22
1 Şaat' s'i kala var-dövlətəxun,
Hörmət q'azayinşbsunal q'ızıl-gümüşəxun üst'üne.
2 Dövlətlü q'a kəsib amdar sa şeyast'at'un suna oşq'ar:
P'rannal Yaratmişiyo Q'ončuxe.
3 Ə̌xilak'ala amdaren saturběš şərə ak'i şot'oxun t'inet'on,
Q'ammazen isə běš taśi ziyane bə̌ğə̌bon.
4 Əyitə běğsunen q'a Q'ončuğo çalxsunen
Dövlət, şərəf, saal yəşəyinşe eçon.
5 Şər amdari yaq' śaślane, t'et'iya tələno,
İz elmoğo çureğalt'in şot'oxun ə̌xile tarak'on.
6 Əyelə t'ebelxun düz yaq'a laxa,
Şo isə q'ojabakat'anal me yaq'axun tene c'eğal.
7 Varlu amdar kəsibi ağane bakon,
Borclu amdaral içu borc tadali k'ule bakon.
8 Haq'suzluğ bit'alt'in içeynak' bələne exp'on,
Şot'ay sırişala çombağal əfçinebakon.
9 Kəsibəxun iz šuma cöybala kulqay amdaren
Xeyir-bərəkəte q'azayinşon.
10 Masq'arabala amdara şəp'enğon, daval çurek'on,
Orobaksunal, köfel lafst'unal tene bakon.
11 Ük' təmiz, muč'a muz amdari
Padçağal dost'e bakon.
12 Q'ončuğon q'amişaksuna q'orişebon,
Xayini əfçi əyitmoğo isə ç̌oyele c'evk'on.
13 Tənbəlen nexe: "Qavuna aslano,
Məəlne c'eğayiz, za śark'ale".
14 Əxlagsuz çuğoy ǰomo bə̌ğə̌loy kur k'inək'e,
Q'ončuğon ləənətbiyo t'et'iyane baft'on.
15 Q'ammazluğ əyləst'a bune,
Ama t'ap'en şot'o düzebon.
16 Varlu bakseynak' kəsibə zülüm baloval,
Varlu amdara pay tadaloval -
Morox p'ǒğə̌l eht'iyəcəne baft'on.
Otuz müdrik əyit
17 Vi ǔmǔxxo qaypa,
Müdrik amdarxoy əyitmoğo ibaka,
Bezi zombsuna fikir tada.
18 Şot'oğo vi ük'e boş efayin,
Şot'oğo bütümə vi muzel eçayin, vaynak' şaat'e bakon.
19 Q'ončuğo ext'ibərbavax pi
Ğe mot'oğo va, vaz avabakest'a.
20 Vaynak' otuz məsələ, müdrik nəsyət tez śampi ki?
21 Şot'oğon va haq'q'e q'a serin k'ə baksuna avabakest'i,
Va yaq'abit'oğoy t'ǒğǒl düz coğaben qaybakavax.
22 Kəsibə iz fağır baksuna görə fǔq'mapa,
Divanbat'an eht'iyəci boş bakalt'u zülüm ma tada.
23 Şot'aynak' ki, şot'oğoy əşurxo Q'ončuğon İçin běğale,
Şot'oğo fǔq'k'alt'oğo əfçibale.
24 Usum əcuğon biq'alt'uxun dost' ma baka,
Usum içuxun c'eğala amdari yaq'a ma baft'a.
25 Tenesa, şot'ay yaq'enen tağon,
Hun va təlinən badon.
26 Q'ert'ay gala zamin çurpsunaxun,
Şot'ay gala əyit tast'unaxun qoş baka.
27 T'e amdari gala tadala hik'k'al nu bakayin,
Vi bask'ala döşəyəl taşalt'un.
28 Bavoğon laxi damna zahmani ǰěne ganu ma badalba.
29 İz əşlə şaat' avabakalt'u anksa?
Şot'in adi amdarxoynak' təə, padçağxoynak' əşp'ale.