112
112-ci Ǐvel mə̌ğ
1 Q'ončuğo halalq'an baki!
Q'ončuğoy laxi yaq'en tağalo,
Şot'ay bürüşit'oğo bex p'ap'espsunaxun mǔqbakalo he bəxt'əvəre!
2 İçoğoy ganu ost'aarbalt'un şot'oxun bakit'oğon me oç̌ala,
Düzgün bakalt'ay nəsiləxun xeyir-bərəkət kamtenebakal.
3 Bolluğ bakale şot'ay k'oya, var-dövlət iz belxun barale,
İz düzgünluği əvəzə aksun həmişəluğ bakale şot'aynak'.
4 Lap bayinq'unal işiğe biton düzgün bakalt'ay loxol,
Ük' bok'al, gorox eğal, noxsansuz bakalt'ay loxole biton t'e işiğ.
5 Xeyirxax baki t'iyə̌mint'u iz kul qay baksuna görə borc tadalt'in,
Düzgünluği tərəf bakalt'in şaat' ği ak'ale.
6 Əfçitene, iz tur ǰěna tene laft'on metərt'ay sal sa vədine,
Amdarxoy eyexe bakon düzgün bakalo həmişə.
7 Satenekon şot'o pis xavaren,
İz ük'ə buz k'inək'e efsa, axıri Q'ončuğone umudbaksa şo.
8 Arxayine şot'ay ük', q'ı̌ hik'ə avatene,
İz düşmənxoy bist'una ak'ale şot'in.
9 Kulqaye baki şo, iz dövlətəxun ük'ine cöybi kəsibxo paybi,
Həmişəluğe şot'ost'a bakala düzgünluğ,
Ěqeğale şo, hörməti q'ončux bakale.
10 Pist'ayal boşt'ane bok'on şaat't'ay loxol běği mot'oğo ak'at'an,
Paxılluğene biq'on şot'ay, için içune ukon,
Bex tene c'eğon pist'oğoy çureğalo.