109
109-ci Ǐvel mə̌ğ
Fark'alxoy dəst'in kalat'aynak'. Davidi Ǐvel mə̌ğ.
1 Ay bezi tərifləyinşala Buxačux,
Şip' ma çurpa!
2 Běğa hetərt'un pist'oğon q'a şər bakalt'oğon za içoğoy ǰomo eğalt'u nex,
Hetərt'un içoğoy əfçiğo bez loxol əşp'est'a.
3 Nifrəten buy əyitmuxe bezi hərrəminə biq'est'it'oğoxun ibakalo,
Hik'k'ali loxolt'un bez loxol eysa şorox.
4 Bezi içoğo çuresuni əvəzə za nifrətbsunent'un qayst'a şot'oğon,
Zu isə afırıpsunaxun qoş tez çure.
5 Bezi bi şaat'luğa pisluğbsunen,
Çuresunal nifrətbsunent'un coğab tast'a.
6 Barta iz ük' pisluğen buy bakalt'ay kiyelq'an běği bezi düşmənen,
Barta iz tərəf bakalt'in c'eri taxsırkərq'an c'evk'i şot'o.
7 Barta şot'o divanbi q'ərar tadeğat'an
İzi c'eri xoyinšpsunal günaxq'an hesabbaki.
8 Barta ömürq'an gödəybaki şot'ay,
İzi ganuval t'iyə̌minoq'an hari arśi.
9 Barta şot'ay əylux yetimq'at'un mandi,
İz çuuxal işq'arsuz.
10 Barta şot'ay əylux içoğoy xaraboğoxun ə̌xil biti
Dilənçiluğbalaq'at'un baki.
11 Barta faizen təngə tadit'in hari iz kiyexun bitova haq'eq'an,
Barta iz əşp'i girbiyorox q'erəzt'oğoq'an mandi.
12 Barta şot'aynak' şuk'k'ali ük' maq'an bok'i,
İz yetimxo şuk'k'alen gorox maq'an hari.
13 Barta şot'ay nəsilq'an əfçibaki tumexun,
S'iq'an batk'i şot'oğoy.
14 Barta Q'ončuğon şot'ay bavoğon bit'oğo cazasuz maq'an efi,
İz nanay əşp'est'i günaxxoval eyexun maq'an c'evk'i.
15 Barta Q'ončuğon şot'oğoy əşp'est'i günaxxo maq'an bağışlayinşi,
Şot'oğoy s'iyaq'an əfçibi oç̌ali ç̌oyexun.
16 Şot'o görə ki, şaat'luğbsuni k'ə baksuna tene avabake me pis bakalt'in,
Kəsibə q'a fağıra koruğ tast'un,
Bitit'u samalal lik't'i saksune bake şot'ay əş.
17 Q'arğiş śipsune şot'ay çureğalo,
Şoval iz piyorox bito hari iz ǒyne barale!
Xeyir-bərəkət tast'un tene ava şot'in,
Ama içal xeyir-bərəkətsuz mandale!
18 Q'arğişene nəfəs haq'say şot'in,
İsə barta ǔği xe bədəne tağala k'inək'q'an taśi t'e q'arğişxo iz bədəne,
Barta iz ǔq'ene baśi t'iyani mə̌yaq'an gərbaki.
19 Barta iz loxol taradala paltarq'an baki şo içeynak',
Barta şo iz bı̌yex ğaç̌k'ala q'ayinşq'an baki.
20 Q'ončuğon bez pisə çureğalt'oğoy,
Zaynak' düşmən bakalt'oğoy cazina metərq'an zapest'i barta!
21 Za isə Vi s'iya görə çark'est'a, ay bitot'uxun üst'ün bakala Q'ončux Buxačux,
Ak'est'a Vi şaat'luği q'a nu badalbakala çuresuni k'ə baksuna!
22 Gorox, fağır sa amdarzu zu,
Xə̌xə̌ne bez ük'.
23 Běğ batk'at'an əfçibaki tağala xoji k'inək' əfçizbaksa zu,
Sa çərtk'ənə śap't'i t'ǒǒx bosala k'inək' bot'unst'a za.
24 Turexunez bist'a zu ğurux efsunaxun,
Sa t'ol, sa ǔq'ene mande bezi.
25 Axšumi gaz bake bez düşmənxoynak',
K'əşinen ak'est'it'un axšume bez loxol şot'oğon.
26 Eki p'ap'a bez t'arnu, ay bez Buxačux bakala Q'ončux,
Vi nu badalbakala çuresuni k'ə baksuna ak'est'i çark'est'a za.
27 Barta me əşləst'a Vi kul baksuna,
Mot'o Vi bsuna q'amişakeq'at'un.
28 Bez loxol q'arğiş śik'alt'oğoy coğaba zaxun Vi xeyir-bərəkətə nu kambsunen tada,
Bez loxol ěqeśit'oğo ç̌omə̌yin ba,
Barta me Vi k'ul mǔqbakeq'an!
29 Barta bez loxol şər bosalorox ç̌omə̌yinluğenq'at'un bəc'üreśi tarapi,
Barta biyarburçiluğa içoğoy loxol paltar taradala k'inək'q'at'un taradi.
30 Zu isə həmişə Q'ončuğo şükürboz,
Şot'ay s'iya alaboz zu Şot'o bul k'os'bsa gireśit'oğoy běš.
31 Fağıri bač'ane çurk'alone Şo,
Şot'o şər bosalt'ay ç̌oyel çurpsunaxun çark'est'alone!