6
Gala zalaɠaiti
ta vebɛaniiti ma lɔgiti
1 Ɠɔoɠɔ GALAGI ɓɔɛni Moize ʋɔ, é ɠɛ ma:
2 «Niima levei ve Aalɔn ta ná-doun zunuiti zea, è ɠɛ ti ma: Gala zalaɠai ma lɔgi ɠaa: Gala zalaɠai ɠa yɛ zalaɠa ɠulazuʋɛ ma lutui zu, kpidii ɲɛgɛlɛin eyɛsu sobui, zalaɠa ɠulazuʋɛ ma abui ɠa yɛ sosu.
3 Sobui, zalaɠa ɠula nui ɠa ná-seɠei loo ɠɔba, é ʋɛlɛ kpuɠagi lɛ ɓɔɠɔ ma, niiti ti ga gezei. Toɠa zuʋui ɠula, nii abui kulaai gala zalaɠai ɠalazuʋɛ, toɠa sei zalaɠa ɠulazuʋɛ ɠoba.
4 Naa ʋoluma toɠa ná-seɠeiti pu, é taɠiligaa loo, ga é li ga zuʋui ti-ʋuuzuʋɛ ʋoluʋɛ, ada ɲadegai ta zu.
5 Abui ɠa yɛ sosu zalaɠa ɠulazuʋɛ, é mina za ɲɛgɛlɛin. Sobu-o-sobu, zalaɠa ɠula nui ɠa abui lo koʋii ʋa, é gala zalaɠai ɓɛtɛ, é ziilɛi zalaɠaiti ma wulɔi ɠala.
6 Abui ɠa yɛ sosu ɠɔ zalaɠa ɠulazuʋɛ, é mina za.
7 «Vebɛanii ma lɔgi ɠaa: Aalɔn ná-doun zunuiti ta kula Ɠɔoɠɔ GALAGI ɠaazu, zalaɠa ɠulazuʋɛ ɠakalaʋɛ.
8 Zalaɠa ɠula nui ɠa zeeɲɛ gila seɠe ani vukɔi zu, nii gulɔi ʋuai ma, é pɛɛ ani maku nɛɛnɛgi kpein ba. Toɠa naa ɠala zalaɠa ɠulazuʋɛ ga ɠizɛsui, makugi nɛai Ɠɔoɠɔ GALAGI ʋɛ.
9 Aalɔn ta ná-doun zunuiti ta vebɛanii mɔtai mi. Ta mi ada ɲadegai ta, GALA daaɠomi seɠe ʋɛlɛi ma ɠoizuʋɛ, kɛlɛ lɛʋɛ mina ɠɛ ba.
10 Nu mina lɛʋɛ ʋu ma, é ʋa mɔ da. Tɔnɔi ɠana gè feai ti ʋɛ nà-vebɛaniiti su, ti ɠalazu abui ɠa. Ani ʋe gola ɲadegai, eɠɛ koto gba zalaɠai ɓaa faazuɓɛtɛ zalaɠai.
11 Zunui kpein ka ta mi, Aalɔn ná-doun zunuiti saama. Tɔgi ɠana wo-mavofodaiti kpein bɛ eyɛsu ɠɔ, é lo vebɛaniiti ba, ti ɠalazu Ɠɔoɠɔ GALAGI ʋɛ. Nu-o-nu a vɔɔɠu ba, naa ɠa ɲade.»
12 Ɠɔoɠɔ GALAGI ɓɔɛni Moize ʋɔ, é ɠɛ ma:
13 «Wɛlɛ vebɛanii ʋa, Aalɔn ta ná-doun zunuiti ta fe Ɠɔoɠɔ GALAGI ʋɛ, foloi ta gulɔ ɲadegai ziɛna la ti ma: kilo saʋagɔ ɓulu vukɔ ʋagɔi zu, gilazuʋɛ sobui, gilazuʋɛ kpɔkɔi, eɠɛ folo-o-folo vebɛanii.
14 Ɓulu vukɔi ɠa ɠaayɔ ga gulɔi, é la gee kɔlui maazu. Ɗa geegai ta teʋeleʋeai ɠula ga zalaɠai, makugi nɛai Ɠɔoɠɔ GALAGI ʋɛ.
15 Zalaɠa ɠula nui niigi, Aalɔn ná-doun zunuiti saama, gulɔ ɲadegai a ziɛ ma ga é zei potogi zu, naa ɓalaa ɠa vebɛanii naa ɠula. Ɠɔoɠɔ tɔgi ʋe. Toɠa ɠala ɲɛgɛlɛin Ɠɔoɠɔ GALAGI ɠaazu.
16 Zalaɠa ɠula nui ná-zalaɠai kpein ka ɠala ɲɛgɛlɛin, tanɔpɛ ge la mia.»
Koto gba zalaɠai
17 Ɠɔoɠɔ GALAGI ɓɔɛni Moize ʋɔ, é ɠɛ ma:
18 «Ɓɔɛ Aalɔn ʋɔ ta ná-doun zunuiti, è ɠɛ ti ma: Koto gba zalaɠai ma lɔgi ʋɛtɛ. Adaʋɛ gala zalaɠai ɠɔdaaleʋezu ná, miná ɠa koto gba zalaɠa zuai ɠɔdaaleʋezu ná, Ɠɔoɠɔ GALAGI ɠaazu. Ani ʋe gola ɲadegai.
19 Zalaɠa ɠula nui é koto gba zalaɠai ɠulazu, naa ɠa mi. Toɠa mi ada ɲadegai ta, GALA daaɠomi seɠe ʋɛlɛi ma ɠoizuʋɛ.
20 Nu-o-nu a vɔɔɠu ma zuai ʋa, naa ɠa ɲade. Ni ma ɲamai a vazana seɠe ma, ʋɛ fazagai ná ma, miná ɠa gba ada ɲadegai ta.
21 Pɔlɔ liɠii a ɠili su, naa ɠa wolo. Ni kɔlu ɓɔi diɠii ɠa a ɠili su, su ɠa ɓale, é gba ziɛi wu.
22 Zunui kpein é ga zalaɠa ɠula nui, naa pɛ ka ta mi. Ani ʋe gola ɲadegai.
23 Kɛlɛ nu la zalaɠa zua nɔpɛ mia, nii ma ɲamai a ʋa GALA daaɠomi seɠe ʋɛlɛi wu, ga koto gba vai ʋa ɠɛ ada ɲadegai. Ma zuai ɠa ɠala.