106
106-ci Ǐvel mə̌ğ
1 Q'ončuğo halalq'an baki!
Q'ončuğo şükürbanan, şot'o görə ki, şaat' bakalone Şo,
Şot'ay yax çuresun həmişəluğe, nu badalbakala çuresune şo!
2 Q'ončuğoy kalaluği k'ə baksuna pi çark'ala şey tene,
Mani əyitmuxe Şot'ay s'iya alabseynak' bəs bakon?
3 Düzgünluği tərəf bakalorox,
Düz yaq'axun nu c'eğalorox he bəxt'əvərt'un!
4 Ay Q'ončux, Vi ük'el basksuni k'ə baksuna Vi azuk'a ak'est'at'an zaal eyexun ma c'evk'a,
Şot'oğoynak' həzirbi çark'esunaxun zaynak'al q'ısmatba.
5 Barta zuval Vi c'ək'p'i bəxt'əvərxoxun soğo bakaz,
Barta Vi azuk'axun sagala mǔqluği k'ə baksuna ak'at'an
Vaynak' c'ək'p'it'oğoxun sagala Vi s'iya alabes bakaz!
6 Mone, beş bavoğoxun avuzin teyan baki yan,
Yanal şot'oğollarik' günaxyan əşp'est'i,
Vi laxi k'anunxoxun c'eri
Düz nu bakala yaq'enyan taysa burqi.
7 Vi Misirə biq'i nu ak'eśi əşurxonal tene qaypi şot'oğoy pulmoğo,
Vi şu baksuna tet'un q'amişaki,
İçoğoynak' bi t'ema şaat'luğa eyexun c'evk'i
Vi əyiti loxol əyitt'un eçeri şot'oğon Č'oč'a dənizi t'ǒğǒl.
8 Ama Q'ončuğon İz kalaluğa ak'est'eynak',
İz s'iya görə p'urumal çark'esedi şot'oğo.
9 Č'oč'a dənizi xene zap'eśi Şot'ay əmiren,
Dənizi boşt'ane taşeri şot'oğo
Q'ariluğen taşala k'inək'.
10 Düşmənxoy kiyexune haq'i şot'oğo,
İçoğo nifrətbalt'oğoxune çark'est'i.
11 Xenen zapi taneşeri t'e düşmənxo,
Saycoval dirist' tene mandi şot'oğoxun.
12 T'e vədət'un Q'ončuğoy İz tadi əyiti loxol çurpsuna věbaki,
Şot'ay s'iya alabala mə̌ğurt'un mə̌ğbsa burqi şot'oğon.
13 Ama boxoy tene zapi şot'oğoy věbaksunen,
Samal oşa p'urum eyexun c'evt'unk'i Q'ončuğoy bit'oğo,
Portp'es tet'un baki Şot'ay əyit tadiyorox hari bex c'eğamin.
14 Yeq' uksune çureśi şot'oğoy ük'en t'e ams'i oç̌ala,
Buxačuğot'un sinəyinşi şot'oğon,
Şot'ay içoğoxun baki nu baksunat'un aksun çureśi t'e xam gala.
15 Buxačuğonal şot'oğo içoğoy çureğalt'u p'ap'esebi,
Ama bač'anexun azar badi k'as'epi şot'oğo.
16 Moiseya q'a Q'ončuğoy běyinšluğbseynak' c'ək'eśi Aaronat'un paxılluğbsa burqi şot'oğon
Ams'i oç̌ala çurpi vədine.
17 Oç̌ale qı̌baki Dat'ani turin oq'a,
Dirist'-dirist' q'uc'epi şot'o q'a Avirami bel ğireśit'oğo oç̌alen.
18 Aruxe baft'i şot'oğoy bakala gala,
Bok'osp'i śinepi t'e pist'oğo ěqeśi yaloven.
19 Arak'i heykəlt'un düzbi şot'oğon içoğoynak' Xorev buruğoy tume,
Q'əliben düześi sa binik'ət'unbul k'os'bsa burqi.
20 İz s'i İz loxol bakala Buxačuğo bul k'os'bsunent'un c'ək'esay şorox bito azuk'xoxun,
Ama Şot'o hik'k'alt'unbi!
Taśi o ukala sa arak'eynak' laxeśi heykələt'un bul k'os'bi şot'oğon!
21-22 İçoğo çark'est'i Buxačuğo,
Misirə nu ak'eśi əşur biq'it'u,
Xame oç̌ala şuk'k'ali kiyexun nu ayeğalt'u bit'u,
Č'oč'a dənizi bel t'e əşurxo eçerit'ut'un eyexun c'evk'i şot'oğon.
23 Q'ončuğonal t'e vədə "əfçiboz kot'oğo tumexun" pine,
Əfçiyalbaley, əgər İz c'ək'p'i Moiseyen içu Şot'ay bok'osp'i śik'ala əcuğoy běš boseri
Şot'ay tadi q'ərara nu badalbest'iyniy.
24 Tet'un çureśi şot'oğon içoğo əyit tadeśi t'e gözəl Kənan oç̌ala,
Buxačuğoy tadi əyitə tet'un věbaki.
25 Çadıri boş arśi t'ot'opsunat'un c'ək'p'i şot'oğon,
Q'ončuğoy içoğoynak' həzirbit'oğo təə.
26 Q'ončuğonal t'e vədə İz kula alabi elasepi,
Şot'oğoy t'e ams'i oç̌ala əfçibaki taysuna,
27 İçoğoxun bakit'oğoyal buxačuxsuzt'oğoy turin oq'a ç̌axç̌uxeśi
Şot'oğoy oç̌alxo śaresunane əyit tadi.
28 P'eor buruğoy bel bakala binik' buxačux Baalat'un bul k'os'bi şot'oğon,
Hik'k'al bes nu bakala sa binik'xoynak' šameśi q'urbani yeq'axunt'un kəyi.
29 Buxačuğoy əcuğot'un biq'est'i şot'oğon me əşurxon,
Azare yaq'abi Şot'inal içoğoynak'.
30 Ama P'inexasi hayzeri həyif haq'sunen Buxačuğoy ük'ə çaxevek'i,
Zap'epi Şot'in İz kula, k'as'esunal çurepi.
31 Şaat'e ak'eśi P'inexasi biq'i t'e əş Buxačuğoy piyes,
Şot'o həmişəluğ bakala,
Lap içuxun oşa izi nəsiləxunal nu kambakala sa xeyir-bərəkəte tadi Şot'in.
32 Meriva xene t'ǒğǒl bakat'anal Buxačuğoy əcuğo biq'est'undi şot'oğon,
Moiseyi bula bəlinəne badi t'e vədə şot'oğoy bit'oğon.
33 Şot'oğont'un Moiseya içuxun c'evk'i,
Şot'inal əyitə uk'at'an fikirbinut'e pi.
34 Q'ončuğoy əmirə əməltet'unbi şot'oğon,
Şot'ay pi k'inək' taśi t'e azuk'xo əfçibsuni gala
35 Şot'oğo gərbaki
Şot'oğoy ədətxon taysat'un burqi.
36 T'e azuk'xoy əfçi buxačuxxo bul k'os'bi
Şot'oğoy təlinət'un baft'i şorox.
37 Q'urbant'un eşt'ay şot'oğon içoğoy ğarmoğo q'a xuyərmoğo
T'e buxačuxsuzt'oğoy "buxačux" pi bul k'os'balabinik'xoynak'.
38 İçoğoy taxsırsuz əyloğoy p'iyat'un śiney şot'oğon metər q'urban eşt'unen,
T'e oç̌alat'un murdarlayinşbsay şot'oğon kənanluğoy binik' buxačuxxobul k'os'bsunen.
39 Q'ončuğoy laxi yaq'axun c'eysun,
Şot'oxun ğaç̌eśi ı̌vel irəziluğa murdarlayinşbsun upsuney şot'oğoy me hərəkətxo.
40 Mot'o görəl bəc'ük'eśi Q'ončuğoy əcuğ İz azuk'i loxol,
İrit'epi Şot'in İz c'ək'p'iyorox bakalt'oğoxun.
41 Q'erəz millətxoy kiyele tadi şot'oğo,
T'e düşmən bakalt'oğonal ç̌axç̌uxp'i c'ovat'unksay şot'oğoy loxolxun.
42 Zülümt'un tast'ay şot'oğo,
Şot'oğonal içoğoy səsə c'evk'es tet'unbaksay.
43 Düze, çark'esest'ay şot'oğo Q'ončuğon gele vədə,
Ama şot'oğon p'urumal içoğoy ǰomoy tüşen taśi
Günaxa bafst'unen Q'ončuğoy əcuğo biq'est'unst'ay.
44 Şot'oğoy xoyinša ibakat'an,
Şot'oğoy zap'k'ala əzyətxo ak'at'an isə
45 Ak'esest'ay İzi nu badalbakala çuresuni k'ə baksuna, goroxe eysay şot'oğo.
Eyexe bafst'ay İzi şot'oğoxun ğaç̌eśi irəziluğ.
46 T'e vədəl t'etəre bsay ki, şot'oğo zülüm tadalorox cügüt'un baksay.
T'ǒǒx laxalat'un baksay şot'oğon içoğoy q'əddarluğa.
47 Çark'est'a yax, ay beş Buxačux bakala Q'ončux,
Me azuk'xoy aranexun c'evk'i yax sagala girba ki,
Vi ı̌vel s'iya alabala mə̌ğur mə̌ğpes baken yan,
Barta beş ük'q'an qayeśi Va tərifləyinşat'an.
48 Barta burqesunaxun mağay baki k'inək'
Meyin oşal həmişə İsraili Buxačux bakala Q'ončuğo alxışq'an baki!
Barta bito azuk'xonal sa səsen "ammen"q'at'un pi!
Q'ončuğo halalq'an baki!