146
146-ci Ǐvel mə̌ğ
1 "Q'ončuğo halalq'an baki" upanan!
Ay bez elmux, "Q'ončuğo halalq'an baki" upa!
2 Bez ömüri axıral śirik' Q'ončuğo alxışp'oz,
Heq'ədər ki buzu, bez Buxačuğo mə̌ğpi tərifləyinşoz zu!
3 Kalaluğbalxo umudmabakanan,
Şot'o görə ki, şoroxal insant'un,
Və̌x çark'est'un isə insani kiyexun ayeğala əş tene.
4 İz elmux iz boşt'an c'erit'uxun oşa k'ula gərbaki tağala insani,
İz boş bakala niyətxoval içuxun sagala oç̌alin oq'a tağala insani əş tene mo.
5 İak'ovi Buxačuğon iz kiyexun biq'alo,
İz Buxačux bakala Q'ončuğo bač'an taradalo he bəxt'əvəre!
6 Göyurxo q'a oç̌ala yaratmişiyo,
Dənizə q'a dənizi boş bakalt'oğo yaratmişiyone Q'ončux,
İz tadi əyiti loxol çurk'alone Şo.
7 Fağırxoy taxsırsuz baksuna ç̌oyel c'evk'alo,
Busat'oğo boşevk'alo,
Biq'eśit'oğo çark'est'alone Q'ončux.
8 K'ač'it'oğoy piyel işiğ eçala Q'ončux,
Bitit'u kul biq'i alabala Q'ončux,
İzi laxi yaq'en tağalt'u çureğala Q'ončuxe Şo.
9 Q'əribluğ zap'k'alt'oğo q'orişalone Q'ončux,
Yetimxoy q'a süpür çupuxxoy bač'ane çurk'alone,
Pist'ay tağala yaq'ane azdırişon Şot'in.
10 Həmişəluğ padçağluğbale Q'ončuğon, ay Sion,
Nəsilxoval hari badalbakayin, vi Buxačux İz taxt'e loxol bakale.
"Q'ončuğo halalq'an baki" upanan!