GALA Sɛʋɛi Leevi 8

ZALAƓA ƓULA NU MƆUNGITI
FEE VAI GALA BƐ

(8:1--10:20)

Aalɔn ta ná-doun zunuiti
fee vai GALA bɛ

(Ɛgezɔde 29:1-37)

1 Ɠɔoɠɔ GALAGI ɓɔɛni Moize ʋɔ, é ɠɛ ma: 2 «Aalɔn zeɠe ta ná-doun zunuiti ʋɔɔma, ta zalaɠa ɠula zeɠeiti, ta siɛma wulɔ ɲadegai, ta koto gba nikɛ zinɛi, ta baala sinɛ felegɔiti, ta ɓului lɛʋɛ la su, naama ɓɔlɔgi. 3 Bɛbɛi kpein toli GALA daaɠomi seɠe ʋɛlɛi laaʋɛ.» 4 Moize naa ɠɛɛni, nii Ɠɔoɠɔ GALAGI deveni ga é kɛ. É bɛbɛi ɠaalɛɛni ba GALA daaɠomi seɠe ʋɛlɛi laaʋɛ.

5 Moize ɠɛni bɛbɛi ma: «À pɛtɛ, nii Ɠɔoɠɔ GALAGI deveai ga é ɠɛ.» 6 Moize ʋaani ga Aalɔn ta ná-doun zunuiti, é ti maagba ga ziɛi. 7 É seɠewuzeɠei looni Aalɔn ɠɔba, é saamaɠili ga saamaɠiligi. É tookɔba wolai looni kɔba, é zalaɠa ɠula zeɠei loo maazu, é gili ga zalaɠa ɠula zeɠei ma lokoi. 8 É kakazu zeɠei ʋilini kɔbu, é wuulimegi ta tumimegi ʋu kakazu zeɠei zu. 9 É bɔɔlɔgi lɔɔni nɔungi ʋa, é zanu sɛʋɛ goi ɠili kakalaʋɛ, nii é ga fee vai ma ʋoogi GALA bɛ, eɠɛʋelei Ɠɔoɠɔ GALAGI ma levei veeni la Moize ya.

10 Moize siɛma wulɔ ɲadegai zeɠeni, é siɛ seɠe ʋɛlɛ ɲadegai ma, ta aniiti kpein ti ɠɛni ná, ʋele ɠana é ti veeni la GALA bɛ. 11 É faza daa ɠɛɛni lɔfela zalaɠa ɠulazuʋɛ ma. É gulɔi ziɛni zalaɠa ɠulazuʋɛ ma, ta ná-sɔɔlaiti kpein, ta maagba aniɲakai ta ná-seiga anii, naa ɠa a kɛ é ti ve GALA bɛ. 12 É siɛma wulɔ ɲadegai ʋuuni Aalɔn nɔungi zu, é ta ziɛ ma, nii a kɛ é fe GALA bɛ. 13 Moize ʋaani ga Aalɔn ná-doun zunuiti, é ti maaɠili ga seɠewuzeɠeiti, é ti zaamaɠili ga saamaɠiligiti, é bɔɔlɔgiti dɔ ti unba, eɠɛʋelei Ɠɔoɠɔ GALAGI ma levei veeni la zea.

14 É ʋaani ga koto gba nikɛ zinɛi. Aalɔn ta ná-doun zunuiti ti yeeiti pɛɛni koto gba nikɛ zinɛi unmaʋɛ. 15 Moize kɔdaaleʋeni, é ɲamai zeɠe, é ta ziɛ ga yeeɓeɠai zalaɠa ɠulazuʋɛ ma minɛiti ma, é zalaɠa ɠulazuʋɛ ɲade. É ɲamai mɔtai ʋuuni ya, zalaɠa ɠulazuʋɛ ɠɔɠɔaʋɛ, é ɲade ga koto gba vai ɗa ɠɛ ná. 16 É ma wulɔi kpein seɠeni, nii felevelegai koozu zɔɔlaiti ma, ta ma mɔɔin ʋasuʋɛ, ta ma lɔɠɔ felegɔiti, é ɓɔ ti-ma wulɔiti ba, é naa ɠalani zalaɠa ɠulazuʋɛ. 17 Kɛlɛ é nikɛ zinɛi mɔtai ɠalani ti-ʋuuzuʋɛ ʋoluʋɛ, eɠɛʋelei Ɠɔoɠɔ GALAGI ma levei veeni la zea: ma zuai, ta ma ɠɔlɔi, naa ʋɛɛ ma ɓooiti ba.

18 É ʋaani ga gala zalaɠai ma ʋaala sinɛi. Aalɔn ta ná-doun zunuiti ti yeeiti pɛɛni baala sinɛi unmaʋɛ. 19 Moize kɔdaaleʋeni, é ma ɲamai ʋili zalaɠa ɠulazuʋɛ ma, é ɠaku ma kpoloo. 20 É baala sinɛi leʋeleʋeni, é kpulukpulu. É ma ungi ɠalani, ta ma ɓulukpulugiti, naa ʋɛɛ ma wulɔi ʋa. 21 É koozu zɔɔlaiti gbani ga ziɛi, ta kɔɠɔiti. É baala sinɛi pɛ galani zalaɠa ɠulazuʋɛ. Gala zalaɠai ɠɛni de, zalaɠai nii abui galaai, makugi nɛai Ɠɔoɠɔ GALAGI ʋɛ, eɠɛʋelei Ɠɔoɠɔ GALAGI ma levei veeni la Moize ya.

22 É ʋaani ga zɔɔma ʋaala sinɛi, ti zei vai ma ʋaala sinɛi. Aalɔn ta ná-doun zunuiti ti yeeiti pɛɛni baala sinɛi unmaʋɛ. 23 Moize baala sinɛi ɠɔdaaleʋeni, é ma ɲamai ta zeɠe, é siɛ Aalɔn yeezazu ʋele woi yɔkpɔgi ma, ta zeezazu yeezinɛ kpotogi ma, ta zeezazu ɠɔɠɔzinɛkpotogi ma. 24 É ʋaani ga Aalɔn ná-doun zunuiti, é ɲamai ziɛ ti-yeezazu ʋelei woi yɔkpɔgiti ma, ta ti-yeezazu yeezinɛkpotogiti, ta ti-yeezazu ɠɔɠɔzinɛkpotogiti. É ɲamai mɔtai ʋilini zalaɠa ɠulazuʋɛ ma, é ɠaku ma kpoloo. 25 É ma wulɔi zeɠeni, ta ma wɔɔngi, ta ma wulɔi kpein felevelegai koozu zɔɔlaiti ma, ta ma mɔɔin ʋasuʋɛ, ta ma lɔɠɔ felegɔiti, é ɓɔ ti-ma wulɔi ʋa, ta zeezazu ɓalai. 26 Ɓului lɛʋɛ la su, naama ɓɔlɔgi, nii seiɗai Ɠɔoɠɔ GALAGI ɠakala, é ɓulu ɠila seɠeni naama ɓɔlɔgi zu, ta ɓulu ʋɛlɛʋɛlɛ gila gulɔi ba, ta ɓulu lɛɛvɛ ɠila, é ti ʋuuni zalaɠa zuai ma wulɔi ma, ta ma yeezazu ɓalai ma. 27 É naama aniiti kpein puuni Aalɔn ta ná-doun zunuiti zea waa, ga ti ti latɛɠɛ vai ma ʋoogi ɠɛ Ɠɔoɠɔ GALAGI ɠaazu. 28 Naa ʋolu, Moize ti ɠulani ti ya, é ti ɠala, zalaɠa ɠulazuʋɛ, gala zalaɠai maazu. Ti zei vai ma zalaɠai ɠɛni de, zalaɠai nii abui galaai, makugi nɛai Ɠɔoɠɔ GALAGI ʋɛ.

29 Moize ti zei vai ma ʋaala sinɛi ma ɠekegi zeɠeni, é datɛɠɛ vai ma ʋoogi ɠɛ Ɠɔoɠɔ GALAGI ɠaazu. Moize nɔnɔi ɠɛni ga naa, eɠɛʋelei Ɠɔoɠɔ GALAGI ma levei veeni la zea.

30 Moize siɛma wulɔ ɲadegai ta zeɠeni, ta ɲamai ta, nii é ɠɛni zalaɠa ɠulazuʋɛ. É ti vaza Aalɔn ta ná-seɠeiti ma, naa ʋɛɛ Aalɔn ná-doun zunuiti ta ta-zeɠeiti ba. É Aalɔn veeni GALA bɛ, ta ná-seɠeiti, naa ʋɛɛ ná-doun zunuiti ta ta-zeɠeiti ba.

31 Moize ɠɛni Aalɔn ta ná-doun zunuiti ma: «À suai ɠili GALA daaɠomi seɠe ʋɛlɛi laaʋɛ. Miná ɠa wa mi ná, é ʋɛɛ ɓului ʋa, nii é wo zei vai ma ɓɔlɔgi zu, eɠɛʋelei gè deveni la, gè ɠɛ ma: ‹Aalɔn ta ná-doun zunuiti ta mi.› 32 Suai ta ɓului mɔtai é yɛsu, wa naa ɠala. 33 Wa yɛ GALA daaɠomi seɠe ʋɛlɛi laaʋɛ eyɛsu folo lɔfela, wo mina zeɠe ná, eyɛsu wo zei voloi liegɔi laazeeli, mazɔlɔɔ folo lɔfela ɠa é ɠɛɛzu ga wo zei voloi. 34 Nii kɛai za, Ɠɔoɠɔ GALAGI deveʋɛ ga naa ɠɛ wo ʋɛ ga koto gba vai. 35 Wa yɛsu deɠɛmu GALA daaɠomi seɠe ʋɛlɛi laaʋɛ folo lɔfela, folo ʋɛɛ kpidi ʋa, wa Ɠɔoɠɔ GALAGI ná-deveiti so, naa ɠa a kɛ wo mina za, mazɔlɔɔ naa ɠa ma levei veeni zèa.» 36 Aalɔn ta ná-doun zunuiti ti naama vaiti kpein kɛɛni, nii Ɠɔoɠɔ GALAGI ma levei veeni ga Moize maaʋele.