iyorox isə əfçibakalt'un.
23 Əgər Q'ončux amdari tağala yaq'axun irəzinesa,
Şot'o iz tağala yaq'a q'orişebon.
24 Me amdar lamanaldayin tene biton,
Şot'aynak' ki, Q'ončuğon şot'ay kulaxun bineq'on.
25 Bez cəyilluğaxun həysət'inəl śirik',
Bezi me q'oja vədine düzgün amdari t'ǒǒx bosesuna,
İz əyloğoy šumeynak' dilənçiluğbsuna tez ak'e.
26 Şot'in həmişə kulqayluğene borc tast'a,
İz əyloğoxun xeyir-bərəkəte eysa.
27 Şər əşləxun ə̌xilbaki şaat'luğba ki,
Vi ömür boxoy bakane.
28 Q'ončuğon düzgünluğe çuresa,
Şot'aynak'al sal sa vədə İçu q'ulluğbalt'u tene boson.
Şot'in düzgün amdarxo həmişə q'orişi efale,
Haq'suzluğbalxo isə nəsilluğen əfçibale.
29 Düzgün amdarxon ölkinə mülk haq'alt'un,
Şot'oğon ölkinə həmişəluğ məsk'ən sakalt'un.
30 Düzgün amdari ǰomoxun müdrik əyitmuxe c'eysa,
İz muzen haq' əyite nex.
31 Şot'aynak' ki, iz Buxačuğoy k'anun iz ük'est'ane,
İz tural tene lamanst'a.
32 Haq'suzluğbalt'in düzgün amdara irizləyinşebsa,
Şot'o bespseynak' yaq'e qə̌věsa.
33 Ama Q'ončuğon düzgün amdara haq'suzluğbalt'uxun q'orişebon,
Şot'ay ç̌oyel əfçidən çurpi pis q'ərar tadesunaxun enefon.
34 Q'ončuğo umudbaka, Şot'ay yaq'en taki,
Şot'inal va ěqevk'i me ölkinə mülk tadale,
Haq'suzluğbalxoy əfçibaksunal ak'alnu.
35 Sa haq'suzluğbala zalım amdarez ak'ey,
Şo barlu oç̌ala tum duği alloy xod k'inək' ěqesay.
36 Ama şo əfçinebaki, iz gaal ams'ine mandi,
Şot'o gelez qə̌věśi, tez bə̌ğə̌bi.
37 Ük' təmizt'oğoy loxol běğa,
Vi pul düzgün bakalt'ay loxolq'an baki,
Şot'o görə ki, gələcəy serluğ çureğalt'oğoye.
38 Ama günaxkərxo bito əfçibakalt'un,
Haq'suzluğbalxoy axır tene bakal.
39 Düzgün amdarxoy çark'esun Q'ončuğoxune,
Şot'ot'un bač'an tarast'a şot'oğon.
40 Q'ončuğon şot'oğo köməyebsa,
Şot'oğo haq'suzluğbalxoy kiyexun haq'i çark'esest'a,
Şot'aynak' ki, Q'ončuxe şot'oğoy umudi ga.