4
Mufulu wu engaŋma ya mufulu wu a mpya
1 Bandughu ba me baba mukolo,
Ka likasa kana mu mifulu myehene o,
Lo liikakeene mifulu,
Mu osoolo kala ti mye mili mimi Nzaami.
Mu kuulu mibighili mimi mpya milagha miipala mu nsie.
2 Bu me bu liisoolo be Mufulu a Nzaami:
Nswe mufulu wu aalyele ti, Yiisu-Kriste ágyi mu efaana kii mbwuru,
Nde li mufulu a Nzaami.
3 Ya nswe mufulu wu aabihi okihi Yiisu,
Ka li wu a Nzaami o.
Nde li mufulu a mutaara a Kriste,
Wu lígyughu be nsia ti li mu ogya,
Ya mu matala ma nde ayi li mu nsie.
4 Be baana ba me, be lili baba Nzaami,
Ya be liilughulu mibighili mimi mpya mimye,
Mu kuulu munde wu li mu be bvulu bunene,
Ya munde wu li mu nsie.
5 Mibighili mimye mili mimi nsie,
Mu obo mye mili a mbiili yi a nsie,
Ya nsie yiikagyughu mye.
6 Lo bihi, bihi lili baba Nzaami.
Munde wu soolo Nzaami aakagyughu bihi.
Munde wuulu ka ali wu a Nzaami o, ka akaakagyughu bihi o.
Obo me bu liikasoolo bihi Mufulu wu engaŋma ya mufulu wu a mpya.
Nzaami li dzyi
7 Bandughu ba me baba mukolo,
Litswe likakala a dzyi mu banganda-baara,
Mu kuulu dzyi liikafa kundaa Nzaami,
Ya nswe munde wu dzyi,
Nde li mwana a Nzaami ya nde soolo Nzaami.
8 Mbwuru wu ggwene a dzyi mu banganda-baara nkini asoolo Nzaami o,
Mu kuulu Nzaami li dzyi.
9 Bu, me bu oosuo Nzaami dzyi li nde ŋa kara li bihi-a-be:
Nde aagweghe Mwana a nde wu a mbunu mu nsie,
Mu kuulu bihi-a-be likala baba mweẽ mu nde.
10 Ya dzyi lilo lili bu:
Ka oli ti bihi-a-be líidzyi Nzaami o,
Lo me nde áadzyi bihi-a-be,
Ya áagweghe Mwana a nde ti anga mukaba wu osa masumu ma bihi-a-be kolokolo.
11 Bandughu ba me baba mukolo,
Kala ti Nzaami ádzyi bihi-a-be mu eteese kii bu,
Bihi-a-be si lifaana odzyi banganda-baara.
12 Mbwuru si mumõ nkini ámaamono Nzaami o.
Kala ti bihi-a-be liikadzyi banganda-baara,
Nzaami li mu bihi-a-be ya dzyi li nde lili mukughu mu bihi-a-be.
13 Bu me bu liisoolo ti bihi-a-be lili mu nde,
Ya nde li mu bihi-a-be:
Nde aagwi bihi-a-be Mufulu a nde.
14 Ya bihi, bihi liimono nde ya bihi lili mu osuo bumpughulu,
Ti Taara áagweghe Mwana a nde, mu ogyabvwuhu nsie.
15 Nswe mbwuru wu aakihi ti Yiisu li Mwana a Nzaami,
Nzaami li mu nde ya nde li mu Nzaami.
16 Ya bihi, bihi-a-be lisoolo dzyi li oli a Nzaami mu bihi,
Ya bihi-a-be liikasa kana mu lo.
Nzaami li dzyi.
Mbwuru wu li mu dzyi li mu Nzaami, ya Nzaami li mu nde.
17 Bu me bu ookamoŋono dzyi lili mukughu mu bihi-a-be,
Mu kuulu likala a kana mu etsughu kii muyala.
Ya bumweẽ bu bihi-a-be mu nsie yi,
Bukala ti anga bubu Kriste.
18 Mu dzyi ka oli a Nzalamweẽ o,
Lo dzyi lili mukughu liikamaha nzalamweẽ,
Mu kuulu okala a nzalamweẽ ookasuo ti bihi-a-be lili mu okakebe masyeme.
Ya munde wu li a nzalamweẽ, ka li mukughu mu dzyi o.
19 Lo, bihi-a-be liikadzyi banganda-baara,
Mu kuulu Nzaami ádzyi bihi-a-be nsomo.
20 Kala mbwuru lyele ti: «Me ndzyi Nzaami»,
Ya nde li mu okabele nganda-mbwuru,
Nde li nga-a-mpya.
Mu kuulu, mbwuru wu ggwene dzyi nganda-mbwuru wu ali mu okamono nde,
Ka kughu odzyi Nzaami wuulu nde ka aakamono nde o.
21 Li me litumu li ágwi nde bihi-a-be:
Mbwuru wu dzyi Nzaami,
Nde faana odzyi si nganda-mbwuru.