11
1 Feret't'ala tərəzik'əxun Q'ončuğon irit'ene,
Ama düz ayzap'k'ala ǰěnaxun Şo irəzine mandon.
2 Lovğaluğ eğat'an şərəfsuzluğe eçon,
Müdrikluğ isə əyitběğalt'ay t'ǒğǒle eğon.
3 Düzgün amdara iz kamilluğen yaq'e ak'est'on,
Xəyanət'kəra isə iz pisluğen əfçinebon.
4 Var-dövləten şuk'k'ala t'ar ğine tene çark'est'on,
Düzgünluğen isə amdara bisunaxune çark'est'on.
5 Ük' təmiz amdari yaq'a iz düzgünluğen düzebon,
Şər amdara isə iz pisluğen sanekon.
6 Düzgün amdara düzgünluğen çark'esedon,
Xayina isə tamaxkərluğen təlinəne badon.
7 Şər amdar biyone, iz umudal ams'inane c'eğon,
Pist'oğoy arzu aç̌i-batek'on.
8 Düzgün amdar t'araxun çarek'on,
İz gala pis amdare baft'on.
9 Buxačuğo nu çalxalt'ay muzen iz ı̌šat'u əfçinebon,
Düzgün amdara isə iz q'amişaksunen çark'esedon.
10 Düzgün amdarxoy şaat' ği aksunane dirist' şəhər mǔqbaksa,
Şər amdar isə biyat'ane mǔqluği haray ěqesa.
11 Düzgün amdarxoy alxışen şəhərə şərəfəne p'ap'esp'on,
Şər amdari əyitmoğon isə t'iyana xarabinane c'urevk'on.
12 Q'ammazen iz ı̌šat'u biyaburebon,
Q'amişakala amdaren isə iz muza enefon.
13 Əyittaradalt'in sirə qaypi yəymişebon,
Ext'ibərlu amdaren isə sirə enefon.
14 Müdrik maslaat nu tadeğala gala azuk' bineton,
Nəsyət tadal gelenesa, azuk' iz çark'esunane p'ap'on.
15 Q'ert'ay gala zamin çurk'alt'in içu bəlinəne badon,
Q'ert'ay gala əyit nu tadalo isə şip'e yəşəyinşon.
16 Xeyirxax çuğon şərəfe topbon,
Puldeşiluğbi əşp'alt'in isə saycə dövlət.
17 Ük'bok'al amdaren içeynak' xeyire eçon,
Q'əddar amdaren isə bələ.
18 Şər amdaren ams'i mükəfəte q'azayinşon,
Düzgünluği śilə bit'alt'in isə əsil mükəfət.
19 Düzgünluğa biq'alt'in yəşəyinşe q'azayinşon,
Şərə biq'alt'in isə bisun.
20 Pis niyətlut'oğoxun Q'ončuğon irit'ene,
Ük' təmizt'oğoxun isə irəzine manst'a.
21 Avabaka, pis amdar cazasuz tene mandal,
Düzgünt'oğoy nəsileynak' isə çark'esun bakale.
22 Haq'ılsuz çuğoy gözəlluğ
Bǒq'e dündük'e q'ızıli halq'a k'inək'e.
23 Düzgün amdarxoy niyət bexe p'ap'on,
Şər amdara isə Q'ončuğoy əcuğe q'ısmat bakon.
24 Kulqay amdari bərəkət avuze bakon,
Q'imiş nu balo isə eht'iyəcəne baft'on.
25 Kulqay amdaren bolluğe bə̌ğə̌bon,
Xe tadalt'u xene tadeğon.
26 Taxıla c'ap'p'i efalt'u camaaten ləənətebon,
Ama toydalt'ay bel bərəkəte baron.
27 Şaat'luğ qə̌věğalt'in xeyir-bərəkəte bə̌ğə̌bon,
Şərə qə̌věğalt'in isə bələ.
28 İz var-dövlətə güvəyinşakalo bineton,
Düzgün amdar isə həmişə göyün mandala xazal k'inək'e.
29 İz külfətə bəlinə badalt'ay miras hik'k'ale,
Q'ammazal müdrik amdari k'ul bakale.
30 Düzgünluği bar yəşəyinşest'ala xode,
Amdarxo içuç zap'k'alo müdrike.
31 Əgər me dünyəne düzgün amdarxoval haq' tadesasa,
İsə běğa pist'oğo q'a günaxkərxo heq'ədər caza tadeğale!