89
Akitepna Asem Jeh In Pathen Thangvah In Umhen.
Ezrah mi Ethan labol.
 
1 Keiman Pakai mi ngailutna longlou thu hi vahchoi lan sajing tange!
Khangdong ho leh tehse hon na kitahna hi ajauvin ahi.
2 Na mingailutna longlou hi itih hijongleh um jing ding ahi.
Na kitahna hi vanho bangin aum jinge.
 
3 Pakaijin hitin aseije, “Ka lhendoh kasohpa David toh kitepna kana bol ahi.
Hiche kitepna a hi kana kihahsel ahi:
4 'Keiman na chilhah te chu lenga katun jing ding ahi;
amaho na laltouna a chu tua pat tonsot geiya tou jing diu ahi.'”
Selah
5 Pakai, van mite jousen na kidanna ho a hi na vahchoi diu ahi.
Na kitahna ho jeh a hi sim joulou vantil ten na vahchoi diu ahi.
6 Ajeh chu van gam a umho jouse koipen tah hi Pakai toh tekah thei umbeh am?
Vantil thupipen ho jeng jong Pakai toh tekahpi thei um'am?
7 Vantil thanei pen ho jong Pathen ang'a kithing thinga ahi bouve.
Ama hi alaltouna vel a ding ho jousen jong agimneina apha pouve.
8 O Pakai Van Sepai te Pathen!
Hoilai mun a nang tobanga thanei umbeh am, Pakai?
Nang hi kitahna lhingset nahi.
 
9 Twikhanglen jong na thaneina noiya um'a ahi.
Nangin huipi le twipi kithoa twi kinong jong na sutang'e.
10 Twikhanglen'a um sa lenpen ho jong na sugep e.
Naban thahat in nagal mite jong na thecheh jitai.
11 Vanho jouse jong nanga ahin, leiset jong nanga ahin;
vannoi a um thil jouse jong aboncha nanga ahin—nangin nasem ahi.
12 Nangin sahlang lhanglang jong nasem ahi.
Tabor Mol leh Hermon Mol'in jong namin athangvah ahi.
13 Naban tha hi iti hat hitam!
Nakhut hi iti hat hitam!
Na jetlang jong hi na thahat loupi tah in adom sange.
14 Chonphatna le thudih chu na laltouna khombul ahi.
Longlou ngailutna le kitahna chu na lhachate bangin na angsung'ah avahlen ahi.
15 Pathen houna dinga kipa umtah kouna jaho chu anunnom ahiuve,
ajeh chu Pakai amaho hi na umpina vah a chu lhale diu ahi.
16 Na minthanna kidang tah ho hi ama hon nilhum kei keija akipapi diu ahi.
Ama hon na chonphatna hi akithang-atpi uvin ahi.
17 Nangma hi amaho dinga thahatna loupi tah chu nahi.
Keiho thahat sah ding hi nangma kipana ahi.
18 Ahi, keiho hoidohna hi Pakai a kon ahi.
Chuleh Israel Pathen hin leng jong eipeh u ahi.
 
19 Masang lai in kitah-tah a nangma jui na mipi te lah a gaothu na-na seijin ahi.
Nangin nasei in, “Keiman galsat ding kana lhengdoh e.
Keiman milham ho lah a konna leng ding jong kana lhendoh ahi.
20 Keiman kasoh David kana mudoh e.
Chuleh ka thao theng kana nun ahi.
21 Keiman kakhut a kana dindoh sah a;
kaban thahatna kahatdoh sah ding ahi.
22 Agal miten ajolou diu,
ahilouleh miphalou hon jong atha joulou diu ahi.
23 Keiman akidoupi ho hi amasang tah a kasuh lhuh ding ahin
chuleh ama dou ho jouse jong ka suhmang ding ahi.
24 Ka kitahna leh ka ngailutna longlou hin aumpi jing ding,
ka thuneina jalla ama hi atha kahat sah jing ding ahi.
25 Keiman twikhanglen chunga jong athaneina kalhun lut ding,
vadung ho chung jenga jong vai ahom ding ahi.
26 Chutengleh aman eihin kou intin, “Nangma Kapa nahin,
ka Pathen, ka songpi le ka sochatna nahi,” ati ding ahi.
27 Keiman Ama hi ka chapa masapen,
leiset chunga leng thaneipen kahi sah ding ahi.
28 Ka ngailut ding chuleh tonsot gei a ka khoto ding;
ama toh ka kitepna hi angah tih umlou ding ahi.
29 Keiman ama dinga ason apah ho ka hoibit peh ding;
van gam'a nikhon beitih aneilou banga alaltou nan jong beitih aneilou ding ahi.
30 Ahinlah achilhah ten ka thuhil ho hi apaidoh uva
ka chedan hi ajuilou uva,
31 ka dan semho hi anit lou uva
chuleh ka thupeh hi angailou uleh,
32 keiman achonset nau chunga gimbolna mol kalap ding,
chuleh athu ngailou nau jeh a kavoh diu ahi.
33 Hijeng jongleh kangailutna chu beideh louding
ka kitepna jong achunga ka suhmil deh louding ahi.
34 Ahipoi, ka kitepna chu ka suhkeh louding ahi;
keiman kaseidohsa chu chengkhat jong kanung lahdoh louding ahi.
35 Keiman David kom'ah kihahselna khat kana nei in,
chule atheng kahi jeh in jousei ponge.
36 Ama chilhah te itih chan hijongleh chelha jing diu;
alenggam jong nisa banga chelhum ding ahi.
37 Vanthamjol'a ka hettohsahna chun lhavah banga kikhel tih aneitah louding ahi.
Selah
 
38 Ahinlah nangin tuhin ama chu nakah doh tan chuleh na paidoh tai.
Tuhin Nangma na thaonu lengpa chungah na lunghang tai.
39 Nangin Ama toh na kitepna na paidoh tan;
nangin alal lukhuh jong vutvai lah a na seplha tai.
40 Nangin akhopiu bang ho navoh lhah peh tan
chuleh akulpiu jong khogem na sodoh sah ahitai.
41 Koi hileh ahin hopa jousen athilkeu u akichom gam hellun,
aheng akom ho jousen anuisat un ahi.
42 Nangin agal miteu galjona na musah in
abonchauvin nakipa sah in ahi.
43 Nangin agal manchah u manmo naso in
chuleh galmun'ah gal nalel sah in ahi.
44 Nangin aleng tenggol na lahpeh in
chuleh alaltouna tolsenan na neipeh in ahi.
45 Nangin aphat achang louvin na tehset sah in
chuleh jumthet in nalhan ahi.
Selah
 
46 O Pakai, nangma hi hitia hi kisel jing jeng ding nahi hitam?
Ichan gei nalung hanna meikong jing jeng ding ham?
47 Ka hinkho hi iti chom'a hitam geldoh in,
keiho hi thitei dinga neisem'u ahi ti geldoh in!
48 Koima tonsot a hing jing louding; abon'a thi ding ahi.
Lhan thaneina a konna koima kisel thei louding ahi.
Selah
 
49 Pakai, nei ngailut nau chu hoiya um ham?
David kom'a na tahsan umtah in na kitem'in ahi.
50 Nasohpa keima hin ichan gei a jumna kato hitam?
Hiche nangma hedohlou mite hin eisapset nau ichan gei a kathoh hitam?
51 O Pakai, nadou miten einuisat un,
na thaonu leng chu achena chan'ah anuisat uvin ahi.
 
52 Pakai chu thangvah in um jing jeng hen!
Amen chule amen!