35
35-ci Ǐvel mə̌ğ
Davidi Ǐvel mə̌ğ
1 Zaxun əyitk'alt'oğoy coğaba Hun tada, ay Q'ončux,
Zaxun davina c'eğalt'oğoy běš Hun c'eki!
2 Hayza, q'alxana ext'a,
Şuk'k'ala ǐša bist'a nu bark'ala q'alxana ext'i bez köməyə eki!
3 Xişt'ik'ə, tavara ext'i bez bač'anexun baft'it'oğoy běš c'eki,
"Va çark'est'alo Zuzu!" pi bez ük'ə arxayinba.
4 Barta bez bisuna çureğalt'oğoy niyət içoğoy boş mandi içoğoy ç̌oyen ot'p'eq'an,
Bez pisa çureğalorox biyaburbakiq'at'un qoş qaybaki.
5 Barta şorox Q'ončuğoy angeli běš
Muşen fupi taşala kološ k'inək'q'at'un baki.
6 Barta Q'ončuğoy angelen şot'oğo şəp'eğat'an
İçoğoy t'it'ala yaq' bayinq' saal fırs'ek'alq'an baki.
7 Nahaq' gala zaynak' tor laxsuna görə,
Hik'k'ali loxol zaynak' kur kašpsuna görə.
8 Barta içoğoy bel sal içan nu yaq'běğala bəlooxq'an hari,
Laxi tora içoğoy turq'an ləc'üreśi,
Kašp'i kura içanq'at'un baft'i.
9 Zuval Q'ončuğon bit'oğo ak'i mǔqbakoz,
Şot'oxun eğala çark'esuna ak'i bez ük' qayeğale!
10 "Vallarik'o tene bu!" pi bez ǔq'enxonal muz qayk'ale.
Hun zəyift'u içuxun zorbat'ay kiyexun haq'alo,
Kəsibxo q'a fağırxo içoğo fǔq'k'alt'oğoxun çark'est'alonu.
11 Əfçi şahidxone hayzeri bez ç̌oyel çure,
Bezi sal xavar nu bakala əşurxot'un bez ozane laxsa.
12 Bez bi şaat'luğa pisluğent'un coğab tast'a,
İz ǐšat'u aç̌esp'i sa amdar k'inək'zu zu.
13 Zu isə şorox azarayinşakat'an mə̌yin lapi yasez efi,
Ğurux efi busaz tarapi zu,
Şot'oğoynak' heq'ədər Buxačuğoz k'alpi!
Bez afırı coğabsuz mandat'an isə
14 Dost'eynak', viçeynak' p'i mə̌yinbakala k'inək'e bez p'i mə̌yinbaki,
Nana aç̌esp'i amdaren q'ubarbala k'inək'ez q'ubarbi zu şot'oğoynak'.
15 İsə mone, zu t'arnuzu - ama şorox mǔqt'unbaksa,
Gireśi bez pisat'un əyite.
Bezi memaçağ sal içoğoy ç̌oya nu ak'i me pist'oğo
Bez ç̌oyel çurpest'unaxun mandak' tet'un baksa.
16 Bez loxolt'un axšume me buxačuxsuzt'oğon, ak'ala pul tene bu za şot'oğoy!
Bez loxolt'un eysa şorox kašk'ala xə̌ amdari loxol eğala k'inək'.
17 Ay Q'ončux, hələ heq'ədər mot'o nu aksuna laxalnu?
Ə̌xilba za me pisluğxoxun,
Çark'est'a za me aslanxoy ǰomo bafst'axun!
18 Va bul k'os'bseynak' gireśi viçimoğoy běš zu Vi s'iya alaboz,
Camaati boş Va tərifləyinşoz.
19 Ma barta zaxun nahaq' gala düşmənçiluğbalorox mǔqbakat'un,
Ma barta za hik'k'ali loxol nifrətbalt'oğon suna himbat'un.
20 Şot'oğon ǰomo serluğ eşt'eynak' təə,
İçoğoy bula k'os'bi yəşəyinşalt'oğoy ç̌oyel əfçidən çurpseynak't'un ə̌mbsa.
21 İçoğoy ǰomo buybi
"Ak'eyan, ak'eyan, bitova beş piin ak'eyan" next'un.
22 Ay Q'ončux, Hun mot'oğo bitova anksa, şip' ma çurpa,
Zaxun ə̌xil ma baka, ay Q'ončux!
23 Hayza, bez bač'ane çurpa, ay Buxačux!
Bez əşlə Hun běğa, ay bez Q'ončux!
24 Vi düzgünluği k'ə baksuna ak'est'a, ay bez Buxačux bakala Q'ončux!
Bez taxsırsuz baksuna ç̌oyel c'evk'a,
Ma barta bez t'ar ğina ak'i mǔqbakat'un.
25 Ma barta ki, "mone, beşi çureğala k'inək'əl baneki" uk'at'un,
"İz bula kəyyan" pi mǔqbakat'un.
26 T'etər ba ki, bez pis ğina mǔqbakalorox ot'p'i biyaburbakeq'at'un,
Bez loxol alaxun oq'a běğalorox ç̌omə̌yin baki
Sal içoğoy bula alabes maq'at'un baki.
27 Barta bez düzgün baksuni ç̌oyel c'eysuna çureğalt'oğoy ük'q'an qayeśi,
"İz k'ule şaat'a çureğala Q'ončuğo alxışq'an baki" pi həmişə Vi s'iyaq'at'un alabi.
28 Vi düzgünluğa bayanboz zu,
Vi s'iya alabala əyitmux c'eğale bez ǰomoxun hər ği!