14
သိုးသားဂန်းဟှားန လူ ၁၄၄,၀၀၀
1 အယ်ဘီးန ငါကေ့လိုက်ဟှူ ခီမာ သိုးသားဂန်းဟှားဟှာ ဇိအုန်တောန်ထတ်မာ ရပ်နေဟှယ်။ သိုးသားဂန်ဟှားရဲ့ နာမန ဖဘုရားသခင်ရဲ့ နာမလေဟှို သူးနို့ရဲ့ ဖူးမာရေးဟှားဟှူသူ ၁၄၄,၀၀၀ လေဟှာ သိုးသားဂန်းဟှားန တူးဒူရှိနေဂေ့ဟှယ်။
2 အယ်ဘီးန ရေကဒန်ဟှက္လဟှူ ရေသံနရော၊ ရရာတိုင်းက္လယ်ဟှူ မိုးကြိုးသံနတူဟှူ ကောန်းဂန်ဟှသံဟှို ငါကြားရဟှယ်။ ငါကြားရဟှူ အယ်သံဟှာ စောန်းသမားလေဟှာ သူးနို့လေရဲ့ စောန်းလေဟှို တီးနေဟှူ သံနလည်းတူဟှယ်။
3 သူးနို့ဟှာ ပလ္လင်ရှေ့မာရော၊ သတ္တဝါလေးပါးန သတ်ကီးဝါဂီးလေရဲ့ ဇာတ်ပေါ့‑က်လေ ရှေ့မာရော ချင်းသစ်ဟှို ဆိုဂေ့ဟှယ်။ မ္လေဂီးထတ်မာ ဝီးကော့‑က်ဘီး ကယ်တန်ခံရဟှူသူ ၁၄၄,၀၀၀ ဟှ လွှဲဘီးဟှာ ဖယ်သူလည်း အယ်ချင်းဟှို သန်ယူနိုင်ဟှ။
4 အယ်သူလေဟှာ မီးမလေန ညစ်ညူးစေဘဲဟှူ သူလေဖြစ်ဂေ့ဟှယ်။ ဖြားဖြစ်ကြောန့်နူးဆိုဟှာ သူးနို့ဟှာ လူပျိုစစ်စစ်ဖြစ်ဂေ့ဟှယ်။ သူးနို့ဟှာ သိုးသားဂန်းဟှား သွားဟှူနေရာဟှို လိုက်ဂေ့ဟှူသူလေ ဖြစ်ဂေ့ဘီး ဘုရားသခင်န သိုးသားဂန်းဟှားတွပ် ဦးသီးဖြစ်ဘီး လူလေထဲမာ ဝီးကော့‑က်ခံရဟှူ သူလေဖြစ်ဂေ့ဟှယ်။
5 သူးနို့ရဲ့ ဇပ်ပေါ့‑က်မာ လီညာရှင်း မှေ့ဟှ။ သူးနို့ဟှာ ပြစ်တန်ဇာမှေ့ဘဲသူလေ ဖြစ်ဂေ့ဟှယ်။
ကောန်းဂန်တမန် သောင်းပါးကြောန်း
6 အယ်ဘီးန တခြားကောန်းဂန်တမန် တပါးဟှာ ကောန်းဂန်လယ်မာ ပ္လန်နေဇာဟှို ငါဗြင်ရဟှယ်။ သူဟှာ မ္လေဂီးထတ်မာနေဂေ့ဟှူ သူလေဖြစ်ဟှူ တိုင်းနိုင်ငံ၊ မျိုးနွယ်စု၊ ဘာသာစကား ဘောန်းဇောင်ပြောဂေ့ဟှူ လူမျိုးလေဟှို ဟောပြောဟှို့တွပ် ထာဝရတည်ဟှူ၊ ကောန်းမြတ်ဟှူ ဒန်းကောန်းဟှို ယူဆောန်လာဟှယ်။
7 အယ်ကောန်းဂန်တမန်ဟှ “ဘုရားသခင်တရားစီရင်ဟှူ ခီဟှာ က္လလာဘီးဖြစ်ဟှူကြောန့် ကိုယ်တော့်ဟှို ကြော့‑က်ဂေ့ဘီး ဂေါင်သရေဟှို ချီးမွမ်းဂေ့ပါ။ ကောန်းဂန်၊ မ္လေဂီး၊ ပန်လယ်န စမ်းရေလေဟှာ ဖန်ဆင်းရှင်ဟှို ကိုးကွယ်ဂေ့ပါ” ဆိုဘီး ရရာတိုင်းက္လယ်ဟှူသံန ကြွေးကြော်လေဟှယ်။
8 အယ်ဘီးန ဒုတိယကောန်းဂန်တမန်ဟှာ လိုက်လာဘီး “တရားဘဲဟှူမေထုန် မှားယွင်းဟှူကြောန့် ရရာတိုင်း ပြင်းထန်ဟှူ ဒေါသစဗျစ်ဝိုင်ဟှို လူမျိုးဂူလောင်းဟှို တိုက်ဟှူ ဗာဗုလုန်ဗြို့ဂီးဟှာ ပြိုက္လဟှားဘီ၊ ပြိုက္လဟှားဘီ!” ဆိုဘီး ကြွေးကြော်လေဟှယ်။
9 နော့‑က်ထပ် တတိယ ကောန်းဂန်တမန်ဟှာ သူးနို့နော့‑က်ဟှ လိုက်လာဘီး၊ “သားရဲန သူးနို့ရဲ့ ရောက်ထုဟှို ကိုးကွယ်ဘီး သူးနို့ရဲ့ ဖူးမာဖြစ်စေ၊ လတ်မာဘဲ့ဖြစ်စေ သူ့ရဲ့ဇိဟှို ခံဟှူသူလေဟှာ
10 ဘုရားသခင်ရဲ့ မျစ်တော်ဖလားဟှ ရရာတိုင်း ပြင်းထန်ဟှူ မျစ်တော် စဗျစ်ဝိုင်ဟှို သော့‑က်ရလေ့မယ်။ အယ်သူလေဟှာ သန့်ရှင်းဟှူ ကောန်းဂန်တမန်လေန သိုးသားဂန်းဟှားရဲ့ ရှေ့မာ ကန့်နရောဟှားဟှူ မီးထဲမာ ညှဉ်းဆဲရှင်းဟှို ခံရလေ့မယ်။
11 သူးနို့ ညှဉ်းဆဲခံရရှင်းရဲ့ မီးခိုးဟှာ ကမ္ဘာဆစ်ဆစ် တတ်ဘီးနေဟှယ်။ သားရဲန သူ့ရဲ့ ရောက်ထုဟှို ကိုးကွယ်ဘီး သူ့နာမယ်ရဲ့ ဇိဟှို ခံယူဟှူသူလေဟှာ နေ့ရောညဉ့်ရော သတ်သာရဟှို့ မှုဟှ” ဆိုဘီး သံက္လယ်ဂီးန ကြွေးကြော်လေဟှယ်။
12 အယ်နေရာမာ ဘုရားသခင်ရဲ့ ပညတ်တော်လေဟှိုရော၊ ယေရှုဟှို ယောင်ကြည်ရှင်းဟှိုရော၊ စောန့်ထီးဟှူ သန့်ရှင်းသူလေရဲ့ သီးခံရှင်း ရှိဟှယ်။
13 အယ်ဘီးန ကောန်းဂန်ဘောင်ဟှသံဟှာ “ရေးဟှားလိုက်။ ခုဟှစဘီး သခင်ဘုရားရဲ့ မှုဟှိုဆောန်ဘီး သေဟှားဟှူ သူလေဟှာ မင်္ဂလာရှိဟှယ်!” ဆိုဘီး ပြောဇာဟှို ငါကြားရဟှယ်။ ဝိညာဉ်တော်ဟှလည်း “မှန်ဟှယ်! သူးနို့ဟှာ ဆင်းရဲပန်ဗန်းဘီး လောက်ဆောန်ရှင်းဟှနေဘီး နားယူရဟှူခွမ့်ဟှို ရဂေ့လေ့မယ်။ ဖြားဖြစ်ကြောန့်နူးဆိုဟှာ သူးနို့လောက်ဆောန်ဟှူ ကျိုးလေဟှာ သူးနို့နတူးဒူ ပါလိုက်ဟှားကြောန့် ဖြစ်ဟှယ်” ဆိုဘီး မိန့်တော်မူလေဟှယ်။
မ္လေးဂီးမာ သီးနှံရိသီးရှင်း
14 နော့‑က်တခါ ငါကေ့လိုက်ဟှူခီမာ ဖ္လူဟှူမိုးတီရှိဘီး အယ်မိုးတီထတ်မာ ခေါန်းထတ်မာ ရွှေသရဖူဟှို ဆောန်းဘီး လတ်မာ ရရာတိုင်း ထတ်ဟှူဇင်ဟှို ကိုင်ဟှားဟှူ လူသားနတူဟှူ တယော့‑က်ဟှာ ထိုင်နေဟှယ်။
15 အယ်ဘီးန တခြားကောန်းဂန်တမန် တပါးဟှာ ဗိမာန်တော်ထဲဟှ ထွပ်လာဘီး မိုးတီထတ်မာ ထိုင်နေဟှူသူဟှို “မ္လေဂီးထတ်မာ ရိရဟှို့ဇာလေဟှာ မှည့်ဟှားဘီဖြစ်ဟှူကြောန့် ရိသီးဟှို့တွပ် ခီက္လဟှားဘီး ဖြစ်ဟှူကြောန့် ကိုယ်တော်ရဲ့ ဇင်ဟှိုလွှတ်ဘီး ရိသီးပါ” ဆိုဘီး ရရာတိုင်း က္လယ်ဟှူသံန ကြွေးကြော်လေဟှယ်။
16 အယ်ခီမာ မိုးတီထတ်မာ ထိုင်နေဟှူသူဟှာ သူ့ရဲ့ ဇင်ဟှို မ္လေဂီးဟှို သွမ်းလိုက်ဘီးဟှာ မ္လေဂီးဟှာ ရိသီးရှင်းဟှို ခံရလေဟှယ်။
17 အယ်ဘီးန တခြားကောန်းဂန်တမန် တပါးဟှာ ကောန်းဂန်မာရှိဟှူ ဗိမာန်တော်ထဲဟှ ထွပ်လာဟှယ်။ သူ့မာလည်း ရရာတိုင်း ထတ်ဟှူဇင် ပါဟှယ်။
18 အယ်ဘီးန မီးဟှိုအောက်စိုးဟှူ တခြားကောန်းဂန်တမန်တပါးဟှာ ယဇ်ပလ္လင်ထဲဟှ ထွပ်လာဘီး ရရာတိုင်း ထတ်ဟှူဇင်ပါဟှူသူဟှို “စဗျစ်သီးလေ မှည့်ဟှားဘီ ဖြစ်ဟှူကြောန့် နန့်ရဲ့ ရရာတိုင်း ထတ်ဟှူဇင်ဟှို လွှတ်ဘီး မ္လေဂီးထတ်မာရှိဟှူ စဗျစ်ခိုင်လေဟှို ရိသီးလိုက်” ဆိုဘီး ရရာတိုင်း က္လယ်ဟှူသံန ပြောလေဟှယ်။
19 အယ်ကောန်းဂန်တမန်ဟှလည်း သူ့ရဲ့ဇင်ဟှို မ္လေဂီးထတ်မာ သွမ်းလိုက်ဘီး မ္လေဂီးထတ်ဟှ စဗျစ်ပန်လေဟှို ရိသီးဘီး ဘုရားသခင်ရဲ့ ရရာတိုင်းပြင်းဟှူ ဒေါသနဆိုင်ဟှူ၊ ရရာတိုင်းကီးဟှူ စဗျစ်သီးနယ်ဟှူ တွမ်းထဲဟှို လွန်းခ္လလိုက်ဟှယ်။
20 ဗြို့ပ္လန်မာရှိဟှူ စဗျစ်သီးနယ်ဟှူ တွမ်းမာ နန်းလိုက်ဟှူ ခီမာ သွီးဟှာ အယ်စဗျစ်သီးနယ်ဟှူ တွမ်းထဲဟှ စီးထွပ်လာဘီး ဗြင်းရဲ့ ဇစ်ကြိုးထိမီဘီး ၁၈၄ မိုင်လော့‑က်ထိ ပံ့နှံ့ဟှားလေဟှယ်။