24
1 Pis amdarxo paxılluğ maba,
Şot'oğo gərbaksun ma çureki.
2 Şot'aynak' ki, şot'oğoy ük'e zalımluğbsuni fikirxono,
Şot'oğoy muzen q'əddarluğaxune əyite.
3 K'oj müdrikluğene biq'esa,
Q'amişaksunenal şot'o möhk'əmebsa.
4 İz otağxo avabaksuni köməyen,
Hər cürə dəyərlü, toyexlu şeyurxone buybaksa.
5 Müdrik işq'ar zorbane bakon,
Avabakala amdaren iz zorane avuzbon.
6 Davabat'an maslaatxo ǔmǔxlaxa,
Düz nəsyət tadalo gelenesa, davina tanşon.
7 Q'ammazeynak' müdrikluğ kul nu p'ap'ala sa şeye,
Darvazin t'ǒğǒl camaati běš iz ǰomoval qaypes tene bakal.
8 İz fikire şər əş biq'est'alo əşgaldale k'alesa.
9 Səfeyi pis niyət günaxe,
Amdarxonal ç̌oboç̌ut'oğo murdare hesabbsa.
10 T'ar ğine ost'aar tenusa,
He zəyif amdarnu!
11 Bespsa taşalt'oğo çark'est'a,
K'as'esunaç tağalt'oğo qoş qayda.
12 Hun ualk'ayin ki, "mot'oxun bez xavar tenoy",
Ük'ürxo Yoxlayinşalt'in mot'o atenek'on ki?
Vi elmoğo Q'orişalt'in mot'o avatenebakon ki?
Şot'in amdarxo içoğoy əməlxo görə tene tadon ki?
13 Bez ğar, uč' uka, axıri şo xeyire,
Şamla uč'e tadal vi t'amağeynak' muč'ane.
14 Avabaka ki, müdrikluğal vi elmoğoynak' hametəre,
Şot'o bə̌ğə̌bayin, gələcəyəl bakale,
Vi umud ams'ina tene c'eğal.
15 Şər amdar k'inək' düzgün amdari k'oja vərənbseynak'
Busq'u ma biq'a, şot'ay yurda ma śarpa.
16 Düzgün amdar vǔğ kərəm bitayinal, p'urum hayzale,
Şər amdareynak' bələ eğat'an isə şot'o sanekon.
17 Düşməni bist'una mǔq ma baka,
Şot'ay lamanst'una görə vi ük' maq'an çaxeśi.
18 Axıri Q'ončuğon mot'o anek'on, İz xoşel tene eğon,
Vi düşməni loxolxunal İz əcuğo exedon.
19 Pisluğ balt'oğo görə vi əcuğon maq'an biq'i,
Şər amdarxo paxılluğ maba,
20 Şot'aynak' ki, pis amdari axır butene,
Şər amdari çirağ aneç̌on.
21 Bez ğar, Q'ončuğoxun saal padçağaxun q'ı̌ba,
Şot'oğo nu çalxalt'oğoxun dost' ma baka.
22 T'e p'rannan tadala bələ q'əflətene eğon;
Şot'oğon tadala cazinal şina avabakon?
Müdrik amdarxoy sa hemal müdrik əyitmux
23 Me əyitmoğoval müdrikxone pe:
Divanbat'an tərəfkəşluğbsun şaat' tene.
24 Taxsırkərt'u "hun düzgünnu" uk'ala amdara azuk'xon q'inəyinşebon,
Tayfoğon ləənətt'unbon.
25 Ama şot'o caza tadala amdaren xeyir bə̌ğə̌bale,
Şot'ay loxol bol xeyir-bərəkət eğale.
26 Seri coğab tast'un amdara ç̌oyexun muçbsun k'inək'e.
27 Süft'ə qavuna bakala əşlə çark'a, q'oruğa təmizba,
Oşa vaynak' k'oj biq'a.
28 Q'onşin əleyinə əfçi şahidluğ ma ba,
Vi ǰomoxun feret't'ala əyit maq'an c'eri.
29 Ma upa: "Şot'in za bit'u zuval şot'o booz,
Şot'ay əməlxoy əvəzə c'eğoz".
30 Tənbəli q'oruğaxun,
Q'ammazi t'ulluğaxunez c'ovaksay.
31 Azk'i ki, hər ganu śaśen q'a ilen haq'ene,
J̌ěne q'alal barene.
32 Běği mot'o fikirez tadi,
Mot'oxun dərsez ext'i:
33 Samalal bask'i nep'axeğayin,
Turmoğo boxodi bask'ayin,
34 Mone, kəsibluğen oğri k'inək',
Eht'iyəcen amdar fǔq'k'al k'inək' vi loxol hücümebon.