13
1 Müdrik ğaren bavay tadala tərbiyinə ǔmǔxe laxon,
Ç̌oboç̌unen isə töhmətə fikir tene tadon.
2 Amdaren iz muze şaat' əyitin xeyirəne ak'on,
İçust'a şaat'luğ nu bakalt'in isə q'əddarluğe qə̌věğon.
3 İz muza efalt'in iz elmoğone q'orişon,
Yənşəğen isə iz bula bəlinəne badon.
4 Tənbəli niyət iz boşe mandon,
Əşbsun çureğalt'ay niyətxo isə bexe p'ap'on.
5 Düzgün amdaren əfçinə nifrətebon,
Şər amdaren isə xəcələt q'a biyaburçuluğe eçon.
6 Kamilluği yaq'a bakalt'u düzgünluğen q'orişebon,
Günaxbalt'u isə şəren sanekon.
7 Amdaro ki, izi hik'k'al butene, içu varlune ak'est'a,
T'etərono ki, iz dövlət gelene, ama içu kəsibe ak'est'a.
8 Dövləten amdari elmoğo xatinaxun çark'esedon,
Kəsib isə t'e xatina bafaltenedon.
9 Düzgün amdarxoy işiğ güre bok'on,
Şər amdarxoy çirağ isə aneç̌on.
10 Amdari içu ala biq'sunen saycə davane eçon,
Şaat' nəsyətə ǔmǔxlaxsunen isə müdrikluğ.
11 Havayi eğala dövlət usume irameğon,
Zəhməten q'azayinşala dövlət isə avuzebakon.
12 C'əyi bex p'ap'ala arzu ük'e q'ač'e,
Niyətə p'ap'sun isə yəşəyinşest'ala xod k'inək'.
13 Tərbiyinə nu q'abulbalt'in içune zərəl tadon,
Buyruğa hörmətbalt'in isə şaat' ğine ak'on.
14 Müdrik amdari zombsun yəşəyinşest'ala orayine,
Amdara bisuna taşala təlinəxune ə̌xilbon.
15 Düz q'amişakalo amdarxoy piyes şaat'e ak'eğon,
İçust'a şaat'luğ nu bakalt'ay yaq'en isə bisunane taşon.
16 Ə̌xilak'alt'in hər əşlə avabaksunene biq'sa,
Axmağen isə iz səfeyluğane bütümə ak'est'a.
17 Pis elçi bəlinəne baft'on,
Ext'ibərlu elçinen isə serluğe eçon.
18 Tərbiyinə iradbalo kəsib saal biyabure bakon,
Maslaata q'abulbalt'in isə hörməte q'azayinşon.
19 Arzuna p'ap'sun amdareynak' muč'ane eğon,
Q'ammaz isə pisluğaxun qaybaksun tene çureğon.
20 Müdrikxoxun arśi-hayzalt'in müdrikluğe q'azayinşon,
Q'ammazxoxun dost' bakalt'in isə iz bula bəlinəne badon.
21 Günaxkərəxun şər kamtene,
Düzgün amdaren isə şaat' ği ak'ale.
22 Şaat' amdari girbiyo iz nəvoğoynak'e mandon,
Günaxkəri girbi dövlət isə düzgün amdarane c'ovakon.
23 Kəsibi oç̌alen bol məhsul taaldayin,
Düzgünluğ nu bakala gala əfçinebakon.
24 Ğara nu çureğalt'in şot'o tene cazalayinşon,
Çureğalt'in isə k'ovala t'ǒǒx tene boson.
25 Düzgün amdar həmişə boşe bakon,
Şər amdar isə busane mandon.