12
1 Tərbiyinə çureğalt'in avabaksune çureğon,
Töhmətə nifrətbalo isə şuursuze.
2 Q'ončux şaat' amdaraxun irəzine mandon,
Pisniyətlü amdari isə q'ərarane c'evk'on.
3 Amdaren içu şəren möhk'əm tene bon,
Düzgün amdari tum isə əfçi tene bakon.
4 Şaat' çuux işq'ari biin tace,
İşq'ara biyaburbala çuux isə şot'ay ük'e sa q'aratikən.
5 Düzgün amdarxoy niyət düzgünluğe,
Şər amdarxoy maslaat isə əfçi.
6 Şər amdarxoy əyitmux p'i śipseynak'e,
Ama ük' təmizt'oğoy muzen içoğo çark'est'ale.
7 Pisorox biti əfçit'unbakon,
Düzgün amdarxoy k'oj isə sal sa vədə śarteneğon.
8 Müdrikluğa görə amdara tərift'unbon,
Pis niyətlut'u isə biyabur.
9 İzi sa k'ul bakala adi amdar baksun
Lovğalayinşakala, ama šum nu bə̌ğə̌bala amdaraxun şaat'e.
10 Düzgün amdaren iz heyvanal goroxe eysa,
Şər amdari şaat'luğbsun isə q'əddarluğaxunal betəre.
11 İz oç̌ala bit'i-exp'alt'in boşşamin šume ukon,
Ama ams'i şeyurxoy qoşt'an tağalo q'ammaze.
12 Şər amdaren pisluği yaq'e q'azancane tamaxbon,
Düzgün amdari tumen isə veçəne duğon.
13 Pis amdara əfçi əyitmoğon təlinəne badon,
Ama düzgün amdar t'ara bafaldayin t'et'iin salamate çark'on.
14 Amdari ǰomoxun c'eğala şaat' əyitenal xeyir-bərəkəte eçon,
Lap kiin zəhməten eçala q'azanc k'inək'.
15 Səfeyi yaq' iz piyes düze ak'eğon,
Müdrik amdaren isə nəsyətəne ǔmǔxlaxon.
16 Səfeyen iz əcuğo kap ç̌oyele c'evk'on,
Ə̌xilak'alt'in isə şərəfsuza fikir tene tadon.
17 Düzgün şahiden serinəne əyitk'on,
Əfçiduğal şahiden isə əfçi.
18 Fikirbinut' əyitk'alt'ay muzen q'ılınc k'inək' yaralayinşebon,
Müdrikt'ay muzen isə amdarxo q'olayebon.
19 Düz əyit həmişəluğe yəşəyinşon,
Əfçi əyiti ömür isə gödəye bakon.
20 Pis niyət bakalt'ay ük'e şəre bu,
Serluğ çureğalt'ay ük'e isə mǔqluğ.
21 Düzgün amdar sal sa vədə bəlinə tene baft'on,
Pis amdarxo isə həmişə koruği boşe bakon.
22 Q'ončuğon əfçi əyitəxun irit'ene,
Düzgünt'oğoxun isə irəzine manst'a.
23 Ə̌xilak'alt'in iz avabakalt'u bayan tenebon,
Q'ammazen isə iz səfeyluğa bütümə yəymişebon.
24 Çalışakalt'ay kiin içu ağane bon,
Tənbəlluğen isə amdara t'iyə̌mint'ay k'ule bon.
25 Narahatluğen amdari ük'əne t'ǒpevk'on,
Şaat' əyiten isə mǔqedon.
26 Düzgün amdaren iz ı̌šat'u yaq'e ak'est'on,
Şər amdaren isə iz yaq'ane aç̌esp'on.
27 Tənbəli kiyel ǒxə̌lbi heyvan bafaldayin şot'o tene ap'esp'on,
Əşbsun çureğalt'in isə gele var-dövləte q'azayinşon.
28 Düzgünluği yaq'a yəşəyinşe bu,
T'et'iya bisun tene bu.