23
1 Kalaluğbalaxun sa sulfina arśat'an
Vi běš bakalt'u yönbəri fikir tada.
2 Vi işt'ağ şaat'al bakayin,
Vi ukalt'ay q'ərələ avabaka.
3 Şot'ay muč'a xorayxo tamax ma ba,
Şot'aynak' ki, me ukunen amdara feret'edon.
4 Dövlət q'azayinşbseynak' vi elmoğo ma laxa,
Müdrik baka, me fikirəxun kul haq'a.
5 Vi pula dövlətə tikbala k'inək', şo əfçibakale,
Müt'lək' q'ənədləyinşaki,
Q'irği k'inək' purpi göynul ěqeğale.
6 Xəsis amdari tadala šuma ma uka,
Şot'ay muč'a xorayxo tamaxmaba,
7 Şot'aynak' ki, şot'in iz ük'e boş hər şeye hesabane bon.
Muzen va "uka, ǔğə̌" uk'ale,
Ama iz ük' q'a uk'alorox sa tene.
8 Kəyi loq'minal əsək'enk'on,
Vi pi bütüm muč'a əyitmuxal ams'inane tağon.
9 Q'ammaza əyit ma upa,
Şot'aynak' ki, vi müdrik əyitmoğo toy tene laxon.
10 Damna zahmani ǰěne ganu ma badalba,
Yetimxoy əkinə ma baki.
11 Axıri şot'oğo Q'orişalo zorbane,
Şot'oğoy vaxun bakala divanal Şot'ine běğon.
12 Vi ük'ə tərbiyineynak',
Ǔmǔxxo zombala əyitmoğoynak' qaypa.
13 Əylin tərbiyinə həmişə fikir tada, cazasuz ma efa,
Tərbiyineynak' bakala t'ap'en şot'o bestenebon.
14 Ama şot'o t'ap'sunen,
İz elmoğo bisunaxunen çark'est'on.
15 Bez ğar, hun müdrik bakayin,
Bez ük'əl qayeğon.
16 Vi muzexun düz əyitmux c'eğayin,
Bezi bütüm elmux mǔqebakon.
17 Günaxkərxo paxılluğbsuna vi beynə ma eça,
Ama vi hər ğina Q'ončuğo çalxsunen yəşəyinşa.
18 T'e vədə vi gələcəy bakale,
Vi umudal ams'ina tene c'eğal.
19 Bez ğar, ǔmǔxlaxa, müdrik baka,
Həmişə düz yaq'a baka.
20 Fine t'ağar bakalxoy arane ma baka,
Yeq' ukala tapanxorxo gərmabaka.
21 Axıri ǔğə̌lxo q'a tapanxorxo kəsibt'un bakon,
Kəyi-ǔği nep'ax mandalorox axırda c'ır-c'ınt'ıri boşt'un mandon.
22 Vi bava ǔmǔxlaxa, axıri şot'ine va yəşəyinş tade,
Vi nanal iz q'oja vədine saymişa.
23 Müdrikluğa, tərbiyinə, q'amişaksuna q'a serina topba.
Şot'oğo ma toyda.
24 Metər amdari bava fərəxləyinşebakon,
Müdrik ğaren şot'o mǔqedon.
25 Barta vi bava-nana mǔqbakeq'an,
Va dünyəne eçeriyo fərəxləyinşakeq'an!
26 Bez ğar, za fikir tada,
Bezi tağala yaq'en taki.
27 Běğa, tarak'ala çuux bə̌ğə̌loy sa çuq'ur,
Əxlagsuz çuux q'ac' kəriz k'inək'e.
28 Şot'in k'uldur k'inək' busq'une biq'on,
Amdarxoy arane xayinxone avuzbon.
29 Yaslu bakalo şuva? Dərdlü bakalo şuva?
Şuva davin boş bakalo? Şuva şikəətbalo?
Şuva ams'i gala yaralayinşakiyo?
İz pulmux č'oč'a bakalo şuva?
30 Mo fi ǔğsa arśalo,
Taśi cürbəcür fine tada běğalone!
31 Hun fine č'oč'a irəngə,
Ayaq'i boş s'alst'una, irəət ǔğěsuna ma běğa!
32 Şot'in axırda va dizik' k'inək' duneğon,
Gürzə k'inək' zəhərləyinşebon.
33 Vi piyes q'əribə şeyurxone ak'eğon,
Haq'ıleyal k'ori fikirxone eğon.
34 Vi bask'i gala va dənizi bı̌yex,
Gəmin boş k'inək'en hisbon.
35 Uk'alnu: "Za duğet'un, his tezbe,
Za t'apet'un, sal avabakiyaltezu.
He vədə muğurbakoz ki, p'urum ǔğə̌z?"