25
Solomoni sa hemal məsəloox
Moroxal Solomoni məsəlooxe. Mot'oğo İudeyani padçağ Xizgiyay amdarxon efseynak' girbi śamt'unpe.
 
Amdarxon Buxačuğo içoğoy haq'ıle nu p'aq'ala əşurxo biq'suna görət'un alxışpsa,
Padçağa isə iz əşurxo taşt'una görə.
 
Göye alloyluğa q'a oç̌ali bə̌ğə̌loyluğa tam nu q'amişakes bakala k'inək',
Padçağiyal ük'exun c'ovakalt'oğo avabakes tene bakon.
 
C'ema gümüşəxun cöybayin,
Zərgərə saycə kiin əşe mandon.
Şər amdara padçaği t'ǒğǒlxun ə̌xilbayin,
Şot'ay taxt' düzgünluğen möhk'əme bakon.
 
Padçaği běš va ala ma biq'a,
Kala amdarxoy t'ǒğǒlal vaynak' ga maba.
Şot'aynak' ki, va "bürmişa, ala c'ovaka" upsun
S'ila amdarxoy běš oq'a saksunaxun şaat'e.
 
Ak'i şeyurxo görə
Amdarxo taxsırkər c'evksuna ma kapa.
Oşa t'e amdaren va ot'p'est'ayin, k'ən bon?
 
Şuxunesa vi əş bunesa, saycə vi divana divanba,
Şot'ay sirə ma qaypa.
10 Tenesa ibakalt'in vi loxol pis piine běğon,
Mot'in va ext'ibərəxun sanekon.
 
11 İz gala pi əyit
Gümüşi çərçüvin boş bakala q'ızıli ěšane oşq'ar.
12 Əyitběğaleynak'al müdrik amdari töhmət
Q'ızıli sırığan, q'ızıli bəzəy k'inək'e.
 
13 Exe vədine ı̌ǰe sərinluğ hetəre bakonsa,
Ext'ibərlu elçiyal şot'o yaq'abit'aynak' hametəre:
Şot'o yaq'absunen şo içule eysa.
 
14 İz nu tadi payurxoxun forsbalo
Ağala nu eçala asoy q'a muş k'inək'e.
 
15 Səbiren kalaluğbalal vědese bakon,
Muč'a muzen tərs amdaral əyitəle eçon.
 
16 Uč' bə̌ğə̌bayin, vi q'ərələ uka,
Puldeşi k'inək' ukayin, əsəkk'alnu.
17 Q'onşin k'oya usum-usum ma taki,
Tenesa, bezər baki, vaxun iz zəhləne baron.
 
18 İz q'onşin barada əfçi şahidluğbalo
Sa güpun, q'ılınc, şiş ox k'inək'e.
 
19 Bašay uluğoxun, axsağ turaxun sa xeyir nu bakala k'inək',
T'ar ğineyal xəyanətkərəxun sa xeyir tene bakon.
 
20 İz ük' buy amdareynak' mə̌ğ mə̌ğpsun
Şot'ay paltara çax havina c'eq'sun,
Nəəl ki, iz yarin loxol oq'oy lapsun k'inək'e.
 
21 Vi düşmən busanesa, şot'o ukest'a,
Xenezanesa, şot'o xe tada.
22 Metər ba ki, şot'in ot'p'i toobabane, *
Q'ončuğonal va iz əvəzəne tadon.
 
23 Q'uzey tərəfəxun eğala muşen ağala eçala k'inək',
Əyittaradali muzenal amdarxoy əcuğane iz loxol eçon.
 
24 Davabala çuğoxun sa k'ojin oq'a yəşəyinşbsaxunsa,
Ǔğǔl sa dönbine yəşəyinşbsun şaat'e.
 
25 Xenezaluğaxun bok'alt'aynak' çax xe hetəresa,
Ə̌xil ganuxun eğala mǔq xavaral hametəre.
 
26 Düzgün amdari pis amdara tabi baksun,
Orayini ciyər baksun, kərizi murdarlayinşaksun k'inək'e.
 
27 İz q'ərələxun gele uč' uksun xeyirlu nu bakala k'inək',
Amdari içeynak' dim tərif qə̌věsunal şaat' tene.
 
28 İçu idarabes nu bakala amdar
Śareśi, q'alasuz şəhər k'inək'e.
* 25:22 - əbrani muzin: Şot'ay bel s'ilen lak'on.