148
148-ci Ǐvel mə̌ğ
"Q'ončuğo halalq'an baki" * upanan!
 
Barta göynul bakalt'oğonal "Q'ončuğo halalq'an baki" peq'at'un,
Barta alaxunq'an hari "Şot'o halalq'an baki" uk'alt'oğoy səs!
Ay Şot'ay bito angelxo, "halalq'an baki" upanan,
Ay Şot'ay göynul bakala bito q'oşunxo, Şot'o "halalq'an baki" upanan!
Ay běğ, ay xaş, Şot'o "halalq'an baki" upanan,
Ay s'aldala muč'uliyox, Şot'o "halalq'an baki" upanan!
Ay ala bakala göyurxoy loxol bakala göyurxo, Şot'o "halalq'an baki" upanan,
Ay t'e göyurxoy loxol bakala xeyurxo, Şot'o "halalq'an baki" upanan!
Barta mot'oğoy bitot'in "Q'ončuğo halalq'an baki" peq'at'un,
Şot'o görə ki, Şot'ay sa əyitent'un əmələ hare şorox bito.
Həmişəluğe laxi ost'aarbe Q'ončuğon şot'oğo içoğoy gala,
İçoğoynak' laxeśi nu badalbakala q'aydinent'un taysa şorox.
 
"Q'ončuğo halalq'an baki" upanan, ay oç̌ali ç̌oyel bakalorox!
Ay dənizi boş bakala kala çəliyox, ay bə̌ğə̌loyluğxo,
Ay s'ə̌q' q'a təər, ay ı̌ǰ q'a duman,
Ay Şot'ay əyiten tağala ost'aar muş,
Ay buruxmux q'a bito təpoox,
Ay bit'eśi xodurxo q'a iç c'eri kalabakala bito xodurxo,
10 Ay c'ələye iz beyne tarak'ala ə̌qnə heyvanxo q'a amdarxon c'evk'i otarişala heyvanxo,
Ay oç̌ali loxol xoreğala heyvanxo q'a göynul purk'ala q'uşurxo,
11 Ay me dünyəni padçağxo q'a bito azuk'xo,
Ay kalaluğbalxo q'a s'ila amdarxo bito,
12 Ay cəyil ğarmux q'a xuyərmux,
Q'ojoox q'a əylux,
13 "Q'ončuğo halalq'an baki" upanan bitot'in!
Şot'aynak' ki, saycə Şone bitot'uxun üst'ün bakalo,
Şot'ay kalaluği běšt'un bul k'os'bsa oç̌ali ç̌oyelal, göynuval.
14 İz azuk'a zorba biyone Şo,
İz laxi yaq'en tağalt'oğoy,
İz ük'e bask'i israilluğoy s'iya alabiyone.
 
"Q'ončuğo halalq'an baki" upanan!
* 148:1 - Miya əbrani muzin "Alleluya" əyite bu, mo Halal + Yah əyitəxune eysa, yəni halalq'an baki Yahvena.