3
1 Limono nki dzyi Taara ali a lo mu bihi-a-be,
Mpaala bata bihi-a-be baana ba Nzaami.
Mu engaŋma, bihi lili baana ba Nzaami.
Me mu obo, baara ba nsie baggwene ogyahaba bihi-a-be,
Mu kuulu bo kaala ka bagyahaba Nzaami o.
2 Bandughu ba me baba mukolo,
Mu matala ma bihi-a-be lili baana ba Nzaami,
Lo bihi-a-be nkini liisoolo bu akala liikala ku nkulu o.
Yi lisoolo bihi-a-be me yiili ka nswe matala ma akala oomoŋono Kriste,
Bihi-a-be sa likala ti nde mu kuulu sa limono nde bwunu a bu ali nde.
3 Ya nswe munde wu li a emiini kii bubo mu Kriste aakatsehebe mukolo a nde,
Ti bwunu a bu oli Kriste wu a tse-tse.
4 Nswe munde wu aakasa masumu,
Nde bubi si aakasa.
Mu kuulu masumu mali bubi.
5 Lo, be lisoolo ti Yiisu ágyi mu ogyamaha masumu ma bihi,
Ya mu nde ka oli a lisumu o.
6 Nswe munde wu li emõ ya nde ka aafirikasa masumu o.
Nswe munde wu aakasa masumu ka aamono nde o, ya ka asoolo nde o.
7 Baana ba me,
Mbwuru anyaã opfiri be.
Mbwuru wu aakasa mandagha mama bunsumu li wu a bunsumu,
Ti bwunu a bu oli Kriste wu a bunsumu.
8 Mbwuru wu aakasa masumu li wu a ndaa dyabulu,
Mu kuulu dyabulu ábaana osa masumu obaana ku ebaana.
Mwana a Nzaami ágyi mu otsala bigyighili bi dyabulu.
9 Nswe munde wu li mwana a Nzaami ka aakasa masumu o,
Buulu bumweẽ bu buufi kundaa Nzaami buli mu nde.
Nde ka kughu ofirisa masumu o,
Mu kuulu nde li Mwana a Nzaami.
10 Limono bunu a bo likughu ogyahaba baana ba Nzaami ya baana ba dyabulu:
Nswe mbwuru wu aagwene okasalala bunsumu ka li mwana a Nzaami o,
Ya bumõ si kundaa wu gwene dzyi nganda-mbwuru.
Dzyi mu bandughu mu kana
11 Mandagha ma lígyughu be obaana ku ebaana me ma:
Litswe likakala a dzyi ŋa kara li bihi-a-be.
12 Bihi-a-be linyaã osa ti bu ósi Kayẽ,
Nde áli mbwuru a dyabulu, ya nde ádzwi mbwee a nde.
Mu emakye nde ádzwi nde?
Mu kuulu bigyighili bi nde bíli bi bibi,
Lo bibi mbwee a nde bíli bibi bunsumu.
13 Bandughu mu kana,
Ka likiŋimi o kala ti baara ba nsie bali mu okabele be.
14 Bihi-a-be lisoolo ti bihi-a-be áyi liimara kunsa lipfu ya lili mweẽ,
Mu kuulu liikadzyi bandughu mu kana.
Mbwuru wu ggwene a dzyi li nkini kunsa lipfu.
15 Mbwuru wu aakabele ndughu mu kana li ti anga munde wu aakadzwa baara.
Be lisoolo ti mbwuru wu aakadzwa baara ka li a laama lili mibvu ya mibvu o.
16 Limono bu liisoolo bihi-a-be dzyi:
Yiisu-Kriste ágwi laama li nde mu nkooro a bihi-a-be.
Me mu obo bihi-a-be si lifaana ogwa laama li bihi mu nkooro a bandughu mu kana.
17 Lo kala ti mbwuru li a bilogho bi nsie yi,
Ya nde mono nganda-mbwuru wu aakeghele mu elogho,
Ya nde kuru mukolo a nde,
Lo bunu a bo dzyi li Nzaami likughu okala mu nde?
18 Baana ba me,
Ka likadzyi yini a mu bibolo ya mu mbiili yimbwe o,
Lo bihi-a-be likala a dzyi li liikamoŋono mu bigyighili ya mu engaŋma.
Kana ŋa nkulu a Nzaami
19 Me obo bihi akala liisoolo ti bihi-a-be lili baba engaŋma,
Ya mikolo mi bihi sa mikala kunsa edzuunu ŋa busu bu nde.
20 Mu kuulu, kala ti mikolo mi bihi mifwunu bihi,
Nzaami bvulu mikolo mi bihi mu bunene ya nde soolo mandagha mwohono.
21 Bandughu ba me baba mukolo,
Kala ti mikolo mi bihi-a-be ka mifwunu bihi o,
Lo bihi-a-be lili a kana ŋa busu bu Nzaami.
22 Ya sa liikagyagha nswe elogho ki liiluomo nde,
Mu kuulu liikasalala mikyene mi nde,
Ya liikasa mandagha ma maakagwa nde esee.
23 Mukyene a nde me wu:
Bihi lifaana osa kana mu nkwumu a Mwana a nde Yiisu-Kriste,
Ya okala a dzyi mu banganda,
Ti bwunu a bu oli mukyene wu ágwi nde bihi.
24 Nswe munde wu aakasalala mikyene mi Nzaami li emõ ya Nzaami, ya Nzaami li emõ ya nde.
Bihi-a-be liikasoolo ti Nzaami li emõ ya bihi,
Mu nkooro a Mufulu wu ágwi nde bihi-a-be.