103
103-ci Ǐvel mə̌ğ
Davidi Ǐvel mə̌ğ
1 Ay bez elmux, Q'ončuğo alxışp'a!
Ay bez ük', Şot'ay ı̌vel s'iya alxışp'a!
2 Q'ončuğo alxışp'a, ay bez elmux,
Şot'ay biq'i şaat' əşurxo eyexun ma c'evk'a!
3 Vi bütüm günaxxone bağışlayinşbsa Şot'in,
Vi bütüm azarxone q'olaybsa.
4 Vi elmoğo bisunaxune çark'est'a Şot'in,
İzi nu badalbakala çuresunen q'a ük' bok'ospsunen va xeyir-bərəkəte tast'a!
5 Şot'ay xeyirxax baksunene va şaat' efsa,
Hunal cəyil q'irği k'inək' təzədən zorban baksa!
6 Düzgün bakalone Q'ončux,
Fağırxoy tərəfəne efsa Şot'in.
7 İzi çureğalo k'ə baksunane avabakest'i Şot'in Moiseya,
İsrailluğoynak' nu ak'eśi əşurxone biq'i.
8 Ük' bok'osp'al, xeyirxax bakalone Q'ončux,
Şo usum nu posk'al, İz ük' nu badalbakala çuresunen buy bakalone.
9 Nu çaxeğala əcuğ tene Şot'ay əcuğ,
Yax taxsırkər c'evksun tene Şot'ay çureğalo.
10 Nu aksunane laxsa beş taxsırxo Şot'in,
Yax haq'q' gala tadeśes bakala cazina suuk'ebsa.
11 Göy oç̌alaxun heq'ədər alloyesa,
Şot'ay İz yaq'en tağalt'oğo bakala çuresunal hat'eq'ədəre.
12 Běğ batk'ala tərəf běğc'eğala tərəfəxun heq'ədər ə̌xilesa,
Şot'ay yaxun beşi günaxxo ə̌xilbsunal hat'eq'ədəre.
13 Bavan iz əyloğo çureğala k'inək'e çuresa Q'ončuğon İz yaq'en tağalt'oğo.
14 Avane Şot'in het'uxunyan haq'eśe yan,
Beşi haq'eśi t'e tozaxun avuzin nu baksuna avane Şot'in.
15 İnsani ömüren heq'ədəre zap'e ki güvə?
Sa göyün oye ömürəxun avuzin tene şo,
Q'oruğa bakala varde ömüren s'is'ik' qayk'amin zap'k'ala k'inək':
16 İz loxolxun muş c'ovakala k'inək' fupi taneşon şot'o,
Sal iz irizəl tene mandon.
17-18 Ak'esest'a Q'ončuğon İçu çalxalt'oğo İzi nu badalbakala çuresuni k'ə baksuna,
Dünyə yaranmişakit'uxun mağay mo metəre bake,
Meyin oşal həmişə hametər bakale.
İçuxun ğaç̌eśi irəziluğa əməlbalt'oğoy,
İz laxi k'anunen tağalt'oğoy nəsiləxun İzi düzgünluğa kamtenebsa Şot'in.
19 Göynule laxe Q'ončuğon İz taxt'a,
Dirist' dünyəni loxole kalaluğbsa Şot'in.
20 Alxışp'anan Q'ončuğo, ay göynul İz bel gireśiyorox,
Ay Şot'ay q'ulluğa çurpi İz uk'alt'oğo bex p'ap'esp'ala angelxo!
21 Alxışp'anan Q'ončuğo, ay Şot'ay göynul bakala q'oşun,
Ay Şot'ay əyitə běğala əsk'ər bakalorox!
22 Ay Şot'ay kiin oq'a bakala dünyəne bakalorox,
Ay Şot'ay kiyexun c'eriyorox bito, alxışp'anan Q'ončuğo!
Ay bez elmux, Q'ončuğo alxışp'a!