104
104-ci Ǐvel mə̌ğ
1 Ay bez elmux, Q'ončuğo alxışp'a!
Ay bez Buxačux bakala Q'ončux, Hun heq'ədər kalanu,
Şuk'k'alast'a nu bakala tamtarağe Vi sa padçağ baksuna ak'est'alo!
2 İşiğa Vi loxol paltar taradala k'inək' taradalonu Hun,
Göyurxo sa pərdə k'inək' qaypi
3 Şot'oxun Vaynak' xeyurxoy loxol çadır zapiyonu.
Asoyxo Vi arabina taşala ěkurxo,
Muşa Va iz q'ənədi loxol taşala sa q'uş biyonu Hun!
4 Muş Vi əyiten tağala k'inək'e taysa angelxo Vi əyiten,
Q'ulluğçiğo bok'ala aruxen bsa Hun.
5 Oç̌ali binorina laxi ost'aarbiyonu Hun,
İz ganuxun galtenek'on şo sal sa vədə!
6 Bə̌ğə̌loy xeyurxonen bəc'ürpi Hun şot'o,
Buruxmoğoy bulane but'ksay t'e xenen.
7 Ama zap'eśi şorox ük'e q'ı̌ badala Vi harayaxun,
Tat'unśi gurultinen eğala Vi səsə ibaki.
8 Buruxmoğoy döşen taśi dərənet'un bari,
Vi içoğoynak' laxi gala gireśi çurt'unpi.
9 Bandenbi Hun şot'oğoy běšt'an,
Posp'i ç̌axtenek'on oç̌ala ene t'e xenen.
10 Arxen taşeri dərənen bane Hun xeyurxo,
Buruxmoğoy aranexunt'un c'ovaki taysa şorox.
11 Çöle bakala heyvanxont'un ǔğsa me xenaxun,
Ə̌qnə elemxont'un içoğoy xenezaluğa bost'a.
12 Q'uşurxon mest'un biq'sa t'e xene t'ǒğǒl bakala xodurxoy loxol,
Mə̌ğt'unne şot'ay taymoğoy loxol arśi.
13 Buruxmoğon xelayinşbsa Hun Vaynak' göynul laxi çadıraxun,
Vi kiin yaq'abi ağalina q'uc'p'ine boşt'a oç̌al.
14 Oya heyvanxoynak',
Göyünal amdarxoynak'en kalabsa ki,
Əşp'i içoğoy ukunaq'at'un oç̌alaxun ext'i:
15 İçoğoy ük' qayeseynak' bakala fina,
Ç̌oya s'aldest'ala c'əyinə,
Elmoğo ost'aarbala šuma.
16 Mone, xe duğeśene Q'ončuğon bit'i xodurxo,
Livana bakala t'e kala xodurxo.
17 Q'uşurxon mest'un biq'sa t'e xodurxoy loxol,
Hacıləlləyxone mesbsa şame xodurxoy loxol.
18 Çölnə keçiğoynak' alloy buruxmux,
Buruğoy mělurxoynak'al q'ayoxe k'oj bake.
19 Xaşurxo hari badalbaksuna ak'est'ala xaşan yaratmişi Hun,
Běğal Vi ak'est'i galane taśi batksa.
20 Üşe bakseynak',
Çölnə heyvanxoy c'irap'eśi c'eyseynak'en zapi taşt'a Hun t'e běğa.
21 Cəyil aslanxone ğırıpsun ǒxə̌lə c'eysa,
Buxačuğoy kiyelt'un běğsa şot'oğon içoğoy ukuneynak'.
22 Běğ c'eğat'an isə zap't'unsa şorox,
Taśi içoğoy kurnu baśi bast'unksa.
23 T'e vədə amdari c'eri iz əşlə biq'ala vədəne eysa,
Bayinq' bakaminal ap'e śine şot'in.
24 Ay Q'ončux, mo heq'ədər şeyen yaratmişe Hun!
Vi müdrikluğenen bex c'evk'e mot'oğo bitova,
Běğa hetərt'un oç̌ali ç̌oya buybe elmoğo içoğoy boş Hun fupi bapit'oğon!
25 Me kala, bə̌ğə̌loy dənizə běğa!
T'e xene boş bakalt'oğoy saya bǒq'ə̌lpi çark'ala şey tene,
J̌alene t'iya kala-mis'ik' heyvanxon!
26 Gəmiyoxe taysa t'e dənizi loxolxun,
Bitot'ay pula haq'i p'ə̌bulla dizik'ene Vi fark'ala havinen əçine t'e bə̌ğə̌loyluğxoy boş.
27 Mot'oğoy bitot'in Vi kiyele běğsa,
Hunen şot'oğoy yema iz vədine p'ap'espsa.
28 Yemen śine şot'oğoy běš, şot'oğonal girt'unbsa,
Vi kul qayluğent'un içoğoy tapana boşevksa.
29 İçoğoxun Vi ç̌oya taradat'an isə vəlvəlinət'un bafst'a,
P'uri taśi k'ulat'un gərbaksa Hun içoğoy nəfəsə bot'at'an.
30 Şot'oğoy boş elmux fupi nanaxun bakest'aloval Hunnu,
Metərluğenal, p'uri taśit'oğoy gala təzət'oğo elmux tast'unen me dünyənə təzələyinşalonu.
31 Barta Q'ončuğoy s'i həmişə t'ap'eśeq'an,
Barta Q'ončuğon İz yaratmişit'oğo ak'i mǔqbakeq'an!
32 Oç̌ale iz ganuxun gale Şot'in běğat'an,
Buruğoy bule küünəxbaksa Şot'in İz kula duğat'an.
33 Bez ömüri axıral śirik' Q'ončuğoy s'iya alaboz,
Heq'ədər ki buzu, bez Buxačuğo mə̌ğpi tərifləyinşoz zu.
34 Çurezsa ki, bez ǰomoxun c'eğalorox Şot'ay ük'elq'an bask'i,
Q'ončuğost'az aksa bezi mǔqluğa zu!
35 Barta günaxkərxoy tumq'an əfçibaki,
Barta oç̌ali ç̌oye sa dənə pis amdar maq'an mandi!
Ay bez elmux, Q'ončuğoy s'iya alaba,
"Q'ončuğo halalq'an baki" upa!