101
101-ci Ǐvel mə̌ğ
Davidi Ǐvel mə̌ğ
Vi nu badalbakala çuresuni q'a düzgünluği barada mə̌ğk'oz,
Va alxışp'ala mə̌ğur mə̌ğk'oz, ay Q'ončux!
Düz yaq'en taysune bez fikir,
Za hevaxt' ı̌ša bakalnu, ay Q'ončux?
 
Təmiz ük'en kalaluğboz zu bez bakala gala,
Şər əşurxo ə̌xilboz zaxun.
Düz yaq'axun c'erit'oğo nifrətezbsa,
T'it'oz zu şot'oğoxun!
İz ük'e pisluğ bakalt'oğoxun ç̌o taradoz zu,
Şərə ç̌axç̌uxp'i c'ovakoz.
T'iyə̌mit'ay loxol əfçidən əyit laçuvk'alt'ay ǰomoz girbon zu,
İçuxun irəzi bakalt'u, bitot'ay loxol alaxun oq'a běğalt'u porttezbon!
 
Q'ončuğoy laxi k'anunaxun nu c'eğaloroxe bez ük'e basksa,
Şot'oğo girboz bez bel,
Düz yaq'en tağalt'oğo əyit tapşurboz zu!
 
İz ük' təmiz nu bakalt'aynak' ga butene bez saraya,
Bez běš c'eri çurpsa bartezk'on feret't'ala amdara zu!
Haq'alt'un içoğoy cazina me ölkinə bakala pist'oğon hər savaxt'an,
Tumexun əfçiboz bito şər əş biq'alt'oğo Q'ončuğoy şəhərexun!