149
149-ci Ǐvel mə̌ğ
1 "Q'ončuğo halalq'an baki" upanan!
Q'ončuğoynak' me təzə mə̌ğə̌ mə̌ğpanan,
Şot'ay laxi yaq'en tağalt'oğoy gireśi gala Şot'o tərifləyinşanan.
2 Barta israilluyox mǔqbakeq'at'un içoğo Yaratmişit'ay bit'oğo muzel eçeri,
Barta Siona bakalt'oğoy ük'q'an qayeśi içoğoy Padçaği s'iya duği.
3 Faren-əçinen alabanan Şot'ay s'iya,
Dəp-zurninen tərifbanan Şot'o.
4 İz azuk'a çureğalone Q'ončux,
İzi əyitə běğalt'oğo düşməni kiyelxun çark'est'i ěqevk'alone.
5 Barta Şot'ay laxi yaq'en tağalorox içoğoynak' bi me şaat'luğa görə mǔqbakeq'at'un,
Barta içoğoy bask'i ganuxunal Şot'ay s'iya mə̌ğpi alabeq'at'un!
6 Barta əyiti bul Buxačuğo tərifbsunq'an baki şot'oğoy,
Barta p'ə̌tərəflu ğayin q'ılınca ext'i
7 Buxačuxsuzt'oğoxun həyifə haq'eq'at'un,
T'e azuk'xo içoğoy cazina zapest'eq'at'un.
8 Barta şot'oğoy padçağxo zincirləyinşi,
Kalat'oğoval k'andallayinşeq'at'un,
9 Metər bi tadeśi q'ərara bex p'ap'esp'i bakalt'un şot'oğon.
Buxačuğoy laxi yaq'en tağalt'oğone kofst'a me əşlə biq'i metər sa hörməti q'ončux baksun.
"Q'ončuğo halalq'an baki" upanan!