Mukaana wu a myele wu a
Dzã
OSOMO
Mbwuru wu áasono mukaana wu basoolo nde mu nkwumu yi a «Mukwuru». Baara balagha baakakihi ti ngu Dzã li «Mukwuru» mu kuulu nso-nsono yi básono mukaana wu yili bumõ ya Nsia yi Mbwe yi ósono Dzã ya mikaana mi nde mikimi.
Nde ágweghe mukaana wu kundaa «Mukaha wu ósuolo Nzaami ya kundaa baana ba nde.» Baara baakatsimi ti «Mukaha ya baana ba nde» odzyi olyele ti libwunu li Nzaami ya bakriste ba lo.
Bu me bu baakakaba mukaana wu:
- Mamboro (2Dzã 1.1-3).
- Munsono li mu okagwa bakriste mpama mu okala kunsa engaŋma ya dzyi li banganda (2Dzã 1.4-6).
- Munsono li mu okagyehe bo mu nkooro a baara ba baakalyele mandagha mama mpya (2Dzã 1.7-11).
- Bitsimi bibi oyimono bo (2Dzã 1.12).
- Mamboro mama masini 2Dzã 1.13).
1
Mamboro
1 Wu me mukwuru ndi mu osono mukaana wu kundaa Mukaha wu ósuolo Nzaami ya kundaa baana ba we ba aakandzyi me mu engaŋma kyehene, ka yini a me ngasighi o aakandzyi be, lo ya baara bwohono ba basoolo engaŋma,
2 mu kuulu engaŋma eli mu bihi, ya kye sa ekala ya bihi mu mibvu ya mibvu.
3 Nyaã bubwe, nyiĩ ya edzuunu, bi biikafa kundaa Nzaami Taara, ya kundaa Yiisu-Kriste Mwana a Taara, bikala ya bihi-a-be mu engaŋma ya mu dzyi.
Engaŋma ya dzyi
4 Me aandi a esee ki elagha mu omono baana ba we ba bali mu okadzyara mu nzili yi engaŋma, bwunu a bu oli mukyene wu lígyagha bihi-a-be kundaa Taara.
5 Ya mu matala ma, ma Mukaha, yi nduomo me we yi: Litswe likala a dzyi ŋa kara li bihi-a-be ya mu banganda-baara, ya boho si bakadzyi bihi-a-be. Me ka ndi mu osono we mukyene wu munyaghara o, lo munde wu lili a bihi-a-be obaana ku ebaana.
6 Ya bu me bu oli dzyi: Nyaã be likadzyara ti bwunu a bu ookaluomo mikyene, munde me mukyene wu lígyubu be, obaana ku ebaana.
Ogyehe mu nkooro a banga a mpya
7 Mu kuulu banga-a-mpya balagha baalwulu mu nsie. Bo ka bali mu okakihi o ti Yiisu-Kriste ágyi mu nyuru yi a musunu. Wu aabili obo li mbwuru nga-a-mpya ya mutaara a Kriste.
8 Mu obo, be beme lisa mayele, mu kuulu be linyaã opfihili mimburu mi liibagha bihi mu esala e bihi. Lo be libagha mufuru wu munene.
9 Nswe munde wu aagwene onama luo li Kriste, lo bwehe ndagha nkimi ŋa yulu, ka li mu Nzaami o. Munde wu aanabara mu luo lilo, nde li emõ ya Taara ya Mwana.
10 Mu obo, kala ti mbwuru gyi kundaa be, ya nde ka luo be luo lilo o, ka ligyagha nde kundaa be o, ya ka ligwa nde mboro o.
11 Mu kuulu munde wu aagwa nde mboro, ayi li emõ ya nde mu bigyighili bi nde bi bibi.
Bitsimi bibi oyimono bo
12 Me ndi a mandagha malagha ma olyele be, lo me ka aandzyi osono mo mu mukaana wu o. Mu kuulu me ndi a kana ti me sa ngya kundaa be, ya me sa mbili ya be meme, mpaala esee e bihi-a-be ekala kii mukughu.
Mamboro mama masini
13 Baana ba mbwee a we wu mukaha wu ósuolo Nzaami si, bagwi we mboro.