7
Faazuɓɛtɛ zalaɠai
1 «Wɛlɛ faazuɓɛtɛ zalaɠa lɔgi ʋa: Ani ʋe gola ɲadegai.
2 Adaʋɛ ti gala zalaɠai ɠɔdaaleʋezu ná, miná ɠa faazuɓɛtɛ zalaɠa zuai ɠɔdaaleʋezu ná. Ma ɲamai ɠa ʋili zalaɠa ɠulazuʋɛ ma, é ɠaku ma kpoloo.
3 Ta ma wulɔi kpein kula: ma wɔɔngi, ta ma wulɔi felevelegai koozu zɔɔlaiti ma,
4 ta ma lɔɠɔ felegɔiti, ta ma wulɔi felevelegai ti ma, é ʋɛɛzu ma zaamalɔkaeiti ma, ta ma mɔɔin ʋasuʋɛ, a kula ma lɔɠɔiti kobaʋɛ.
5 Zalaɠa ɠula nui ɠa naa ɠala zalaɠa ɠulazuʋɛ. Faazuɓɛtɛ zalaɠai ʋe, nii abui galazu, Ɠɔoɠɔ GALAGI ʋɛ.
6 Zunuiti kpein ti wo zaama ga zalaɠa ɠula nuiti, naati ta ta mi, é mi ada ɲadegai ta. Ani ʋe gola ɲadegai.
7 «Toɠa ɠɛ ɠana faazuɓɛtɛ zalaɠai vaa zu, eɠɛʋelei nɔ é la koto gba zalaɠai vaa zu. Tɔgi naa ɠa ga faa ɠila nɔ zalaɠa felegɔi naati faa zu, ma zuai ɠa ɠɛ ga zalaɠa ɠula nui nɔnɔ, nii é kotoi gbazu.
8 Zalaɠa ɠula nui é ʋaazu gala zalaɠai ɠulazu, nui ta ʋɛ, nɔnɔi ɠa ɠɛ ga gala zalaɠai ma ɠɔlɔgi, nii é kulaai ga zalaɠai.
9 Vebɛanii kpein mɔgai fuului zu, ɓaa anii ɠee kɔlu liɠii ma, ɓaa anii ɠee kɔlui maazu, naa ɠa ɠɛ ga zalaɠa ɠula nui nɔnɔ, nii é kulaai.
10 Vebɛanii kpein gaayɔgai ga gulɔi, ɓaa ma vɔɔi, naa ɠa ɠɛ ga Aalɔn ná-doun zunuiti kpein tɔnɔ, ti ɠilagilagi pɛ.
Ziilɛi zalaɠai
11 «Ziilɛi zalaɠai ma lɔgi ʋɛtɛ, nii nu a kula Ɠɔoɠɔ GALAGI ʋɛ:
12 Ni nui ta a ziilɛi zalaɠai ɠulana ga mama fee zalaɠai, toɠa kula ga ɓulu ʋɛlɛʋɛlɛgiti lɛʋɛ la su, gaayɔgai ga gulɔi, é ʋɛɛ ɓulu lɛɛvɛi ʋa, nii lɛʋɛ la su, gulɔi ʋuai ma, ta ɓulu ʋɛlɛʋɛlɛgiti, kpɛtɛai ga ɓulu vukɔ ʋagɔi, gaayɔgai ga gulɔi.
13 Toɠa ɓului ɠula ɓalaa, nii lɛʋɛi su, é pɛɛ ná-ziilɛi zalaɠai ʋa, mama fee vai zu.
14 Vebɛani ɠilagilagi tago ɠa ɠula ma Ɠɔoɠɔ GALAGI ʋɛ. Naa ʋolu ta ɠɛ ga zalaɠa ɠula nui nɔnɔ, nii é ziilɛi zalaɠai ma ɲamai ʋiliai.
15 Ziilɛi zalaɠa zuai ɠa mi, naama voloi nɔ é ɠulazu la mama fee vai zu. Nu mina tanɔpɛ zɛ sobu ʋa zeeli.
16 «Ni nui ta a zalaɠa ɠulana minazeɠe daazeeli vaa zu, ɓaa vebɛanii vaa zu é daai ɠisu, ma zuai ɠa mi, naama voloi nɔ é kulazu la, nii a yɛ ʋoluzu, naa ɠa mi poluma zobui.
17 Nii é yɛsu ga zalaɠa zuai mɔtai foloi zaʋasiɛi, naa ɠa ɠala.
18 Ni nu a naama yiilɛi zalaɠa zuai ta miina foloi zaʋasiɛi, zalaɠai laa la mɔ zoga, é la faa ʋaa naa ma, nii é kula. Toɠa ɠɛ ga anii kɔzɔai, nu-o-nu a ta miina, ná-faaɠaaza golai ma ɠasɔi ɠa la unma.
19 «Ma zuai fɔɔɠuai kɔzɔba anii ta ʋa, nu mina naa mi ɲɛgɛlɛin. Ma zuai ɠa ɠala.
«Nui niiti kpein ti la ɠɔzɔni tɔgi letemazu, naati ta zoo ti ziilɛi zalaɠa zuai ta mi.
20 Kɛlɛ nui nii kɔzɔai tɔgi letemazu, naa a ziilɛi zalaɠa zuai ta miina, é ga Ɠɔoɠɔ GALAGI nɔnɔi, naama nui ɓe ka leʋe ná-nuɓusɛiti ba.
21 Zɔi a vɔɔɠuna anii ta ʋa, nii kɔzɔai, nuɓusɛi kɔzɔai, ɓaa suai kɔzɔai, ɓaa ani nɔpɛ é ga kɔzɔba anii, é ziilɛi zalaɠa zuai mi, é ga Ɠɔoɠɔ GALAGI nɔnɔi, naama nui ɓe ka leʋe ná-nuɓusɛiti ba.»
Tɔgi é lo sua wulɔi
ta ɲamai mii vai ʋa
22 Ɠɔoɠɔ GALAGI ɓɔɛni Moize ʋɔ, é ɠɛ ma:
23 «Ɓɔɛ Izelayɛle nuiti pɔ, è ɠɛ ti ma: À mina nikɛ, ɓaa baala, ɓaa boli wulɔi mi ɲɛgɛlɛin.
24 Suai saai ɓɔɠɔ ʋɛ, ɓaa dɔɓɔ zuai ta paai, naama wulɔi ɠa zoo é ɠɛ ga wo-maavai ta ɠɛɛ anii nɔ, kɛlɛ wo la mia ɲɛgɛlɛin.
25 Zɔi a suai ma wulɔi ta mi, é ɠulazu ga zalaɠai, é ɠalazu abui ɠa Ɠɔoɠɔ GALAGI ʋɛ, naama nui ɓe ka leʋe ná-nuɓusɛiti ba.
26 Ʋɛ nɔpɛ wa ɠɛ ná, à mina ɲamai mi, wɔnii nɔnɔi, ɓaa suai nɔnɔi.
27 Zɔi nɔpɛ a ɲamai mi, ma zii nɔpɛ, naama nui ɓe ka leʋe ná-nuɓusɛiti ba.»
Zalaɠa ɠula nuiti ti-laamiizuʋɛ
28 Ɠɔoɠɔ GALAGI ɓɔɛni Moize ʋɔ, é ɠɛ ma:
29 «Ɓɔɛ Izelayɛle nuiti pɔ, è ɠɛ ti ma: Zɔi a ná-ziilɛi zalaɠai ɠula Ɠɔoɠɔ GALAGI ʋɛ, toɠa Ɠɔoɠɔ GALAGI nɔnɔi zeɠe ba.
30 Zalaɠai nii maanɛai é ɠala abui ɠa, Ɠɔoɠɔ GALAGI ɠaazu, toɠa ʋa ga naa ɓɔɠɔ ʋɛ, ma wulɔi, ta ma ɠekegi, é ti latɛɠɛ vai ma ʋoogi ɠɛ Ɠɔoɠɔ GALAGI ɠaazu.
31 Zalaɠa ɠula nui ɠa ma wulɔi ɠala zalaɠa ɠulazuʋɛ. Ma ɠekegi ɠa ɠɛ ga Aalɔn ta ná-doun zunuiti tɔnɔ.
32 Wa-yiilɛi zalaɠaiti ka, wa ma yeezazu ɓalai ve zalaɠa ɠula nui ya.
33 Aalɔn ná-doun zunuiti su, zɔi a ziilɛi zalaɠai ma ɲamai ta ma wulɔi ɠulana, naa ɠa ma yeezazu ɓalai zɔlɔɔ, é ɠɛ ga nɔnɔ.
34 Mazɔlɔɔ ziilɛi zalaɠaiti su, nii Izelayɛle nuiti ti kulazu, ma ɠekegi ta ma ɓalai niiti ta ɗa ɠula ga datɛɠɛ vai ma ʋoogi, nà ti zeɠe, gè ti ve zalaɠa ɠula nui Aalɔn ya ta ná-doun zunuiti zea, ga ɠɔoɠɔ tɔgi Izelayɛle nuiti ta so.»
35 Daamiizuʋɛ ɠana, Aalɔn ta ná-doun zunuiti ti sɔlɔɔsu, zalaɠaiti su ti ɠalaai abui ɠa, Ɠɔoɠɔ GALAGI ʋɛ, é zo naama voloi ma, yeei ti lɛɛzu la ga ti zalaɠa ɠula wotii ɠɛ.
36 Naa ɠa Ɠɔoɠɔ GALAGI Izelayɛle nuiti devezu la, ga é ve ti ya, é zo naama voloi ma, yeei gulɔ ɲadegai ziaa la ti ma. Toɠa ɠɛ ga ɠɔoɠɔ tɔgi ti-mavofodaiti kpein bɛ.
37 Gala zalaɠai ma lɔgiti kana, ta vebɛanii, ta koto gba zalaɠai, ta faazuɓɛtɛ zalaɠai, ta nu zei vai ma zalaɠai, ta ziilɛi zalaɠai.
38 Ɠɔoɠɔ GALAGI ma leveiti feeni Moize ya, Sinayi gizei ma, voloi é devei veeni la Izelayɛle nuiti zea, ga ti ta-vebɛanii ve Ɠɔoɠɔ GALAGI ʋɛ Sinayi teʋebai zu.