111
111-ci Ǐvel mə̌ğ
1 "Q'ončuğo halalq'an baki" upanan!
Ük'enez Q'ončuğo şükürbsa zu;
Düzgünt'oğoy topbaki gala,
Şot'o bul k'os'bseynak' gireśit'oğoy běšez şükürbsa.
2 Kala əşure Q'ončuğoy biq'ala əşur,
Sa dərse şorox t'e əşur içoğoy ük'ində bakalt'oğoynak'.
3 Şot'ay kalaluğa q'a bitot'uxun üst'ün baksunane ak'est'a t'e əşurxon,
Həmişəluğe Şot'ost'a bakala düzgünluğ.
4 Amdarxoy eyexun nu c'eğala, şuk'k'ali kiyexun nu ayeğala əşure Şot'ay biq'i əşur,
Ük' bok'al, xeyirxax bakalone Q'ončux.
5 Busa tene efon Şot'in İçu çalxalt'oğo,
Ğaç̌eśi irəziluğa həmişəne əməlbon.
6 Azuk'a İzi k'ə bes baksuna ak'est'i
Q'erəz millətxoy oç̌alxone tadi şot'oğo.
7 Şuk'k'ala qı̌ yaq'a nu efsun,
Bitot'ay loxol sa piin běğsune Şot'ay əş,
Bač'an tarades bakala nəsyətxone Şot'ay tadala nəsyətxo.
8 Həmişəluğe İz peçata laxe Şot'in İz ǰomoxun c'evk'it'oğoy loxol,
İzi tadi əyitmoğoy loxol çurk'alone Şo,
Düzgünluğene šareśe t'e əyitmoğoy boq'oy!
9 Çark'esune q'ısmatbi Şot'in İz azuk'a,
İrəziluğa həmişəluğe ğaç̌eśi şot'oğoxun.
Ǐvel bakalo, İz s'iya duğat'an yax q'ı̌yen haq'alone Şo.
10 Q'ončuğo çalxsunene burqesa müdrikluğ,
Şot'ay bürüşit'oğo əməlbalt'oğon taşevtenek'on.
Şot'o həmişəluğ alxışq'an baki!