34
34-ci Ǐvel mə̌ğ
Daviden içu Avimelek'i t'ǒğǒl gije gala laxat'an şot'o t'et'iin şəp't'unsa, şoval c'eri tanesa. Davidi me hadisinəxun oşa śampi Ǐvel mə̌ğ.
1 Q'ončuğo nu şükürbala vaxt' tezax bu,
Bez ǰomoxun həmişə Şot'ay s'iya alabala əyitmuxe c'eysa.
2 Q'ončuğoxunez fərəxləyinşaksa zu,
Barta fağırxoy mot'o ibaki ük' qayeśeq'an.
3 Ekinan zaxun sagala Q'ončuğo tərifləyinşen,
Sagala Şot'ay s'iya alaben!
4 Zu Q'ončuğoz afırıpi k'alpi, Şot'inal za inebaki,
Bez pula haq'ala şeyurxoxun za çark'esedi.
5 Şot'o qə̌věğalt'oğoy ç̌oyen axšumek'on,
Ç̌omə̌yin tet'un bakon şorox.
6 Mone, me fağıren Q'ončuğo k'alpi xoyinšebi,
Şot'inal İz kula boxonedi,
Şot'o bito əzyətxoxune çark'est'i.
7 Q'ončuğo çalxalt'oğoy bač'ane Şot'ay angele çurk'on,
Şot'oğo çark'esedon.
8 Q'ončuğo ı̌šabakanan - Şot'ay heq'ədər şaat' baksuna ef piin ak'alnan,
Şot'o bač'an taradalo he bəxt'əvəre!
9 Q'ončuğo çalxanan, ay Q'ončuğoy c'ək'p'i ı̌vel azuk',
Şot'in İçu çalxalt'oğoxun hik'k'ala kamtenebon.
10 Cəyil aslanxo busa manedon,
Ama Q'ončuğo bač'an taradiyorox eht'iyəci boş tene mandon.
11 Ǐšabakanan, ay bez baloox, za ǔmǔxlaxanan,
Ekinan və̌x Q'ončuğoy laxi yaq'en taysun k'ə baksuna zombaz.
12 Ef yəşəyinşi mǔq c'ovaksuna,
Boxoy ömür c'ovakest'i şaat' ğimxo aksun çurnansasa,
13 Ef ǰomoxun pisluğen buy,
Muzna belxun böht'an bosala əyitmux maq'an c'eri.
14 Şərəxun ə̌xil baki şaat'luğ banan,
Serluğ qə̌věśi şot'o ef arane eşt'una çalışakanan.
15 Q'ončuğoy pul düzgünt'oğoy loxole bakon,
Şot'oğoy xoyinša ibakseynak' ǔmǔxsəsele bakon.
16 Pist'oğoy loxol isə Q'ončuğoy əcuğe bəc'ük'eğon,
Oç̌ali ç̌oyelxun şot'oğoy tumane əfçibon Şot'in.
17 Q'ončuğon düzgünt'oğoy xoyinša inebakon,
Şot'oğo bito əzyətxoxun çark'esedon.
18 Q'ončuğon ük' xə̌xə̌t'oğo tək tene bark'on,
Umud eğala ga nu bakalt'oğo çark'esedon.
19 Düzgünt'ay bel nu eğala əş tene mandon,
Ama Q'ončuğon şot'o bito bəloğoxun zapi c'evek'on.
20 Q'ončuğon şot'o t'etəre q'orişon ki,
Şot'ay sa ǔq'enal tene xoxbakon.
21 Şəren pist'ay axıra c'eğale,
Düzgünt'u nifrətbalt'in iz cazina zap'k'ale.
22 Q'ončuğon İz yaq'en tağalt'oğo bisunaxune zapi c'evk'on,
Şot'oğoynak'al pis q'ərar tene tadeğon.