102
102-Ǐvel mə̌ğ
Sa fağıri Q'ončuğoy běš iz ük'ə ams'ibat'an bi afırı.
1 Ay Q'ončux, bez afırına ibaka,
Bezi Va köməyə k'alpsuna nu ibaksuna ma laxa.
2 Ç̌o ma tarada zaxun bez t'ar ğine,
İbaka za Va k'alk'at'an, eki p'ap'a!
3 Sa k'üün zap'eśi tağala k'inək'e taysa bez ğimxo,
Bok'ala s'ile bake bez ǔq'enxo.
4 Q'aribaki o k'inək'zu zu,
T'etərzu ki, sal šum tene c'ovaksa bez q'oq'exun.
5 Q'ač'ez zap'e zu,
Sa t'ol sa ǔq'ene mande bezi.
6 Tək mandezu zu bayğuş k'inək',
Xarabina mandi k'oya içeynak' mesbi sa s'ı̌lğit' k'inək'zu zu.
7 Nep' tene eysa bez piye,
Təkzu zu, k'ojin bel arśi tək sa q'uş k'inək'.
8 İçoğoy ǰomo eğalt'u next'un za bez düşmənxon,
İçoğoy ği za lağa haq'i bezi loxol axšumpsunene c'ovaksa,
Şunesa q'arğişbat'anal bez s'iya duğit'un q'arğişbsa.
9-10 T'ǒǒxenbi Hun za, ə̌xilenbi za Vaxun,
Vi əcuğoy k'ə baksuna ak'esendi.
İsə mone, yasaxun tez c'eysa zu,
Bez piin neğaz q'uc'k'ala baksa.
11 Běğ batksunen c'ovaki tağala sa xoji k'inək'e taysa bez ğimxo,
Q'arizbaksa zu o q'aribakala k'inək'.
12 Ama Vi taxt' həmişəluğe laxeśe, ay Q'ončux,
Nəsilxoval hari badalbakayin, Vi s'ine t'ap'esa.
13 Mone, vaxt' hari p'ap'ene!
Ak'est'alnu Hun Siona Vi ük' bok'ospsuna,
Avabakale şot'in Vi ük'el basksuni k'ə baksuna.
14 Şot'ay ǰěyurxoval muč'ane Vi k'ulurxoynak',
Şot'oxun mandi t'e tozal qə̌vt'unsa şot'oğon.
15 Ak'alt'un azuk'xon Q'ončuğoy şu baksuna,
Avabakalt'un me dünyəni padçağxon Vast'a bakala zore k'ə baksuna.
16 Şot'o görə ki, təzədən biq'ale Q'ončuğon Siona,
Ak'est'ale İz kalaluği k'ə baksuna.
17 İbakale Şot'in iz k'oj-mesaxun bakit'oğoy afırına,
Şot'oğoy xoyinša nu ibaksuna tene laxal.
18 Barta oşin eğala nəsilxoynak' śameśeq'an ki,
Hələ nanaxun nu bakit'oğonal metər piq'at'un Q'ončuğoy s'iya alabi:
19 "Běneği Q'ončuğon alaxun oq'a oç̌ali loxol,
Anek'i Şot'in İz ı̌vel ganuxun.
20 Düşməni kiyel baft'it'oğoy ǒnena ibaki
Çark'esedi Şot'in bisuna tağalt'oğo".
21-22 Bayanbakale t'e vədə Q'ončuğoy s'i Sion buruğoy bel,
Mə̌ğpi tərifləyinşalt'un Şot'o
Yerusalima bul k'os'bseynak' gireśi azuk'xon q'a padçağluğxon.
23 Cəyilcə q'ojanebi Şot'in za,
Bez ömürəne gödəybi.
24 Metərez pi zuval: «Ay Buxačux, bezi yəşəyinşi ən şaat' vədine bez elmoğo ma haq'a,
Həmişə dirist' bakala Buxačuxnu Hun!
25 Hələ burqesunast'a oç̌ali binorina laxiyonu Hun,
Göyurxoval Vi kiyexun c'eri əşe.
26 Ama lap şoroxal əfçibaki tağayt'un,
Hun əfçitenbakon.
Şot'oğo bisibaki sa paltar k'inək' c'evk'i badalenbon,
27 Ama Hun badaltenbakon.
Şot'o görə ki, həmişə bakalonu Hun,
Vi ömüriyal axır butene!
28 Tum sakalt'un Vi k'ulurxoy əyloğon t'e oç̌ala.
Vi kul şot'oğoxun baki nəsili loxol bakale!».