105
105-ci Ǐvel mə̌ğ
(1 Hadis. 16:8-22)
1 Q'ončuğo alxışp'anan, Şot'ay s'iya duği afırıpanan,
Bayanbanan azuk'xo Şot'ay biq'i əşurxo!
2 Mə̌ğpanan, mə̌ğen tərifləyinşanan Şot'o,
Exlətp'anan bitot'aynak' Şot'ay biq'i nu ak'eśi əşurxoxun!
3 Ak'est'anan bitot'u ı̌vel Buxačuğoy şuxun baksuna,
Barta Q'ončuğo qə̌věğalt'ay ük'q'an qayeśi!
4 Q'ončuğost'a ak'anan efi zora,
Şot'o ı̌šabakanan!
5 Şot'ay kiyexun ayeğalt'oğo, Şot'ay biq'i nu ak'eśi əşurxo ef eyex efanan,
Eyexun ma c'evk'anan Şot'ay beşi düşmənxoynak' c'evk'i q'ərarxo,
6 Ay Şot'ay k'ul bakala Avrahamaxun baki nəsil,
Ay İak'ovaxun baki Şot'ay c'ək'eśiyorox!
7 Şone beş Buxačux bakala Q'ončux,
Dirist' dünyəneynak' q'ərar c'evk'alone Şo.
8 Həmişəluğe Şot'ay ğaç̌eśi irəziluğ,
Hazarxon nəsilxoval hari badalbakayin
İz tadi əyiti loxol çurk'alone Şo.
9 Avrahamaxun ğaç̌eśi irəziluğa,
İsaak'a elasp'i tadi əyitə eyexun c'evtenekon Şot'in.
10 Laxeśi sa q'aydane baki mo İak'oveynak',
Həmişəluğ irəziluğe baki israilluğoynak'
11 Şot'o "vaz tast'a Kənan oç̌ala" uk'at'an,
"Vaxun bakit'oğo mandale me ga" pi əyit tadat'an.
12 Şot'oğoy me oç̌ala malluğ bakala vədə,
Miya q'ərib k'inək' yəşəyinşala vədəl bakene.
13 Sa ği sa azuk'i, t'e soğo ği t'iyə̌mi azuk'i t'ǒğǒlt'un içoğoynak' mesbsay,
Sa padçağluği oç̌alaxun t'e soğo padçağluği oç̌alat'un köçk'ala baksay.
14 Ama hat'e vədəl Q'ončuğon şot'oğo incit'mişbsa tene barey,
Şot'oğoy tərəfe baksay, padçağxoy cazina tadi
15 "Bez c'ək'p'it'oğo ma laft'anan,
Bezi əyitmoğo p'ap'esp'ala xavareçalxo pisluğ ma banan" nexey.
16 Busaluğe yaq'abi Şot'in Kənan oç̌ala,
T'etəre bi ki, šum tet'un bə̌ğə̌bsay ukseynak'.
17 Ama İz azuk'a çark'est'ala amdara yaq'abeney saturběš Şot'in:
K'ul k'inək' toyeśi İosifey t'e amdar.
18 İz turmux zinciren ğaç̌eśi,
İz ozane dəmiri halq'a lavk'eśi İosif.
19 Mone, hariyal bexe c'eri İosifi saturběš ak'i piyorox bito,
Q'ončuğon şot'o xaxalaxun c'ovakest'unene eçeri t'e ğina p'ap'esp'i.
20 Şadt'unbi şot'o padçaği əmiren,
Tərebi şot'o türminəxun azuk'xoy kalat'in.
21 Şot'o eçeri iz sarayi kalone laxi,
İzi k'ə buneysa şot'one tapşurbi.
22 Ölkin əşurxo taşaloroxe şot'ay əyiten taysay,
Ağsaq'q'alxone müdrikluği dərs tast'ay şot'in.
23 T'e vədə İsrail hayzeri Misirəne hari,
İak'oven Xame oç̌alane içeynak' mesbi sa q'ərib k'inək' yəşəyinşala baki.
24 Buxačuğonal İz azuk'i saya avuzbi
Şot'oğo içoğoy düşmənxoxun zorbane bi.
25 T'etəre bi ki, nifrətbsat'un burqi t'e düşmənxon İz azuk'a,
Pisluğbsunt'un çuresay şot'oğon İz k'ulurxo .
26 Ama Buxačuğon İz k'ul bakala Moiseya q'a
İz c'ək'p'iyo bakala Aaronane yaq'abi şot'oğoynak'.
27 Nu ak'eśi əşurt'un ak'est'i şot'oğon t'e ölkin amdarxo,
Buxačuğon alaxun tadi nišanxot'un ak'i Xame oç̌ala bakalt'oğon.
28 Bayinq'luğe yaq'abi Şot'in,
Zülmətene haq'i t'e ölkinə,
İz əyitə nu běğalt'oğoynak' sa xavardarluğe baki morox bito.
29 Misirə bakala xeyurxone p'iya taradi Şot'in,
T'iya bakala çəliyoxal k'as'eśi baredi.
30 Bědalaq'xone haq'layinşi şot'oğoy oç̌ala,
Lap padçaği sarayat'un taśi baysay şorox.
31 T'at'urxone haq'i t'e ölkinə Şot'ay sa əyiten,
Mos'ak'xone hari buybaki t'e oç̌ala.
32 Təəre yaq'abi şot'oğoy loxol Buxačuğon ağalin gala,
Bok'osp'i śik'ala s'ə̌q'ene duğsay t'e ölkin loxol.
33 T'api əfçinebi şot'oğoy t'ulluğxo q'a incilnə xodurxo t'e təəren,
Ölkinə bakala bito xodurxone xoxp'i śipi.
34 Çərtk'ənxone hari lavabaki Şot'ay əmiren,
T'eq'ədərt'uniy ki, veçət'un duğsay şot'oğon t'e oç̌ala.
35 Kəyt'un şot'oğon oç̌ali loxol göyün k'ə buneysa bitova,
Bit'eśi oç̌alxo c'erit'oğoval ašamt'unpi.
36 Oşa bisune hari t'e ölkinə bakala k'ojin kala ğarmoğoy bitot'aynak',
Nanay tapanexun c'eri çuresa insani,
Çuresa heyvani süft'in ərkəy baloğoy sayco tene mandi Misirə!
37 Metərluğen c'evek'i Şot'in israilluğo t'et'iin,
İçoğoy kul q'ızılen q'a gümüşen buyt'un c'eri şorox,
Tayfoğoy boşt'an saycət'ay muxal tene k'oribaki.
38 Mǔqt'uniy misirluyox şot'oğoy c'eysuna,
T'etər sa q'ı̌yene haq'ey içoğo israilluğoy běš.
39 Asoyen but'k'i q'orişebi şot'oğo Buxačuğon,
Üşe içoğo yaq' ak'est'ala aruxe yaq'abi.
40 Azuk'en içuxun yeq' çureğat'an bildirçinxone yaq'abi şot'oğoynak',
Göynuxun śipi šumene uk'est'i boşevk'i şot'oğo.
41 Q'ayana qı̌bi xene c'evk'i t'et'iin Şot'in,
Oq k'inək' şağapi taneśi t'e xe q'ari oç̌ali loxolxun.
42 Şot'o görə ki, eyexey Şot'ay İzi ğaç̌eśi irəziluğ,
İz k'ul Avrahama tadi əyiti loxol çureney Şo.
43 İz ç̌oyen axšumk'ane c'eri Şot'ay azuk',
Mə̌ğt'unney mǔqexun Şot'in İz c'ək'p'it'oğo c'evk'at'an.
44 Q'erəz azuk'xoy oç̌alxone tadi şot'oğo Buxačuğon,
Q'erəzt'oğoy ap' śipi becərişi oç̌ali barat'un kəyi şot'oğon.
45 Şot'oğoy İz laxi q'aydoğon tayseynak',
İz k'anunxo əməlbseynak'e bi mot'oğo bitova.
Q'ončuğo halalq'an baki!