147
147-ci Ǐvel mə̌ğ
1 "Q'ončuğo halalq'an baki" upanan!
Buxačuğoynak' mə̌ğpsunaxun şaat' şey tene bu!
Sa běğa tərifləyinşbsun Şot'o hetəre yarayinşbsa,
Amdarane mǔqst'a Şot'ay s'iya alabsunen.
2 Yerusalima təzədən biq'alone Q'ončux,
Buxačuxsuzt'oğoy kiyel koft'i israilluğo qoş qaydalone.
3 Ük' xə̌xə̌t'oğo ük' tadalo,
İçoğoy yaroğo ğaç̌p'i q'olaybalone Şo.
4 Muč'uliğoy sayane ava Şot'in,
S'iyene çalxsa şot'oğoy hər sunt'u.
5 Beş Q'ončux kalane,
İz kiyexun nu ayeğala əş tene bu Şot'ay,
Beyne p'aq'est'ala şey tene Şot'ay avabakalorox.
6 Fağırxo ěqevk'alo,
Pist'oğo isə saki ç̌axç̌uxk'alone Q'ončux.
7 Mə̌ğur mə̌ğpi şükürbanan Q'ončuğo,
Arfa farpi tərifləyinşanan beş Buxačuğo!
8 Göynul asoyxo girbi oç̌ali loxol ağala śik'alo,
Buruxmoğo o göyünbalone Şo.
9 Ə̌qnə heyvanxoy yema p'ap'esp'alo,
Q'uzğuni busabaki baloğoy ǰomo girbalone Şo.
10 Nə iz ěk bəyic' bakalo,
Nəəl iç yeyin bakalo tene Buxačuğoy piyes şaat' ak'eğalo.
11 İzi laxi yaq'en tağalorox,
Saycə Şot'ay nu badalbakala çuresuna umudbakaloroxe Buxačuğoy piyes şaat' ak'eğon.
12 Ay Yerusalim, Q'ončuğoy s'iya alaba!
Ay Sion, vi Buxačuğo tərifləyinşa!
13 Vi darvazoğo ost'aarbi va q'orişalo,
Vi camaata xeyir-bərəkət tadalone Şo.
14 Şip'luğe eçon Şot'in me Vi oç̌ali amdarxoynak',
Şot'oğoy pulane boşevk'on ambarxo bakala ən şaat' taxılen.
15 Oç̌ala əmirbsun q'a
Şot'ay əyiti taśi p'ap'sun sane baksa.
16 Ǐǰene but'k'on Şot'in oç̌ali ç̌oya ləyifen but'k'ala k'inək',
K'ə̌ne hari arśon oq'a jeq'a muşadat'an taśi arśala k'inək'.
17 Təəre hari baron alaxun ǰě barala k'inək',
Şuva portp'on Şot'ay yaq'abala me çaxluğa?
18 Sa əyitene xebi śik'on Şot'in me buzurxo,
İzi ǰomoxun c'eğala nəfəsene qaydi xena c'urevk'on şot'oğo.
19 İzi əyitəne pi Şot'in İak'ovaxun baki nəsilə,
İzi k'anunxo q'a əmirxone p'ap'esp'i israilluğo.
20 Q'erəz mani milləteynak'e bey mot'oğo?
Sal xavar tene bu şot'oğoy Buxačuğoy k'anunxoxun!
"Q'ončuğo halalq'an baki" upanan!