10
Solomoni məsəloox
1 Solomoni məsəloox:
Müdrik ğaren iz bava mǔqedon,
Axmağ ğaren isə iz nanaynak' dərde eçon.
2 Pis yaq'en gireśi dövlətəxun xeyir ext'es tene bakon,
Ama düzgünluğen amdara bisunaxune çark'est'on.
3 Q'ončuğon düzgün amdara busa tene efon,
Puldeşiluğbala şər amdari niyətə isə iz ük'e boşe efon.
4 Tənbəl kulmoğon kəsibluğane taşon,
Əşp'ala kulmoğon isə dövləte q'azayinşon.
5 Yəynul məhsul girbala ğaren iz müdrikluğane ak'est'on,
Exe vədine bask'ala ğar isə biyabure bakon.
6 Düzgün amdari loxol bol xeyir-bərəkəte eğon,
Şər amdaren iz q'əddarluğa muč'a muzine c'ap'bon.
7 Düzgün amdarxo p'urit'uxun oşal eyex bast'unen xeyir-bərəkəte eçon,
Şər amdari s'i isə aç̌i-batek'on.
8 Həgigi müdrik bakalt'in buyruğxo q'abulebon,
Axmağa isə iz muzen əfçinebon.
9 Təmiz ük'en tarak'alo dince yəşəyinşon,
İçoğoy yaq'a k'oribalt'oğoy əməlxo isə ç̌oyele c'eğon.
10 Pis niyəten pul q'ic'k'alo bəlinəne baft'on,
Axmağa isə iz muzen əfçinebon.
11 Düzgün amdari ǰomoxun c'eğalorox amdara yəşəyinşest'ala orayine,
Şər amdaren isə iz q'əddarluğa muč'a muzine c'ap'bon.
12 Nifrəten davane eşt'a,
Çuresunen isə bütüm günaxxoy loxolxune but'k'sa.
13 Q'amişakala amdari muzexun müdrikluğe baron,
Q'ammazi bač'aneynak' isə sa xaǰile kam.
14 Müdrik amdarxon avabaksunt'un girbon,
Səfey isə iz ams'i əyiten usumluğen bəlinəne baft'on.
15 Dövlətlüt'ay var-dövlət izi q'alalu şəhəre,
Kəsibi kəsibluğ isə içeynak' bələ.
16 Düzgün amdari mükfət yəşəyinşe,
Şər amdari q'azanc isə caza.
17 Tərbiyinə q'abulbalo yəşəyinşi yaq'ane bakon,
Töhmətə iradbalt'in isə iz yaq'a aç̌esebon.
18 İz nifrətə c'ap'p'alt'in əfçine əyitk'on,
Əyittaradala amdar q'ammaze.
19 Gele əyitk'ala amdar günaxane baft'on,
İzi ǰomo efalo isə müdrike.
20 Düzgün amdari muz təmiz gümüşə barabare,
Şər amdari haq'ıl isə hik'k'ala laftenest'a.
21 Düzgün amdari əyitmoğon gele amdareynak'e xeyir eçon,
Q'ammaz isə iz haq'ılsuzluğaxune biyon.
22 Q'ončuğoy xeyir-bərəkəte amdareynak' var-dövlət eçalo,
Şot'o q'azayinşbsunenal koruğ tene tadon.
23 Q'ammazeynak' şər əşur biq'sunene mǔqluğ eçon,
Düzgün amdareynak' isə iz müdrikluğen.
24 Şər amdaren het'uxun q'ı̌nebsasa, şoval iz bel eğale,
Düzgün amdar isə iz arzuna p'ap'ale.
25 Muş ěqeśi şər amdarxo fupi taneşon,
Düzgün amdarxo isə həmişəluğe mandon.
26 J̌omoynak' oq'oy, pulmoğoynak' k'üün hetəresa,
Tənbələl içu əş bürüşalt'aynak' hat'etəre.
27 Q'ončuğo çalxalt'ay ömür boxoyebakon,
Şər amdarxoy ömürəxun isə usenxone malbakon.
28 Düzgün amdarxoy yaq'běğsun mǔqluğene çark'on,
Şər amdarxoy umud isə ams'inane c'eğon.
29 Ük' təmiz amdarxoynak' Q'ončux bač'ane baksa,
Şər amdarxo isə əfçinebsa.
30 Düzgün amdarxo içoğoy ganuxun tet'un galk'al,
Şər amdarxo isə me ölkinə tet'un mandal.
31 Düzgün amdari ǰomoxun müdrikluğe barst'a,
Ama əfçi uk'alt'ay muz bot'eğale.
32 Düzgün amdari muzen iz əyitk'alt'u avane,
Şər amdari ǰomoxun isə əfçi əyitmuxe c'eğon.