108
108-ci Ǐvel mə̌ğ
(Ǐvel mə̌ğ. 57:7-11; 60:5-12)
Davidi Ǐvel mə̌ğ.
1 Vaxun arxayinzu, ay Buxačux!
Vaynak' ı̌vel mə̌ğur mə̌ğpi Vi s'iya alabsune çuresa bez ük'en!
2 Mone, běğ çərtk'amin hayzoz zu,
Arfa q'a tər farpi mə̌ğk'oz!
3 Bito azuk'xo Va çalxest'i Vi s'iya alaboz, ay Q'ončux,
Bito millətxoy boş Va tərifləyinşoz!
4 Şot'o görə ki, Vi nu badalbakala çuresun q'a bez bač'ane çurpsun t'emane ki,
Göynul p'ap'i asoyxoxunal c'ovanek'sa.
5 Barta Vi kalaluğ ala bakala göyurxoxunal c'ovaki ak'eśeq'an,
Barta dirist' oç̌ali ç̌oyel Vi s'iq'an t'ap'eśi, ay Buxačux!
6 Vi ük'e bask'it'oğoy Va k'alpsuna ibaki çark'est'a şot'oğo!
Barta Vi yön kul beş loxolq'an baki, efa yax!
7 Axıri Buxačuğon İz bakala ı̌vel gala metəre pey:
"Bez kiyel badi Şekem şəhəri oç̌alxo və̌x payboz,
Suk'k'ot' uk'ala ganu Bez azuk'i arane cöyboz.
8 Gileadi q'a Menaşşeni oç̌alxoval Bezine!
Efraima arśiz kalaluğbsa,
İudeyinaz laxe Bez taxt'a Zu!
9 Moava Bez tur os'k'ala ləənez be,
Edomi loxol torok'al bosala ext'iyərzax bu Bezi.
Mone, filist'luğoy oç̌alaxune c'eysa Bez səs!"
10 P'oy isə şiin taşale yax t'e q'alala şəhəri loxol?
Şu güvəyinşaki tağalyan Edoma exst'a?
11 Buxačuğon yaxun İz ç̌oya taradit'uxun oşa,
Beş q'oşun davina c'eğat'an Şo yaxun nu bakit'uxun oşa mümkün tene mo!
12 Düşmənxo beş turin oq'a laxsuna köməyba yax, ay Buxačux,
Axıri Hun nu bakala gala insanen hik'k'al bes tene bakon!
13 Buxačuxe yax bitot'uxun zorba balo,
Şone düşmənxo beş turin oq'a saki ç̌axç̌uxp'est'alo!