5
Bumpughulu mu mi mitala Mwana a Nzaami
1 Nswe munde wu aasa kana ti Yiisu li Kriste,
nde li mwana Nzaami.
Ya nswe munde wu dzyi Nzaami,
Dzyi si mwana a nde.
2 Bu me bu liikasoolo ti bihi-a-be liikadzyi baana ba Nzaami:
Mu matala ma liikadzyi Nzaami ya ma liikanama litumu li nde.
3 Mu kuulu, dzyi li Nzaami lili ti,
Bihi-a-be likanama mikyene mi nde.
Ya mikyene mimye ka mili a leme o.
4 Mu kuulu, nswe munde wu li mwana a Nzaami, aakalughulu ŋa nkulu a mandagha ma nsie.
Ya me mu kana bihi-a-be liikalughulu ŋa nkulu a mandagha ma nsie.
5 Nande aalughulu ŋa nkulu a mandagha ma nsie,
Kala ka munde o wu aakasa kana ti Yiisu li Mwana a Nzaami?
6 Yiisu-Kriste li munde,
Wu áagyi mu madza ya mu makili.
Nde ka ágyi yini a ya madza o,
Lo nde ágyi ya madza ya makili.
Mufulu li mu osuo bumpughulu mu nde,
Mu kuulu Mufulu li engaŋma.
7 Mu kuulu bampughulu bali batere:
8 Mufulu, madza ya makili.
Ya bumpughulu bu bo bansa batere buli mu okagye nzili mõ.
9 Kala ti bihi-a-be liikakihi bumpughulu bu baara,
Lo bumpughulu bu Nzaami bubvulu bunene,
Bumpughulu, bu bo, ngu bu ásuo nde mu mi mitala Mwana a nde.
10 Munde wu aakasa kana mu Mwana a Nzaami,
Nde li a bumpughulu bu bo munsa mukolo a nde.
Munde wu aagwene okasa kana mu Nzaami,
Aakasa ti Nzaami akala nga-a-mpya,
Mu kuulu nde ka aasi kana mu bumpughulu
Bu ookasuo Nzaami mu Mwana a nde o.
11 Bumpughulu bubo me bu:
Nzaami ágwi bihi-a-be laama lili mibvu ya mibvu,
ya laama lilo lili mu Mwana a nde.
12 Wu li a Mwana li a laama,
wu gwene a Mwana a Nzaami ka li a laama o.
Laama lili mibvu ya mibvu
13 Me aansono be mandagha ma,
Mpaala be lisoolo ti, be lili a laama lili mibvu ya mibvu,
Be ba liikasa kana mu nkwumu a Mwana a Nzaami.
14 Emiini ki lili a bihi mu nde me ki:
Kala ti bihi liluomo nde elogho ti bwunu a bu oli gwaa li nde,
Lo nde aakagyughu bihi.
15 Ya buulu bihi lisoolo ti, Nzaami aakagyughu bihi,
Bihi lisoolo si ti sa likabagha nswe kye ki liiluomo nde.
16 Kala ti mbwuru mono ndunghu mu kana mu okasa lisumu,
lisumu li liiggwene okabiri ku lipfu,
Nyaã nde asamana, ya Nzaami sa agwa laama kundaa munde wu li mu okasa lisumu.
Me mbili obo, mu babo ba baakasa masumu ma maaggwene okabiri ku lipfu.
Lo, me ka ndyele be o, mu osamana mu nkooro mbwuru wu aakasa lisumu li liikabiri mu lipfu.
17 Nswe ndagha yiili ka yili yi a bunsumu o, yili lisumu,
Lo oli a lisumu liili ka liikabiri ku lipfu o.
18 Bihi lisoolo ti nswe munde, wu li mwana a Nzaami ka aafirikasa masumu o,
Mu kuulu Yiisu-Kriste aakakebe nde,
Ya Wu Mubi ka kughu osa nde si elogho o.
19 Bihi lisoolo ti bihi lili baba Nzaami,
Ya byehene bi bili ŋa yulu a nsie, bili kunsa lileene li Wu Mubi.
20 Lo bihi lisoolo si ti Mwana a Nzaami aagyi,
Ya aagwi bihi mayele,
Mpaala bihi lisoolo munde wu li Wu-a-Ngaŋma.
Ya bihi lili mu Ngaŋma mu nzili a Mwana a nde Yiisu-Kriste.
Me nde li Nzaami Wu-a-ngaŋma ya laama lili mibvu ya mibvu.
21 Baana ba me,
Lisa mayele mu banzaami baba mpya!